YOHAN 18 - Lacid Common Language Bible

Yesu Ri: Myheig Tei" Lo" Da" Khyoo:

¹ Hid: yhangti" akyu" bain mho' da" thang: ri Yesu gi nya: cangzoo: yi yo" dage" Kedron gyid nung" thei: tab' khyoo: gu: dab lo" boem.

² Hau: joyoo moo khyam: daloem jo. Yesu yo" cangzoo: yi gi hau: khyam: khoug: khyoo: vang lo. Hau: joyoo moo Yesu yo' nya: cangzoo: yi gi atheing: loo: lhoung yhe: yu" yoomo nyang: ri ung" zo: pyam wa da" Yuda we' hau: joyoo ri se' to.

³ Roma gyizoo daphung: yo' khainjung agyi yi yo' pharishe nhang: kaid da" noku yhoem: moo" zung" da" gyi zoo yi ri shu" wigi Yuda gi hau khyam moo re" lho: nyangnu" gi myi bung we' myi doem we gyizi gyi kho joem ri ci boem.

⁴ Aseing Yesu gi nyang: thoung" shau" wa da" moozoo" dangain" ri si' gu nghoid yoomo houg: bang: jhang khyoo: jhen" yhe: lho. Nanu" hang" ri shoo: go" ga: yhe: myid.

⁵ Houg: bang: gi Nazared mo Yesu ri sho:- ga: tid boem. ‹‹Ngoo gi hau: yug nyang: nghoid bye:» ga: tid. Aseing: ri gyivoo yi da" lo, moo ab pyam wa da" Yuda gi houg: bang: yo' dage" yab jo.

⁶ Ngoo gi hau: yug nyang: nghoid bye: ga: Yesu tid lang" su- nyangnu" gi nung zoid' zoid loo" khare" boem lho: dangain" mo, myidjang: moo leung loo" khare" boem.

⁷ Houg: yoomo Aseing Yesu gi nanu" hang" ri shoo: go" ga: doem myid. Houg: bang: we' ‹‹Nazared mo Yesu›› ri sho: ga: doem tid boem.

⁸ Yesu gi hau: yug gi ngoo nyang: nghoid bye: ein: nanu" ri ngoo tid bye. Ngoo gi nanu" ngo ri sho: yen" go: nghoid lang" gi hid: bang: ri loo" nhang: kaid ge" ga: doem tid.

⁹ (Hid: su" ga: tid da" khyoo: gi phoo we"- ngoo nang ngoori ab byid: too" mo, mo dayug we' byug loo" zi aboo baja" ga: da dang byeung" loo wa shid re" nyang: tid to" ziyo' dakhyoo" bue" loo wa shid' re" tid zi nghoid.)

¹⁰ Simun Petru gi sham dacam" ci: re" nyang: gi sham ri she: yu lho: Khainjung agyi pho da" join dayug ri she: jab kaid uri hau: join, pho da" lo, yo shoid mo nukhyab byed gyoo" loo" khare". Hau: join, pho da" myeing gi Malkhu ga: su: nghoid.

¹¹ Aseing Yesu Petru ri tid zigi sham: ri sham: byang moo doem xang too" we'. Nga" Phoo gi ngoori shug nhang: da" kyi" khyeug goem ri ngoo ashug wa ein: nang soin: rhe"

Anna Zoug: Pho Da" Shid' Khoin" Moo Yesu Ju" Yhe: Da" Khyoo:

¹² Hau: thang: ri Roma gyizoo: yi yo"- Yuda byumyu" yi ri zung" lhug da" gyizoo: yi gi Yesu ri myheig tei" ci: lho: wigi Anna zoug: pho jhang khyoo: xang" shid" khe: shu" yhe: lo" boem.

¹³ Anna gi hau: zain re- khainjung agyi moo": Kayapha da" yug phoo nghoid nyid.

¹⁴ Kayapha gi byu myoo" sho' mo da" shid' re" byu dayug za: te: shid: zigi je ge ga: Yuda zoug: myeing" ci: mo, ri phajhi" byid: su: nghoid.

Petru Gi: Yusu Ri: Ngeug Pyam Da" Khyoo:

¹⁵ Simun Petru yo" gootu: cangzoo: dayug gi Aseing Yesu da" thang: moo cang yhe: lo. Gootu: cangzoo: dayug gi Khainjung agyi pho yo" si' goo" yoomo Yesu yo" dage" Khainjung agyi phoo da" yhoem: vang" khoug: khyoo: yo" bo vang lo.

¹⁶ Hau uri Petru gi vang" khyam: nghe shoid moo nyid kho''. Khainjung agyi phoo yo" si' go" da" cangzoo: phoo gi thu' re" lho: khoem" zung" da" zayam myhi, ri akhang" mho' wigi Petru ri fang yu.

¹⁷ Khoem" zung" da" zooyam myhi, gi nang gi fo: youg da" cangzoo: dayug nghoid da: anghoid la"» ga: myid: ri Petru gi ‹‹ngoo anghoid» ga: tid.

¹⁸ Houg: lang" khainjung agyi yi ri zung" da" gyizoo: yi yo"- dei: zoo: yi gi ngam" yoomo,- myi: gyu: nghe, da" myikhyoem' yam lheing moo yab jo, zoore"- myi: gang go" nyid boem. Petru we' houg: bang: yo" dage" myi: yab gang nyid.

Khainjung Agyi Zeing: Yesu Ri: Myid: Kyeing Yu" Da" Khyoo:

¹⁹ khainjung agyi moo": gi Yesu ri nya cangzoo: yi da" khyoo: ri we' nya: jhoug" myeing" joem da" khyoo: ri we' myid: kyeing joeb" yu.

²⁰ Yesu phougtu" da" zigi Ngoo gi byu myoo" sho' mo da" shid' khoin" moo khanham we bang bang kho" kyo" jhoug" byid: loo bye. Khanham we' azoug" afu' ngoo akho" yu.

²¹ Houg: su" nghoid ri ci: wim nang ngoori myid: nyid la". Ngoo kho" kyo" jhoug" byid: da" khyoo: ri gyo: yu" mo ri myid: yu" we'. Ngoo kho" kyo" da" khyoo: ri nyangnu" se' boem bye.

²² Hid: su" ga: phougtu" lang" gung zung" gyizoo: dayug gi Yesu ri thoin: lho: khainjung agyi moo" gi «Nang hid: su" aphoug" akhyoid ge phougtu" la"» ga: tid.

²³ Aseing Yesu gi Nga" dang: amain" nghoid rigi amain" khyoo: ri" toin" shid' we' deing da" khyoo: tid loug ciwim ngoori baid go" ga: tid.

²⁴ Hau: thang: ri Anna: khokham" gi Yesu ri myheig tei" lho: khainjung agyi moo": Kayapha jhang khyoo yhe: de" kaid bye.

Petru Gi: Yesu Ri: Doem Ngeig Pyam Da" Khyoo:

²⁵ Simun Petru gi myi: yab gang nyid da" uri Byu dayham" bang: gi nang we' hau: youg da" byen cang" anghoid la"» ga: myid: boem. Petru gi Ngoo anghoid ga: ngeig pyam.

²⁶ Petru wigi nakhyab' jab phyed' byid: shau" da" join pho bidnoem Khainjung agyi dayoug da" join, phoo gi nang ri hau: yug yo" dage" khyam: moo ngoo myang- anghoid la"» ga: tid.

²⁷ Petru gi ngoo anghoid ga: dalheing: doem ngeig pyam. Hau: uri nyang: gyo, toin: bye.

Pilaid Khokham" Jhang Ju" Yhi: Bye

²⁸ Nabsoin: myo, hain" zoo"Yesu ri Kayapha jang" mo zi Pilaid khokham" khoo" khyoo doem shu" yhe: lo" boem. Yuda zoug yi gi lhed: kaid pui" myen" xoin zoo: wa da" shid' re"-noku thung" tarha" yo' dakhyoo" ti"-- nyang: nya: da" gung ri ced" shang: nyid boem yoomo hau: khokham" khoo" khyoo: abo cang yhe: boem.

²⁹ Houg: yoomo Pilaid khokham" gi houg: bang: yo" shau" goo" wa shid' re" nghe: shoid khyoo: thu' re" lho: He: yug ri ce: ja: shoid vhang yoomo yooboo foin: go" ga: myid.

³⁰ Houg: bang: gi yooboo daja: ja: shoid su: anghoid rigi zoug: pho jang" moo ngoonu" khe: shu" ri" wa zi anghoid ga: tid boem.

³¹ Pilaid khokham" we' nanu" nyang: he: yug ri shu" loo" ge'. Nanu" nya: thung" tarha" khyo" dang: lo" phyed' ge' ga: tid. Nyang: nu" koem gi ngoonu" gi byu hang" ri we' said pyam wa da" dang: ayo" phyed' ga: doem phougtu" boem.

³² (Nyang: nu" doem phougtu" da" khyoo: gi Yesu khasu" shid: wa da" khyoo: ri nang: tid too" bye: ziyo' dakhyoo" ti"-- bue" lo khyoo nghoid nyid.)

³³ Pilaid khokham" gi yhoem: khoug: khyoo: doem vang lo" lho: wigi Aseing Yesu ri khe: yu lho: wigi nang gi Yuda yi da" khokham" nghoid la"» ga: myid.

³⁴ Yesu gi he: dang: gyi khoin" ri zoug phoo khyo" myid: la". houg: su" anghoid lang" gi nga" da" khyoo: ri dayug yug re" koug yoomo myid: la"» ga: tid.

³⁵ Pilaid khokham" gi nang gi ngoori Yuda byumyu" dayug yug nghoid ein: jho: nyid la". Nang ri nga" jhang khyoo: shu" ri" mo, gi Re" da" byumyu" yi yo"- khainjung agyi moo": yi za: danghoid ago". Nang gi ce: moo" shoid to" lha"» ga: doem myid.

³⁶ Aseing Yesu tid zigi Nga" mungdain: gi he: mougmyid yo" asen: nghoid rigi ngoo gi Yuda byumyu" da" lo, moo avang loo" sho' nga" da" cangzoo: yi gi Meing: zain wa zi nghoid. Nga" da" mungdain gyeing" gi he: mougmyid yo" asen: ga: wigi tid.

³⁷ Pilaid khokham" gi houg: su" nghoid rigi ‹‹Nang gi khokham" nghoid la".» ga: myid. Aseing Yesu gi Ngoo gi nang tid ziyo' dakhyoo" ti"- khokham" nghoid. Ngoo gi deung main" da" tarha" ri kho" kyoo" baja" ga: khu: re" lho: he: mougmyid moo gyoo" lo zi nghoid. Deungmain" da" tarha" yo" sen: mo, dangain" gi nga" da" dang: ri tam" gyo: ago" ga: tid kyo.

³⁸ Pilaid khokham" gi deung main" ga: zigi ce: noem nghoid lha"» ga: myid. Hau: thang: ri Pilaid khokham" gi byu yi jhang khyoo: thu' re" lho: wigi he: yug ri said pyam wa yi, da" yooboo gi ngoo ci: amyang ga: tid.

Said Pyam Wa Shid' Re" Dang: Phyed Da" Khyoo:

³⁹ Nanu" da" thung" boo ri jo ziyo' dakhyoo ti"-- lhed: kaid da" pui" nam" ri thung byu dayug yug ri ngoo lhoung nhang: thu' kaid. Nanu" da" Yuda khokham" phoo ri nhang: kaid wa zi vhoo: go" la"» ga: myid.

⁴⁰ Houg: bang: gi nyang: ri anhang: thu' alhoid pyoin kaid. Baraba ri nhang: thu' kaid we' ga: nyho: yoid lo boem. (Baraba gi khyangtoug: phoo nghoid nyid.)