ZEKHARIA 10 - Lacid Common Language Bible

Khyoid Yu wa Ga: Aseing Dangsoo"

¹ Zain vang khoem" ri moug: voo nhang: wa shid re" Aseing ri mho' we'. Aseing gi yugkhang" moo" shid mo jhoemmoug" yo' moug: ri nhang: kaid byid: lho: jang: dam pa: ri nyau young" nhang: su: nghoid.

² Byu yigi yu phara" soolhoo: joem yo' goem phain"- boid phyed sara: yiri myid: ago". Nghoid loug we' mhoug da" dang: yo' dang: kang: abo da" dang: za: danghoid wa. Dayham" gi yhoebmo, ri dang: kang: phid: ago". Nghoid loug nanu" ri anghoid jang" khyoo: za: dashu" vhang: lo" ago". Nyangnu" byid: da" nheig teing khyoo: gi ce: akyu" aboo nghoid da:. Houg: yoomo byu yigi byug lo" da" yang joem yhang: ti" vhang: lam" yen" ago". Nyangnu" gi vhu" shi: su: aboo yoomo kyi" khyeug ago".

³ Aseing tid nyid zigi «Ngoo gi nga" byumyu" yiri vhoeb zo: nyid da" tungbau byumyu" yiri nheig yo: lho: yooboo dam byid: wa. Yuda byumyu" gi Nga" byumyu" nghoid. Houg: yoomo nyangnu" ri ngoo yoem: moo" bo Aseing gi goin coung: nyid wa. Nyangnu" gi yoem: so' gyi: da" nga" gyi myang: joem bue" loo wa nghoid.

⁴ Nga" byumyu" ri vhoebkhang" wa da" mung" zoug: yi vhujhung: yi yo' gyizoug: moo" yigi nyangnu" khoug: mo nyid thu loo goo" wa nghoid.

⁵ Yuda byumyu" yigi fu" moo" khyoo: joem moo nyangnu" da" gyivoo joem ri nang: nhe" nhoeb pyam' da" gyizoo: yi yo' dakhyoo" ti" oung: doid lo" boem wa. Aseing gi nyangnu" yo' dage" nyid yoomo nyangnu" gi gyizoo joem yo' meing: zain: go" ri myang: zhung: da" gyiphung: rilang" yo" zain: oung: pyam' wa zi nghoid.

⁶ «Ngoo gi Yuda byumyu" yiri yoem: bo jo, nhang: wa nghoid. Israela byumyu" yiri khyoid yu wa. Ngoo gi nyangnu" ri nheig khyeug yoomo nyangnu" dangain" ri yhoem: khyoo: doem shu" tau" yu wa zi nghoid. Nyangnu" gi ngo wigi khanham we' angeug pyam' yu" da" mo, yo' dakhyoo" ti" nghoid wa. Ngoo gi nyangnu" da" Aseing Mangsoo nghoid- nyangnu" da" akyu" mho' thui: joem ri tam" gyoo: byid: nyid wa zi nghoid.

⁷ Israela byumyu" yigi gyizoo: yi yhang: ti" yoem: bo loo wa zi nghoid. Nyangnu" gi zabyid yhid: shug su: yhang: ti" gau yi goo" wa zi nghoid. Nyangnu" nya: myid: nya: zoo: yigi he: oung: doid lo" khyoo: ri myid boin: wigi Aseing zei: loo bye: moo" zoo" yoomo nyangnu" gau yi nyid boem wa zi nghoid.

⁸ «Ngoo gi nga" byumyu" yiri Khe: yu lho: dage" zheing" too" wa nghoid. Ngoo gi nyangnu" ri khyoid yu lho: shid phyang" yhang: ti" nyangnu" ri doem myo: je: loo nhang: wa.

⁹ Ngoo gi nyangnu" ri tungbau mung" khyoo: khaid sain" pyam' nghoid loug we' Nyangnu" gi ve: da" mung" moo nyid lho: Ngoo ri myid boin: lo boem wa nghoid da:. Nyangnu" yo' nyangnu" da" zooshang: yigi ashid: loo: nyid deing lho: yhoem: khyoo: dage" doem phang: loo wa zi nghoid.

¹⁰ Ngoo gi Egutu yo' Asuri mo nyangnu" ri yhoem: khyoo: shu" yu wa. Hau: lho: nyangnu" ri nyangnu" da" moug: moo doem nyhed: too" wa. Gilead yo' Lebanon moo we' nyangnu" ri doem nyhed: too" wa. Damung" goin" jang" moo nga" byu yi za: byeung" loo wa.

¹¹ Nyangnu" gi yau: khi" da" Panglai yo' thung" shoug" goo" loug we' gyid being: mhoid joem ri ngoo Aseing baid wigi Nila gyid lang gi kain" loo" wa nghoid. Nghoid boin: nyid da" Asuri ri we' nyhoem: khyo' pyam' byid: wa nghoid. Yoem: bo nyid da" Egutu we' phung" yoeb byug loo" wa.

¹² Ngoo gi nga" byumyu" yiri yoem: gyi: loo nhang: wa. Hougsu" nyangnu" gi ngoo ri coung" pid lho: nga" dang: ri tam" gyo: wigi cang lo boem wa zi nghoid». Aseing tid too" bye:.