YOSHU 16 - Lacid Common Language Bible

Ephrim Yo' Bidvang Shoid Mo Manashe Byumyu" Yiri Kho' Gam Byid: Da" Mougmyid.

¹ Yoseb amyed ashen yiri gam byid: da" mougmyid mo mougpyi: shoid mougkyoo" gi Yerikho gyid pug joem bidthu shoid- Yerikho nam Yodan gyid lang mo wigi dain" phyoid yoo ju" sho'. Hau: zigi Yerikho mo zi boem moug: Bethela ju" sho' do, lo" da:.

² Bethela mo zi Luza- Arkhi byu yi nyid boem da" Atarod Adara khyoo: lid phyed yhe: lo" da:.

³ Houg: mo zi bidvang shoid Yaphleti byu yi mougmyid khyoo: yhe: lo" wigi Bed Horon vho: du ju" sho' nghoid da:. Houg: mo zi Gaza khyoo: lid yhe: wigi Meing: gung panglai: moo: yhe: thang da:.

⁴ Yoseb da" amyed ashen yi nghoid da" Ephrim yo' bidvang shoid mo Manashe byumyu" yigi nyangnu" da" mougmyid jonu" khyo" he: ziri shau" yu ago".

Ephrim

⁵ He zigi Ephrim byumyu" yhoemkhung: yi da" mougkyoo" nghoid da:. Nyangnu" mougkyoo" gi Atarod- Adara bidthu shoid mo zi Bed Horon tho' du ju" sho'

⁶ Houg: mo zi Meing: gung panglai: ju" sho' nghoid da:. Mikmetha gi nyangnu" da" mougzhung: shoid khyoo: nghoid da:. Houg: mo bidthu shoid mougkyoo" gi Tanag Shilo shoid khyoo: guid" lo" wigi Yanoa bidthu shoid khyoo: lid phyed lo" da:.

⁷ Houg: lho: hau: zigi Yanoa mo zi: Atarod yo' Nara- Yerikho khyoo: ju" gyoo" lo" wigi Yodan gyid lang moo yhe: thang da:.

⁸ Bidvang shoid mougkyoo" gi Tapua mo zi Kana gyid lang zoo: khyo" zi Meing: gung panglai: moo lo" thang da:. He: mougmyid gi Ephrim byumyu" yhoemkhung: yiri nyangnu" da" mougmyid jonu" khyo" byid: to" da:.

⁹ Manashe mougmyid khoug: moo: voogung joem yo' voozoo: joem dayham" bo nyid. Nghoid loug we' hau: ziri Ephrim byumyu" yiri byid: da:.

¹⁰ Nghoid loug we' nyangnu" gi Gezera moo: nyid boem da" Khanan byu yiri akhaid thu pyam nghoid ago". Houg: yoomo akhid nyid" ju" sho' Khanan byu yigi Ephrim byumyu" yi phung: moo: nyid nyid boem ago". Nghoid loug we' nyangnu" gi join joem khyo" moo" doin: zeig koid nhang: zi shau" ago".