Amos 4 - Katɔti Ɔku Kedee

¹ “Amii Samariaƒuɔ beleku bise atu na binu! Bise aani Basan ɔmantɛ bakɔ bani nélie lɛmwi, ɔsika bana balati bánu-ma lɛlɔ kaduɛ. Biláda bawabane edu munu munu. Na bani mɔɔyaki ala ni, bísusu-ma geen kalɛ na bakpa bayii bakya. Na bɛɛwia ka bina bagya beteete-mii ntɛ na bitaani uwi biala.

² Ami Unwoti nkɛnku mina lɛnyi lɛni nse kedee lɛlɔ líse kenye ka uwi ɔdi ɔdubo ɔni na badubo-mii ɔbuli enwu bɔkya aani ɔdaa na bani-mii batɔlɔku na ɔdi ulébu.

³ Badubo-mii bɔni bɔvinku bina ɔma unengudi awodu eƒi ani ntɛ-nya kemmo na ɔdi ulébu. Na bebo-mii batáva Harmon kakɛ. Ami Unwoti násu!

Israel Úni Ka Unwini Ubo Katɔti Kudɔ

⁴ “Na kalɛ na bina kayi kaatina-mii si bɛɛyɔ́ ni, bisie Betel ku Gilgal na bɛbla bina ekpidi bɛsia kama kɔlɛ kɔlɛ na mmɔ. Na kadi biala megye na ɔmmɔ kama na bitábla bina akpala. Na emeyi atɛ biala kama na bitéte bina akɛla lɛkpa leevudi.

Bédie Kɔnyana Ɔnu Na Likpidi Ɔsu

⁵ “Amii biti bina etela lidu bitátina na bitaakun lɛmɛnɛ ɔsika ɔmmɔ udu kani na bɛgyi na bɛɛyɔ́ ka bitaabla. Ami Unwoti násu!

⁶ “Ami náya na kɔka kúbo na lɛma lɛmmɔ ƒui kemmo. Nsu ɔmɛni ƒui bitenwini, mmomu bɛ́mu bíni-mi.

⁷ “Lɛ́ya na ɔnantu lɛnɔ ɔ́da bɔna ɔ́ya uwi ɔni kemmo na nka bina edula aawia ɔnantu geen, na bɔna kani na lɛ́ya na ɔɔna egyu egyu, na lɛma lɛmmɔ kemmo na ekpo akladi ákwii.

⁸ Bekyuli baata bana lɛma teesie lɛma bamba taatáwia ntu, na kesii kani na badubɔkɛ bɔdi bani, nsu buledu-ma. Nsu ɔmɛni ƒui bítenwini. Ami Unwoti násu.

⁹ “Lɛ́ya na bina edula ƒui ku adingyii mmo bɔ́kwii na lɛla biala lɛ́bla ƒuƒuu linye. Baalɔlɔ bádi bina anwingyie ku nnɔ egyii mmo ƒui. Nsu ɔmɛni ƒui bítenwini. Ami Unwoti násu.

¹⁰ “Lɛ́ya na ɔgbankpi ala enengudi álɛku-mii aani kalɛ na lɛ́ya na álɛku Egyipteƒuɔ, na bina bakloƒu lɛnɔ békpi na kekpokɔ. Lɛ́ya na béyu bina bapɔnkɔ, na bina bekyuli pii békpi na beenwenyi na bina kuliekɔ. Nsu ɔmɛni ƒui bítenwini. Ami Unwoti násu!

¹¹ “Lɛ́yila bina bekyuli pii udu aani kalɛ na lɛ́bla Sodom ku Gomora. Bɔkywi na nka bina ɛlɛɛ bani nébu bɛda aani ugyii na ogya kemmo asa na lídie-mii. Nsu ɔmɛni ƒui bítenwini. Ami Unwoti násu!

¹² “Ɔƒɛni amu ami ku-mii alati ndubo bɔsa. Anwuɔsu ni, Israel, bɛklibi lɛlɔ na amii ku ami bina Unwoti anumi abla enwi!

¹³ “Ami nédie abi ku ɔƒɛƒɛɛ. Na ami mɔɔyá na bekyuli baatí mina kasusu. Na ami mɔɔyá na ɔƒɛ kadi kaasá. Na mɔɔkɔ́ taayu abi ammɔ ƒui eli ku kesi kesii. Ami ndi Unwoti Katɔti Ɔyikune Ƒui ɔmmɔ!”