Agba 29 - Katɔti Ɔku Kedee

¹ Ukyuli ɔni mɔɔbla atuɔkplu na úni ɔnii ukyuli ɔdi utedie-nwu bɔƒiɔ ni, ɔdubo lɛlɔ udu bɔyila na ɔdi ɔsɔ ulakana-nwu bɔbwi.

² Si ala aatɛku bekyuli babuni ni, bekyuli baakɛ́ lɛlɔyɔ. Nsu si bekyuli bekpidi mɔɔdi bekyuli lɛlɔ ni, bekyuli beedumo.

³ Ukyuli ɔni mɔɔyɔ́ lɛnunda ni, lɛlɔ lɛɛyɔ́ ɔti. Nsu si anwu ku beleku bayalɛ mɔɔví ni, nwuna lɛlakɛ lilélie.

⁴ Ɔga ɔni mɔɔdi bekyuli lɛlɔ ulu lɛlɔ siin ni, ɔɔyá nwuna kalɔ keesé kpoo na baakɛ́ atu bɔyɔ. Nsu ukyuli ɔni mɔɔwia ka utaaƒɔ ala bekyuli kudɔ na bɔbɛ kemmo taadi uwi ndi uwi ni, uubile kalɔ kammɔ.

⁵ Ukyuli ɔni mɔɔnyi ɔkɔ teemwi ukyuli ni, kakpagyuɛ na ɔɔkywɛ-nwu ka ɔnu-ka kemmo.

⁶ Bekyuli bekpidi ni, bana likpidi kakpagyuɛ muudie-ma. Nsu bekyuli bani nse siin ni, baakɛ́ lɛlɔyɔ ku kudu.

⁷ Bekyuli babuni baasia anu ka babla ala ulu lɛlɔ siin bete bawabane, nsu bekyuli bekpidi baaadaku ɔmmɔ.

⁸ Bekyuli bani muudumi bekyuli taama baakya ɔma lɛsɛ. Nsu banundane ama ni, baayila kɔnyi ala ƒui.

⁹ Si ɔnundane úti ɔdɔlɔdi úsienku litemi katɛkɔ ni, kɔvanu kukpludi ku kɔdɔlɔ ala kani na mɔɔlɛ́ ɔdɔlɔdi ɔmmɔ kenye na uléboku keyi buɛɛ.

¹⁰ Bekyuli bani mɔɔwia ka bewi ubugya kalɔ bekisi bekyuli bani mɔɔdi litemi geen lɛmmɔ lɛlɔ. Na baawia ka badu bekyuli bani nse siin.

¹¹ Ɔdɔlɔdi uuti kɔnyi taayila kalɔ na ulanu kama. Nsu ɔnundane anwu ɔɔda lɛlɔ na ɔɔbɛla nwuna kɔnyi.

¹² Si lɛlɔ ɔdine ɔdi ɔɔbu ɔkɔ banyine ni, nwuna kasusu bakyane ƒui badubunwini belikplune.

¹³ Bawabane ku bekyuli bani mɔɔnya-ma taakya ƒui ni, badanku lɛla linwi lɛdi lɛni ndi ka Unwoti úti anumi ani mɔɔnu bukeye úte bana inyɔ.

¹⁴ Ɔga ɔni mɔɔtɛ bawabane litemi ulu siin lɛlɔ ni, nwuna lɛgadi liinye kpakplaa teetu uwi.

¹⁵ Si ada kegyimi aatumini ubi na aadɔnku-nwu kpakplaa ni, ɔɔdá anu. Nsu ubi ɔni na bédie atu na ulie úte nwuna lɛlɔ ni, ɔɔyá na kɔƒa kuukpó uni.

¹⁶ Si bekyuli bekpidi baalɛ́ lili ni, lɛni kani na likpidi bɔbla bɔɔkɔ́ katɔ. Nsu bekyuli bani nse siin badubulie na banu kalɛ na belikplune bammɔ beebó kalɔ.

¹⁷ Tumini ƒula bebi kaduɛ na badubɔya na akɛ atu bɔyɔ. Na badubɔya ƒula kɔyu lɛlɔyɔ.

¹⁸ Si bekyuli bátanu budie bɔtina bɔdi ni, beení ka bunyimi bɔdi bɔdi-ma lɛlɔ. Nsu ukyuli ɔni mɔɔdi ɔda bubo bɔmmɔ lɛlɔ ni, lɛlɔ lɛɛyɔ́-nwu.

¹⁹ Kabla ɔblane ni, ɔɔɔdi kenye etemila kani na beeti taaklibi-nwu, ɔsika ina ka uunú-nya kalɔ ni, ulábla taasiaku lɛni.

²⁰ Áasia anu ánu kenye ɔkplu ukyuli ɔdi dii? Baakana na baasia ɔdɔlɔdi muedi lɛnu teetulo ukyuli ɔmmɔ udu.

²¹ Si ákya kabla ɔblane ásiku lɛnamu uwi ni, ɔdubo ubaya na kɔnyana kuƒie-ɔ kama.

²² Ukyuli ɔni muuti kɔnyi pla pla ni, ɔɔkya kekpo. Na kɔnyi kɔmmɔ kɔɔyá na ɔɔbla ekpidi lidu lidu.

²³ Ukyuli lɛlɔ katɔ bɔkɔliku muuboku nwuna kalɔ bubo. Na si éboku lɛlɔ kalɔ ni, bekyuli badubɔbu-ɔ na aƒɔ lɛnyi.

²⁴ Ukyuli ɔni nébunku uyune ni, anwu ɔlati muukisi lɛlɔ. Ɔsika ulakana kenye buse na ɔsu lɛla lɛni nálɛ.

²⁵ Si ada lɛlɔ na bekyuli lɛlɔ liƒu ɔsu ni, akya ɔgbankpi bonwu ɔdi kemmo. Nsu ukyuli ɔni néti anu ásia Unwoti lɛlɔ ni, lɛla biala lilékpoku-nwu

²⁶ Bekyuli pii baawia ka bada bana litemi bava lɛlɔ ɔdine ɔdi anumi. Nsu litemi bɔtɛ ulu siin lɛlɔ ni, Unwoti kudɔ na ɔɔsí.

²⁷ Bekyuli babuni balayɔ bekyuli bekpidi. Na bekyuli bekpidi lɛnɔ balayɔ bekyuli babuni.