YOSHU 4 - Lacid Common Language Bible

Xang: Yoeb Ladoo" Zeing Zhug Da" Khyoo:

¹ Byumyu" yi dangain" Yodan gyid lang ri bain gu: dab lang" Aseing gi Yoshu ri

² «Akung: dakung: mo dayug yug byu daxe: eig yug ri khyen: yu wigi

³ nyangnu" ri Yodan gyid lang gyid gung- khainjung yi yab jo, boem da" joyoo cang mo lugzeing daxe: eig loem: koid: yu wa shid re" amyeing" byid: we'. Hau: lug boem ri nyangnu" vu, wigi akhamyen nanu" dab koid da" joyoo moo: boem too" ge' ein: nyangnu" ri tid we'» ga: tid.

⁴ Hau: thang: Yoshu gi nyang: khyen: to" da" byu daxe: eig yug ri khe: yu lho:

⁵ nyang: nyangnu" ri «Nanu" Aseing Mangso da" Dang: Theing Kuid: shid vhu" moo Yodan gyid lang khyoo: yhe: loo" ge'. Nanu" yugkhang" moo" Israela akung: dakung: shid re" lugzeing daloem: khyo" nanu" lo, sain: moo: koid: vu, loo ge'.

⁶ Hau: lugzeing joem gi Aseing cikoid lid lo da" khyoo: byumyu" yiri boin: nhang: ri" wa. Ju" loo wa da" ayo, moo nanu" zoo: yi hau: lugzeing da" dang: kang: ri myid: lang"

⁷ nanu" gi nyangnu" ri Aseing da" Dang: Theing Kuid: gyid lang ri gu: dab yhe: uri Yodan gyid yau zi theing: lo" khyoo: ri tid kyoo" wa zi nghoid. He: lugzeing joem gi he: joyoo moo: bue" lo da" khyo: ri Israela byu yiri boin: nhang: wa zi nghoid» ga: tid.

⁸ Houg: bang: we' Yoshu da" amyeing" ri cang boem bye:. Aseing wigi Yoshu ri amyeing" byid: to" ziyo' dayhang: ti" nyangnu" gi akung: dakung: shid re" daloem: loem: Yodan gyid lang gung mo lugzeing daxe: eig loem: ri koid: yu lho: hau: joem ri dab khyoo: vo, lo" wigi hougmoo: lo" khyo' boem to" ago".

⁹ Yoshu gi khainjung yi Dang: Theing Kuid: ri vu, wigi yab jo, boem da" Yodan gyid lang gung moo we' lugzeing daxe: eig loem: ri zhang to" da:. (Hau: lugzeing joem gi hougmoo: jo, da:.)

¹⁰ Khainjung yigi byumyu" yi koid wa shid re" Aseing wigi Yoshu ri amyeing" byid: da" gu: ja: khang" moo" bain koid sho' Yodan gyid lang gung moo: yab jo, ago". He: zigi Moshe byid: da" amyeing" dang: nghoid. Byumyu" yigi gyid lang ri hain: hain: gu: dab ago".

¹¹ Nyangnu" dangain" dashoid khyoo: bain gu: dab lang" Aseing Dang: Theing Kuid: gi Khainjung yi yo' dage" byumyu" yi da" shid vhu" moo yhe: lo" ago".

¹² Ruben kung:- Gad kung:- yo' Manashe kung: agung dayi" gu: gi Moshe wigi nyangnu" ri koid wa tid to" ziyo' dakhyoo" ti" gyi khaid wa shid re" jen" jen" koid ci: wigi deing da" byumyu" yi shid vhu" khyoo: gu: dab yhe: ago".

¹³ Aseing shidkhoin" moo: gyi khaid wa shid re" jen" jen" nghoid nyid da" yuggi myid: moin gi Yerikho nam mo jang: pa: eung: eung: gu: dab yhe: ago".

¹⁴ Hau: nyid" ri Aseing koid da" moo" gi Yoshu ri byu zeing dayug khyo" Israela byu yiri myid jhoo: yu nhang: da:. Nyangnu" gi Moshe ri ngi: shab boem yhang: ti" nya: pyaid goin" nyang: ri ngi: shab byid: ago".

¹⁵ Hau: thang: Aseing gi Yoshu ri

¹⁶ Dang: Theing Kuid: vu, da" khainjung yi Yodan gyid lang mo thu ri" wa shid re" amyeing" byid: wa tid da:.

¹⁷ Yoshu hougsu" koid bye:.

¹⁸ Houg: lho: khainjung yi gyid yam khyoo: ju" loo" lang" gyid lang gi doem yau lo" lho: gyid yam byeung" sho' do, re" da:.

¹⁹ Byumyu" yigi Yodan gyid lang ri Lhammoo" xang: shi" khyab daxi: nyid" ein: nyid" ri gu: dab wigi Yerikho bidthu shoid Gigala moo dab koid nyid ago".

²⁰ Hougmoo: Yodan gyid lang mo koid: to" da" lugzeing daxe: eig loem: ri Yoshu zhang too" bye:.

²¹ Houg: lho: nyang: gi Israela byumyu" yiri «Ju" loo wa da" ayo, moo nanu" zoo: yi he: lugzeing daxe: eig loem: da" dang: kang: ri myid: lang"

²² nanu" gi nyangnu" ri Israela byu yi Yodan gyid lang ri myid kyug yoo moo gu: dab da" ayo, mo khyoo: ri tid kyoo" wa zi nghoid.

²³ Thoem" ni ri ngoonu" shid re" kyug hei nhang: byid: yhang: ti" nanu" bain gu: dab sho' Yodan gyid lang ri nanu" shid re" nanu" Aseing Mangsoo kyug hei nhang: da" khyoo: nyangnu" ri tid kyoo" ge'.

²⁴ He: zi yoomo moug: gyab goin" mo yugkhang" moo" gi Aseing da" yoem: so' khayhi' gyi: sheung: ga: ziri se' myang ri" goo" wa. Houg: lho: nanu" gi nanu" da" Aseing Mangsoo ri apyaid atoo: moo: ngi: shab byid: nyid wa zi nghoid» ga: tid.