Amos 6 - Katɔti Ɔku Kedee

Bekyuli Bani Nli Ƒaa Básiaku Ɔgbankpi

¹ Bɔbuɛ ute amii bani nli-nwu ƒaa na Sion ku amii bani nli kɔbi lili na Samaria na bɛɛkali ka bɛ́gyi ɔban bɛ́mana bina lɛlɔ. Amii ndi lɛlɔ badine na Israel kalɔ kani náƒɔ lɛnyi ketulo mmɔ. Na Israel kadi bekyuli beebo-mii kudɔ teebevele-mii ala na beebó kalɔ teegyele-mii!

² Bisie Kalne ku Hamat ɔma ɔni náƒɔ lɛnyi mmɔ na bitánu Gat lɛnɔ na Ƒilisti kalɔ lɛlɔ na bɛnu si bana lɛga kadikɔ kédu Yuda ku Israel lɛga kadikɔ.

³ Bɛ́yiƒala ka kalɛ na bilie bɛɛdi bekyuli lɛlɔ kalala kemmo ndubo bɔya Unwoti uyile bubo bubatɛku-mii litemi.

⁴ Amii balakɛne, biwi bina atɛla mɔmɔɔmɔ ani na béti ɔtunkpɛ bánwi nina ligyii lɛlɔ ku eboku bonwu bonwu kemmo, na baadú baƒonu ku ɔmantɛ bakɔ bebi bakɔdi bani nélie lɛmwi teeboku-mii na bɛɛdi taaní!

⁵ Na bɛ́nwi kɔdɔlɔ lɛnu na bɛɛgyá teedie teete lɛlɔ na bina lɛbentaa lɛlɔ. Na bɛɛvumana lɛnu lɛmmɔ adi aani kalɛ na Ɔga Dawid útaabla.

⁶ Na si ntɛ bɔkya wɛ bɛdubo bɔya na beti-mu beboku-mii na bɛni-mu ɔdivo kemmo bɛsia kama. Na bɛɛwɛɛ ligyulo ƒɛƒɛɛ lidu lidu lɛni náƒɔ kuye na bɛɛɛdaku-ni si bɔbwɛ Israel kalɔ kemodi kammɔ kaabwɛ.

⁷ Anwuɔsu amii ndubɔdi bekyuli bedeedi bani na kekpo kadubo buƒie bɔtɔlɔku na bina ebiti ku lɛlɔyɔ kenye kekulo.

⁸ Unwoti Katɔti Ɔyikune Ƒui ɔ́kpali anwu ɔlati lɛnyi úse kenye ɔnini, “Amii Yakob kaba kemmo bebi, bɛɛkya-mi kɔnyi geen na bina lɛlɔ katɔ bɔkɔliku ɔsu, na muukisi bina ɔma agbanya ani na bɛ́tu bínyene mmɔ ƒui. Anwuɔsu ndubo-mii atu budie na lɛnyonu-mii ku bina ɔma lɛkya bina bekisine enu kemmo ku bina akɛla ƒui.”

⁹ Na si nkyuli leevu nébu na kaduli kadi kemmo ni, ama lɛnɔ badubo bukpi.

¹⁰ Na si ukyuli ɔni nékpi mmɔ lɛlɔ ukyuli ɔni nálɛ ka ɔbla-nwu bɔva ala kalɛ na baabla úbo ɔnii ubeti ukyuli ɔmmɔ ni, ɔdubɔkpali na uye unu si ukyuli ɔdi úbu na ɔkya katɔma kesii kadi. Na ukyuli ɔni nányonu ukpine ɔmmɔ ɔɔkya-nwu lɛkɔkɔ ɔdubɔsu-nwu ɔnini, “Oowo, enu! Ba lɛsɛ kpoo, utalɛka bakpali Unwoti lɛnyi mɛni.”

¹¹ Ɔsika si Unwoti údie lɛdi ni, kaduli kenengudi o-o kebliidi o-o ni, ɔdubo-ku bugyingya ƒui kpɛtɛ kpɛtɛ.

¹² Nka ɔpɔnkɔ ulakɛ taaƒulu na atakpɛ lɛlɔ, na ɔmantɛ bakɔ balada bana anwami bonwu bonwu ammɔ teegulu ɛpu anumi. Nsu amii bɛ́tu litemi geen lɛmmɔ lɛlɔ bɔdi bínwini ugyulo ukpidi, na bíti lɛbuni bɔbla bínwini likpila.

¹³ Lɛlɔ lɛɛyɔ́-mii na bɛɛkun lɛmɛnɛ teetu kɔnu kayi ka amii alati ɔyikun kemmo na bɛ́di lɛlɔ na Lo-Debar, na nwuna kalɔ ndi Kekeeke. Na bɛɛsu ka bina ɔyikun ɔsu na bɛ́ƒɔ Katranaim, na nwuna kalɔ ndi Ese ani nnye nte ɔyikun.

¹⁴ Nsu Unwoti Katɔti Ɔyikune Ƒui ɔnini, “Ndubo bɔya na kadi badi bekyuli bata bebékpo-ku amii Israelƒuɔ na badi-mii lɛlɔ na beƒie bina ala ƒui baƒɔ ɔ́si Hamat na katɔ kakɛ útédu Araba Ɔkwalɛ na kada kakɛ ku lɛla biala na lɛkya ekpo anyɔ amɛni ntɛ.”