Ala Alɛdi 1 1 - Katɔti Ɔku Kedee

Kaba Kemmo Kɔtɛ Ɔ́si Adam Uwi Útédu Abraham Lɛlɔ

¹ Adam ubidi ndi Set ɔni ubi ndi Enos

² ɔni ubi ndi Kenan ɔni ubi ndi Mahalalel ɔni ubi ndi Yered

³ ɔni ubi ndi Metusala ɔni ubi ndi Hanok ɔni ubi ndi Lamek ɔni ubi ndi Noa.

⁴ Na Noa bebi ndi Sem ku Ham ku Yaƒet.

Yaƒetƒuɔ

⁵ Na Yaƒet bebi ndi Gomer ku Magog ku Madai ku Yawan ku Tubal ku Mesek ku Tiras.

⁶ Na Gomer bebi ndi Askenas ku Riƒat ku Togarma.

⁷ Na Yawan bebi ndi Elisa ku Tarsis ku Kiti kadi bekyuli ku Dodan kadi bekyuli.

Hamƒuɔ

⁸ Ham bebi ndi Kus ku Misraim ku Put ku Kanaan.

⁹ Na Kus bebi ndi Seba ku Hawila ku Sabta ku Raama ku Sabteka. Na Raama bebi ndi Seba ku Dedan.

¹⁰ Kus ɔ́wɔ Nimrod. Na Nimrod ɔmɛni úbenwini ukpone ɔyikune geen na kalɔ lɛlɔ.

¹¹ Na Misraim bebi ndi, Lud kadi bekyuli ku Anamiƒuɔ ku Lehabiƒuɔ ku Naƒtuhiƒuɔ

¹² ku Patrusiƒuɔ ku Kasluhiƒuɔ. Na bana kemmo na Ƒilistiƒuɔ bálɛ bási ku Kaƒtorƒuɔ.

¹³ Na Kanaan ubidi udeedi ndi Sidon ku nwuna kaba kemmo bebi babambadi bani ndi Hetiƒuɔ

¹⁴ ku Yebusƒuɔ ku Amoriƒuɔ ku Girgasiƒuɔ

¹⁵ ku Hiwiƒuɔ ku Arkiƒuɔ ku Siniƒuɔ

¹⁶ ku Arwadiƒuɔ ku Semariƒuɔ ku Hamatƒuɔ.

Semƒuɔ

¹⁷ Na Sem bebi ndi Elam ku Asur ku Arƒaksad ku Lud ku Aram. Na Aram ɔ́ta ɔ́wɔ Us ku Hul ku Geter ku Mesek.

¹⁸ Na Arƒaksad ɔ́ta ɔ́wɔ Sela. Na Sela ɔ́wɔ Eber.

¹⁹ Uleku ɔni na Eber úti ni, ɔ́wɔ bebi bananabi inyɔ úte-nwu. Na unwi baalɔ banii Peleg, ɔni kalɔ ndi bule, ɔsika nwuna uwi na Katɔti úle kayawi kammɔ. Na ɔnwani baalɔ banii Yoktan.

²⁰ Yoktan ɔ́wɔ Almodad ku Seleƒ ku Hasarmawet ku Yera.

²¹ Anwu kani náwɔ Hadoram ku Usal ku Dikla.

²² Na ɔ́wɔ Obal ku Abimael ku Saba.

²³ Na ɔ́wɔ Oƒir ku Hawila ku Yobeb. Anwuɔsu bebi bamɛni ƒui badi Yoktan bebi.

²⁴ Na Sem ɔ́wɔ Arƒaksad ɔni ubi ndi Sela

²⁵ ɔni ubi ndi Eber ɔni ubi ndi Peleg ɔni ubi ndi Reu

²⁶ ɔni ubi ndi Serug ɔni ubi ndi Nahor ɔni ubi ndi Tera

²⁷ ɔni ubi ndi Abram ɔni baalɔ Abraham.

Abrahamƒuɔ

²⁸ Na Abraham bebi ndi Isak ku Ismael.

²⁹ Ismael ubi udeedi ndi Nebaiot ku Kedar ku Adbeel ku Mibsam

³⁰ ku Misma ku Duma ku Masa ku Hadad ku Tema

³¹ ku Yetur ku Naƒis ku Kedema.

³² Na Abraham ɔsɔnɔ Ketura bebi bani na ɔ́wɔ ndi Simran ku Yoksan ku Medan ku Midian ku Isbak ku Sua. Na Yoksan bebi ndi Seba ku Dedan.

³³ Na Midian bebi ndi Eƒa ku Eƒer ku Hanok ku Abida ku Eldaa. Na bebi bamɛni ƒui badi Ketura bawɔ.

³⁴ Na Abraham ɔ́wɔ Isak. Na Isak bebi ndi Esau ku Israel.

Esau Kaba Bekyuli Anyi

³⁵ Esau bebi ndi Eliƒas ku Reuel ku Yeus ku Yalam ku Kora.

³⁶ Na Eliƒas bebi ndi Teman ku Omar ku Seƒo ku Gatam ku Kenas. Na Timna ɔdi ndi Amalek.

³⁷ Na Reuel bebi ndi Nahat ku Serah ku Sama ku Misa.

³⁸ Na Seir bebi ndi Lotan ku Sobal ku Sibeon ku Ana ku Dison ku Eser ku Disan.

³⁹ Na Lotan bebi ndi Hori ku Homam. Na Timna ndi Lotan ɔnwani ulekubi.

⁴⁰ Na Sobal bebi ndi Alian ku Manahat ku Ebal ku Seƒo ku Onam. Na Sibeon bebi ndi Aya ku Ana.

⁴¹ Na Ana ubi ndi Dison. Na Dison bebi ndi Hamram ku Esban ku Itran ku Keran.

⁴² Na Eser bebi ndi Bilhan ku Saawan ku Yaakan. Na Disan bebi ndi Us ku Aran.

Edom Batɔnkune

⁴³ Asa na Israelƒuɔ lɛgabɔdi ulu úse kalɔ ni, bekyuli bamɛni nádi lɛga na Edom kalɔ lɛlɔ. Na ama ndi Beor ubidi ɔnanabi ɔni baalɔ Bela, na nwuna ɔma unengudi ndi Dinhaba.

⁴⁴ Uwi ɔni na Bela úkpi ni, Serah ubidi Yobab ɔni nási Bosra nélie-nwu kenye ɔ́di lɛga.

⁴⁵ Ka Yabab úkpi ni, Husam ɔni nási Teman nélie-nwu kenye ɔ́di lɛga.

⁴⁶ Ka Husam úkpi ni, Hadad nébelie-nwu kenye na ɔti ndi Bedad. Na Hadad ɔmɛni nékpo na ɔ́di Midianƒuɔ lɛlɔ na Moab kalɔ lɛlɔ. Na ɔma unengudi ɔni kemmo na ɔ́kya baalɔ Awit.

⁴⁷ Na Hadad kukpi kama Samla ɔni nási Masreka nébelie-nwu kenye.

⁴⁸ Ka Samla úkpi ni, Saul ɔni nási ketu kudɔ ɔma ɔni baalɔ Rehobot nébelie-nwu kenye.

⁴⁹ Ka Saul úkpi ni, Akbor ubidi ɔni baalɔ Baal-Hanan nébelie-nwu kenye.

⁵⁰ Uwi ɔni na Baal-Hanan úkpi ni, Hadad nélie-nwu kenye ɔ́di lɛga. Na ɔma ɔni na úlie baalɔ Pai. Na ulekudi ndi Matred ubidi ulekubi Mehetabel na ɔdi Me-Sahab uwɔ.

⁵¹ Na Hadad lɛnɔ úbekpi. Edom baga ndi Timna ku Ahoa ku Yetet

⁵² ku Oholibama ku Ela ku Pinon

⁵³ ku Kenas ku Teman ku Mibsar

⁵⁴ ku Magdiel ku Iram. Bekyuli bamɛni nádi lɛga na Edom.