YOBA 3 - Lacid Common Language Bible

Mangsoo ri Yoba Myeing" Myo: Khyoo:

¹ Lo" thang moo Yoba shi" dang: ji thu re" wigi nyang: khu: bidnyid ri nheing" da:.

Yoba

^2-3 O" Mangsoo we"- Ngoo khu: re" bidnyid ri nheing" koin" zang" we' Ngoo ri voin shid" da" myen ri nheing" we'

⁴ Mangsoo we"- hau: bidnyid ri moug: coid bui" nhang: we' Hau: bidnyid ri khanham we' adoem boin: loo: Hau: bidnyid mo khanham we' adoem bang nhang: loo.

⁵ Hau: bidnyid ri moug: doeb nhang: lho: no, seing" kyid: moug: coid nyid nhang: we'. Hau: bidnyid ri jhoemmoug" thei" wigi nghoeb pyam wigi bid ri shoem: byug nhang: we'.

⁶ Dazain khoug: moo hau: myen ri byug loo" nhang: wigi hau: ziri khanham we' adoem nghab nhang: loo:.

⁷ Hau: myen ri jham" coug: youg- ngei pyo: khyoo: ajo, bui" nhang: la.

⁸ Hau: bidnyid ri nheing" wa shid re" main dain fa" bang: ri tid we' houg: bang: gi mainjung: ri se' vhoeb khang: bang: nghoid da:.

⁹ Boo" myhu: ri abang nhang: loo sho' koid too" we' Hau: myen ri moug: boo" wa myid byu khyoo: ajo, nhang:

¹⁰ Hau: myen ri yau: khi" yo' kougshu: wa shid re" Ngoo ri khu: thu kaid yoomo hau: myen ri nheing" we'.

¹¹ Ngoo gi nga" myhi' da" ung: khoug: moo nghoid nghoid ngoo khu: re" uri nyang: nghoid nghoid said pyam ziri vho:

¹² Nga" myhi' gi ciwim yoomo ngoo ri nya: poid lug tho' moo vu ci: lug la" Ngoo ri ciwim yoomo nya: noug" jhug" la"

¹³ Hau: uri ngoo shid: byug nghoid rigi akhid" ngoo dougno: nyid wigi

¹⁴ Goonham' mo khokham khoo" joem ri doem zhug to" da" Khokham yi yo' mung" vhoeb zoug: yi yhang: ti" yo" yhoeb jo, wa bye:.

¹⁵ Hau: thang: ngoo gi nyangnu" nya: yhoem: moo sheing: yo' ngei joem byeung" sho' kaid pyeing too" kho' boem da" Khokham nu" yi yhang: ti" anghoid lang"

¹⁶ Byu shid: khu: re" da" zooshang: yhang: ti" yo" yhoeb jo, wa bye:.

¹⁷ Loeb khoug: mo akhyeing" da" bang: gi nyangnu" da" akhyeing" moo" ri theing: pyam wigi Moo" zei: zoo: bang: gi lo" thang moo dougno: zi shoug" yu ago".

¹⁸ Thung: loung" bang: lang" nyho: yoid wigi amyen akhyoid amyeing" byid: jang" mo loid byoin' wigi Yug yoo myenjham" ziri shoug" kham zo: ago".

¹⁹ Myeing gyi: bang: yo' hang" wigi we' asi' bang: yugkhang" moo" gi houg moo ju" nyid ago" Houg: lho: join yigi lo" thang moo loid byoin ago".

²⁰ Xangsu: byu yiri ciwim yoomo nheig koug nheig ngi xo' dei nyid nhang: la" Koug shu: nyid bang: ri ciwim yoomo bidbang ri byid: nyid lug la".

²¹ Nyangnu" gi shid: ziri lang" nyid nghoid loug we' houg: zigi khanham we' aju" loo nghoid da:. Nyangnu" gi phoug" dab da" jonu" ja: khang" moo" tho' shid: wa ziri je vho: ago".

²² Nyangnu" gi shid: byug wigi myhoeb pyam zi ashau" shoug" gi ngei pyoo: zi ashoug" wa nghoid da:.

²³ Mangsoo gi nyangnu" da" ju" loo wa ayo, ri shoung: to" wigi Nyangnu" ri shoid khang" moo" khyo" nyham" jhab' to" da:.

²⁴ Ngoo gi zoo: shug wa gungthid koug ngau nyid wigi Nookyeing" kyeing" zi khanham we' atheing: nghoid da:.

²⁵ Ngoo gyoug wigi myid ci' zi ja: khang" moo" gi jo, bue" lo abye:.

²⁶ Ngoo mo yug yo myenjham" zi ashau" dougno: zi ajo, Houg: lho: nga" yau: khi" gi khanham we' athang agoin loo" nghoid da:.