Pang Shug 18 - Lacid Common Language Bible

Babelon Voomoo" Byo, Yoin" lo" Khyoo:

¹ Hau: thang: ri moug: khung: mo gyoo" lo da" mouglagyoo: gootu: ri ngoo myang. Nyang: gi gyi: thang da" amyeing" yoem: so' ci: lho nya: phung yoeb, gi mougmyid gyab, goin" moo doug bang to".

² Nyang: gi thui: zeing yo' tid zigi nyang: gi byo, yoin" loo" bye:- Babelon voomoo" gi byo, yoin" loo" bye- byo, yoin" loo" bye- nyang: rigiakhuid" main: yu joem yo' mi: byoo joem wigi byo" too" zi shau" su:- aco' jhoid khyoo: aja: ja: yo' ngho' ngheing" joem da" nyid jang: nghoid.

³ Khasu" wim ga: ri Nya da" soem" lid' moo" ein: da" zabyid yhid: yo' byumyu" ja: khang: moo" ri yed, leung loo" nhang: bye. Moug: myid tho' mo khokham" yi we' Nyang: yo' dage" soem" lid' sho: moozoo" ri zei: yoomo mougmyid tho' mo phaga byu yi gi sathi" byue" lo boem bye.

⁴ Hau: thang: ri moug: khung: tho' mo thui: gootu: ri ngoo shau" gyo:- Hau: da" thui: gi " Thu' re" boem ge' nga" da" byumyu" yi we"- nya: jang" mo phang: thu' loo" ge' nyang: yo' dage" yooboo akoid nyid loo: goo"- nyang: yo' dage" yoobo dam ri akham' zo: nyid loo: goo".

⁵ Khasu" wim gari nya: da" yooboo gi moug: khung: myhi: sho' myhang: jo, wigi Mangsoo gi nya: da" akhyeing" ashoeb khyoo: joem ri myid boin: nyid.

⁶ Nanu" gi nyang: koid yhang: ti"- nyang: ri latoo: doem phug byid: ge'. nyang: nanu" ri koid da" tho' moo eig zhang latoo: doem, phug ge'. nanu" ri jhug wa shid re" goem, moo nyang: eig zhang lung: byid: ge'.

⁷ Nyang: gi nya: gung ri koid yu da" myonhoo: phung" yoeb, yo' gung shoo" pyo: khyoo: rishau" kham, zo: nyid ziyo' dakhyoo" ti"- nyang: ri koug shu: myid' myoo: ung: loug ziyo' sho" jhen: zi shau" nhang: ge'. Khasu" wim gari nyang: gi " Ngoo gi Khokham" myhi, nghoid- cougmoo" myhi, anghoid- ngoo gi khanham we' nheig koug nheig shu: khyoo:- shau" wa zi a nghoid, ga: wigi nya: gung ri nyang: tid yu nyid da.

⁸ He: khyoo: yoomo danyid" da" bidnyid moo nyang: gi no zi phyo" ziyo' nheig koug nheig shu: ziyo' zooyoid phang" khoug shau" da" shid: gyoin, joem gi nya: tho' moo ju" gyo" loo wam: bye.Nyang: gi myi: yo' nghe, pyam zi shau" wa zi nghoid- Khasu" wim gari nyang: ri dang: phyed' su: Aseing: Mangsoo gi yoem: moo" phung" yoeb, boo su: nghoid, , ga: tid nyid.

⁹ Nyang: yo' aved, avhu" koid go" lho: nyam, da" moug: myid Khokham" yi gi nyang: ringhe, jhoem" nyid da" myikhoug" rimyang lang" hau" voomo" shid re" ngau, yu: yen" boem wa zi nghoid.

¹⁰ Nyangnu" gi nyang kham, zo: nyid da" dam, ri myang lang" gyoug dain yoomo vi" vi" moo yab, jo, boem lho: nyangnu" tid boem zigi " Apho" apho"- ce: byo" lha". myo, nhoo bo ziyo' gyi: thangda" Babelon we"- joem: loo" bye: nhung: lha". dana: yi: khoug: moo za: yoobo dam, kaid' zi shau" bye: nhung: ga: tid nyid boem wa nghoid.

¹¹ Moug: myid tho' mo phaga byu yi we' nya: shid re" koug ngau nyid ago.Khasu" wim gari nyangnu" da" zi yoo joem riqei yu wa byu hang" we' anyid boem loo: yoomo nghoid ago".

¹² Nyangnu" da" phaga zi joem gi hang" we' aqei boem loo- ngei sheing: lug nyoug lug sen" Palhe" yo' zoin: yung: pain" joem- jid: moo" pain" tung: sang" khyeing: bo da" pain" joem- yen: yen: ne, young" da" pain" joem- phoug" dab, da" seig- gyid: ni joto' yo' lug phyu:- xang: zei yo' koid da" zi aja: ja-

¹³ Seig cang" phyeig - zooxoin" moo kaid' da" nam, pyo: zi aja: ja:- moo" ra:- lo" bain- zabyid yhid: yo' xu: joem- sung: soo: phei" yo' sung: soo: cen:- Nukyung yang kyung myang: kyung yo' myang: rheing" joem- join yi yo' byu yi da" kangso lang" bo boem ago".

¹⁴ Phaga byu yi nyang: ri tid zigi " Hau: da" voomoo" zeing ri nang vho: ngei kang: lung bu nyid da- phoug" dab, ziyoo joem gi ajo, loo- soid' gain ziyoo myonhoo: ngeilang: joem we' bei: lo" byug boem bye- hau: da" ziyoo soid' gain joem ri nang thang: phyang" doem shug" vhoo, loo: wa zi anghoid,, ga: tid boem.

¹⁵ Hau: voomoo" moo phaga koid lho: sathi" bue" lo da" phaga byu yi gi nyang: kham, zo da" yau: khe" jamjau dam, ri bo loin, zoo: wa gyoug yoomo vi" vi: moo dayab, jo. boem wa. Nyangnu" koug ngau zoore" tid zigi

¹⁶ Vha"- vha" gyi: thang da" voomoo" zeing we"- Jid: moo" pain" yung"- zoin: yung" yo' yen: yen: ne, da" pain"- byimi ri void ci lho: ngei sheing: lug nyoug Palhe" yo' lhoo, yhoung ci: da" gyi: sheung: voomoo" zeing gi joem: loo" bye: nhung.

¹⁷ Nyang: moo yo" da" ziyoo soid gain' gi dana: yi akhoug: moo joem: thang pyam' bye: nhung: lha". Gyid sang phoo koin" da" vhu" jhung: yi yo' gyung: soo" mo, dangain" we' vi" vi: moo yab, jo, lho:

¹⁸ Hau: da" voomoo" nge" joem: lo" da" myiyham: doem' mo myikhoug" joem ri myang lang" gi nyangnu" gi" Khanham nghoid loug we' he: voomoo" ti" gyi: sheung: thang da" voomoo" riamyang yu" boem, shi"- ga: wigi nyho: yoid tid nyid boem.

¹⁹ Nyang: nu" gi nyangnu" nya: vhuloem moo phei" lhoug: joem ri geug shoin" ci: lho: " Vha"- vha"- Panglai gu: da" sang phoo zeing mo sathi" yi ri yoo" nhang: di nhang: lo da" voomoo" zeing gi dana: yi: da" akhoug: moo za: joem: loo" thang loo" bye: nhung: lha"» ga: koug ngau nyid boem.

²⁰ Moug: khung: moug: di we"- hau voomoo" byo, yoin" pyam' bye: yoomo gau, yi nyid loo: ge'. Mangso byu yi yo' lagyoo: yi, lapi: yi we"- gau, yi nyid ge' Khasu" wim gari Mangsoo gi nanu" ri nyang: koid lid lo ziyo' dakhyoo" ti"- hau: voomoo" ri yoobo dam, kaid' bye.

²¹ Hau: thang: moo yoem: moo" bo da" moug: lagyoo: dayug gi gyi: da" lug lheing: zeing yhi' bo da" lug daloem: ri yu lho: panglai gyid thoem" moo du" zei, kaid' wigi " Babelon voomoo" gi hid: yhang: ti" du" khyo' kaid' zi shau" wa nghoid lho: thang: phyang" hau: voomoo" ri khanham we' doem myang loo: wa zi anghoid- ga: tid.

²² Nya: jang" mo teing thui: yo' byu thui:- khoo" lhang thui: yo' laboo" thui: ri khanham we' doem, shaug" gyoo: loo wa zi anghoid. Nang moo ce" lo, moo" zei: mo, khanham we' adoem myang loo wa lug lheing: gyeig thui: ri khanham we' doem, shaug" gyoo: loo: wa zi anghoid.

²³ Nang moo khanham we' myibung bang ziri shau" myang loo: wa zi anghoid.myhi, seig yo' phoo seig yi thui: ri we' khanham we' ashaug" gyoo: loo: wa Re" da" phaga byu yi gi mougmyid gyab, goin" jang" moo Pa: va: bo thang mo, bue" lo lho: nanu" da" mhau' fain" goem phain" maintain: yo' nanu" gi moug: myid byu yi dangain" ri khyoo: shu" vhang: pyam boem bye.

²⁴ Babelon gi yoobo dam, kaid' ziri shau" khyoo: gi khasu" wim gari hau: voo, moo- lapi: yi yo' Mangso byu yi da" suid"- moug: myed tho' moo said' pyam' zi shau" moo shug" mo, da" suid" joem ri houg: moo shau" myang yoomo nghoid nyid.