YOSHU 2 - Lacid Common Language Bible

Yoshu Yerikho Khyoo: Jooyu" Bang: Ri: Nhang: Kaid Khyoo:

¹ Hau: thang: Yoshu gi shug gam joyoo dab mo jooyu" su: eig yug ri Khanan mung" ri akhau: pyam: ju" sho' joo" yhe: yu" wa shid re" je wigi Yerikho voomoo" ri jooyu" wa shid re" amyeing" byid: wigi nhang: kaid. Nya: eig yug hau: voomoo" khyoo ju" yhe: lang" Rahab ga: da" shava myhi yhoem: moo: damyen theing: ago".

² Yerikho voomoo" mo khokham phoo gi mungdain: ri jooyu" wa shid re" Israela byu dayham" hau: myen ju" re" ga: ziri shau" gyo: da:.

³ Houg: yoomo nyang: gi Rahab ri dang: pyeung: kaid zigi «Re" yhoem: mo byu eig yug gi mungdain: goin" ziri jooyu" wa shid re" ju" re" zi nghoid ago". Nya: eig tang: ri shu" thu loo byid: la» ga tid.

^4-6 Nyang: gi «nga" yhoem: khyoo: yuggi dayham" ju" ri" ago". Nghoid loug we' nyangnu" khamo ju" ri" goo" abe ngoo asi. Nyangnu" gi bidvang yo, voomoo" vang khyam: khoem" amyhid" shi" ri to' lo" boem abye: go". Nyangnu" khakhyoo: loo" khare" zi ngoo asi. Nghoid loug we' nyangnu" thang: moo: nanu" myab cang nghoid rigi nanu" nyangnu" ri cang myhi: shi" wa"» ga: tid. (Akhid" Rahab gi jooyu" su: eig yug ri yhoemkhung: khyoo: shu" do, lo" wigi jid: moo" gam joem yang: moo nya: eig yug ri lo" goug" nhang: to" da:.)

⁷ Khokham pho da" byu yi voomoo" mo thu lo" ago". Houg: lang" voomoo" vang khyam: khoem" myhid" khari" bye:. Nyangnu" gi Israela jooyu" su: eig yug ri Yodan gyid lang gu: dab da" joyoo ju" sho' yhe: cang yu" kaid ago".

⁸ Jooyu" eig yug ayhoeb shi" uri Rahab gi yhoemkhung: tho' khyoo: do, lo" wigi

⁹ Nya: tang: ri «Aseing gi he: mougmyid nanu" ri byid: pyam byid: ziri ngoo se'. Mungdain: khoug: mo yugkhang" moo" gi nanu" ri gyoug nyid boem ago".

¹⁰ Nanu" Egutu mo thu lo boem uri Aseing gi thoem" ni ri khasu" kyug hei' nhang: bye: ziri ngoonu" shoug" gyoo: bye:. Yodan gyid lang bidthu shoid mo Amori khokham eig yug nghoid da" Sihon yo' Oga ri nanu" khasu" said pyam go" da" khyoo: ri we' ngoonu" shau" gyoo: bye:.

¹¹ Hau: khyoo: ri ngoonu" shau" gyoo: yo' ngoonu" gyoug nain" boem bye:. Nanu" yoomo ngoonu" da" yoem: gi dangain" bei: lo" byug bye:. Nanu" Aseing Mangsoo gi mougkhung: tho' mo yo' he: myidgung: dang mo Mangsoo nghoid da:.

¹² Akhid" re" eig tang: ri ngoo nyeing" za koid bye: ziyo' dakhyo" nga" yhoem: byu yiri nanu" koid boem wa ein: ziri jham tang: ge'. Houg: lho: re" eig tang: ri ngoo yu" loem wa da" avoid daja: ja: ngoo ri byid: ge'.

¹³ Nanu" gi nga" ba"- nga" yhid- nga" mang:- nga" bi:- nga" nhung" yi yo' nyangnu" ikoin deungkhu: byu dangain" ri nanu" goem loem byid: wa ein: ngoo ri dangsoo" byid: ge'. Ngoonu" ri said pyam wa zi ashau" nhang: goo"» ga: tid.

¹⁴ Hau: yuggi eig yug nyang: ri «Ngoonu" tid ziyo' dakhyo" ngoonu" akoid nghoid rigi Aseing gi ngoonu" kangso' ri yu pyam baja" o". Ngoonu" cikoid bye: khyoo: ri nang hang" ri we' atid kyoo" wa nghoid rigi he: mungdain: ri Aseing gi ngoonu" ri byid: uri nanu" ri ngoonu" nyeing za: koid wa ein: ngoonu" nang ri dang soo" byid: wa» ga: tid da:.

¹⁵ Rahab gi voomoo" vang khyam: khoug: moo: koid to" da" yhoem: moo: nyid. Houg: yoomo nyang: gi hau: yuggi eig yug ri bangzoo: khoem" khyoo: tei" khyo" gyoo" loo" nhang: bye:.

¹⁶ Nyang: gi: «Boem moug: khyoo: lo" nyid ge'. Anghoid rigi khokham phoo byu yi re" tang: ri myang boem wa. Hau: joyoo moo: nyangnu" doem tau" loo ju" sho' soem" nyid" nyid nyid ge'. Hau: thang: ri re" tang: da" gyung: khyoo: khyoo: yo" yhi: wa nghoid» ga: tid.

¹⁷ Yuggi phoo tang: nyang: ri «Nang ngoonu" ri byid: da" dangsoo" ngoonu" koid pyeing" wam bye:.

¹⁸ Nang hid: su" koid ca" da:. Ngoonu" nanu" mungdain: khyoo: jhen" vang re" uri nang nga" eig yug ri shab gyoo" loo" nhang: da" bangzoo: khoem" mo he: tei" ne ri tei" too" we'. Re" ba"- re" yhid- re" mang: nhung" yi yo' re" ba" da" yhoem: byu yi dangain" ri shu" wigi re" yhoem: moo: zheing" too" we'.

¹⁹ Dayug yug yhoem: khoug: mo thu lo lho: nghoid rigi nyang: shid: zigi nya: yooboo yoomo danghoid wa. Ngoonu" moo yoovoin aboo wa. Nghoid loug we' dayug yug yhoem: khoug: moo: nanu" yo' nyid lho: dam dab nghoid rigi hau: zigi ngoonu" moo: yoovoin bo nyid.

²⁰ Nghoid loug we' ngoonu" koid da" moo" zoo" dayug yug ri nang tid kyo" nghoid ri koem' gi nang nga" eig yug ri koid nhang: da" dangsoo" ri ngoonu" koid pyeing loo: wa zi anghoid» ga: tid.

²¹ Nyang: myid veing" wigi nya: tang: ri nhang: kaid bye:. Nya: eig yug phang: lo" thang: ri nyang: gi hau: tei" ni ri bangzoo: khoem" moo: tei" tab to" da:.

²² Jooyu" su: eig yug gi bouggung khyoo: do, lo" wigi lo" goug" nyid. Khokham pho da" byu yi nya: tang: ri siyoo gyoem" cang soem" nyid" cang sho: nghoid loug we' nyangnu" hau: tang: ri amyang yoomo nyangnu" Yerikho khyoo: doem tau" loo" bye:.

²³ Hau: thang: jooyu" su: eig yug gi bouggung mo gyoo" lo lho: gyid lang gu: dab wigi Yoshu jang" khyoo: loo" bye:. Nya: tang: gi bui" bye: da" gu: ja khang" moo" nyang: ri tid kyoo" bye:.

²⁴ Houg: lho: «Hau: mungdain: goin" ziri Aseing ngoonu" ri byid: too" bye: ziri nga" eig tang: goolhoo' za: si bye:. Hougmoo: nyid da" bang: dangain" gi nyhang" ri gyoug nyid boem ago"» ga: tid.