Pang Shug 12 - Lacid Common Language Bible

Myi: Yi: Myhi, Yo' Main Jung: Zeing

¹ Hau: thang: ri moug: laid' phyoo" moo mau" pho" da" aved alhoo: zeing daja: doem, bue" thu' loo ziri ngoo myang- houg: moo myi: yi: myhi, dayug gi-Bid' ri gang" ci: lho: lham" moo" tho' moo nang: zeug ci: wigi kyi: daxe: eig cab, dab, da" bidmug ri zhoung" ci.

² Nyang: gi gung led: ci: zi nghoid yoomo amyang" ri khu: loo wa shid re" zookhu: noo, no ngau nyid.

³ Hau: lho: moug: laid' phyoo" mo mau" pho" khyoo: daja: gi bidmug rizhoung" ci: da" vhuloem nyhed loem: dab, lho: khyoug: daxi: khyoug: youg da" main, jung: ni, zeing dadu: thu' lo.

⁴ Nyang: gimoug: laid' phyoo" mo kyi: joem- soem" boem mo daboem ri nya: da" myi: yhang yo' shoem" yu lho: myid' jang: tho' khyoo: du" khyo' kaid.

⁵ Hau: myi: yi myhi, gi byumyu" yi bain' sho' bang: tho' moo joto' lham: dung: yo' vhoeb, khang" wa da" yug gi zoo: ri khu: kaid. Nghoid loug we' hau" zoonu" gi Mangsoo yo' nya: zhung: tang khyoo: lhoid shu" lo" zi shau.

⁶ Myi: yi: myhi, gi nya: shid re" Mangso wigi nyheung too" byid: da" dain" pyoid yoo khyoo: phang: yhe: lo" lho: hau: joyoo moo bidnyid 1260 nyid" ju" sho' nyang: ri coung" goem, zho' jhoug zi shau" nyid.

⁷ Hau: thang: ri moug: khung: moomeing: zain: go" lo- Mikhaela yo' nya: moug: lagyoo: yi gi main, jung: ni, zeing ri zain: nyid. Main, jung: zeing we'-nya: shoid mo nya: lagyoo: yi yo' doem, tau" zain: lo.

⁸ Nghoid loug we' main, jung: ni, zeing gi gyi zain: soem" loo" yoomo nyang: yo' nya: da" lagyoo: yi gi moug: khung: moo ashau" nyid boem loo.

⁹ Moug: myid gyab, goin" zirishu" mhau' fain" vo, nyid su- main: yu- anghoid lang" satan: ga: myeing yoo" su- goonham, mo main, jung: ni, zeing ri nya: moug: lagyoo: yi dangain" yo" dage" myid jang: tho' khyoo: du" khyo' kaid' zi shau" abye:.

¹⁰ Hau: thang: ri moug: khung: mo thui: zeing yo' tid nyid zigi " Akhid" Mangso khyoid yu khyoo: ju" ri" bye- Akhid" Mangsoo gi Khokham" yoem: so' ritoin" shid' bye- Akhid" nya:Meshia gi nya: amyeing" akhang" ri toin" shid' abye:- Khasu" wim gari ngoonu" da" mang: nhung" yi yo' ngoonu' da" Mangso shid' khoin" moo yab, jo, lho: nyid" ri nyen" ri yooboo foin: pyi: sho: nyid su: gi moug: khung: mo khaid khyo, pyam zi shau" bye.

¹¹ Ngoonu" da" mang nhung" yi gi yang nu" da" suid" mo we' nyang: nya: kho" kyo" da" deingmain" mungdang: yoomo we' satan: ri oung: pyam' bye. Xo, lho: wigi houg: bang: gi shid: kham jang" moo ju" sho' nyang: nya: da" kang: so' ri vhoo" abyid boem nghoid ago".

¹² Houg: yoomo nang moug: khung: yo' houg: moo nyid bang: dangain" gi gau yi nyid loo: ge'. Nghoid loug myid jang: yo' nam mug dara koem gi gyoug dain' nyid loo: ge'. Khasu" wim gari main: yu gi nya: da" bidnyid dajhi' za: date: deing lo: ziri se' yoomo nheig khoo" yo: ziyo' nanu" jhang khyoo: ju" gyo" loo bye-,, ga: tid ziri ngoo shau" gyo:- ga: tid.

¹³ Main jung: ni, zeing gi nyang: ri myid jang: tho' khyoo: khaid khyo' kaid ziri si lang" nyang gi yug gi zoo: khu: loo wa da" myi: yi: myhi, ri cang khaid myheug yen" bye.

¹⁴ Hau: myi: yi myhi, gi main jung ni, zeung da" gyi mo loid byoin, loo" sho' soem" zain dakhyam" zung" lhug coung: goem zi shau" wa da" dain" pyoid yoo mo wigi Nya: joyoo khyoo: yo" dang: loo" wa shid re" zoin, bung: zeung da" dung eig khyab, nyang: ri byid: to" zi shau".

¹⁵ Houg: lang" main jung: ni, zeing gi hau" myi: yi myhi, ri myu: loo" nhang: wa shid re" myi: yi myhi, jhang khyoo: nya: da" nhoid khoug: mo tigyid' ri shi, thu kaid.

¹⁶ Nghoid loug we' mougmyid gi nya: nhoid ri fo, kham: kaid' lho: main jung: ni, zeung da" nhoid mo thu' lo da" gyid ri myhau: pyam' khyo" wigi myi: yi myhi, ri pang" thoug yu bye.

¹⁷ Houg: lang" main jung: ni, zeing ginheig khoo" yo:' wigi myi: yi myhi, yo' hau: youg da" amyed ashen, yi ga: da" Mangso amyeing" dang: yo' Yesu khyo" pang shug to" da"-deingmain" da" khyoo: moo loem" jeung" tam" gyo: lho: cang loo" mo, ri gyi khaid wa shid re" thu' loo" khari" bye.

¹⁸ Hau: lho: main jung: ni, zeing gi panglai gyid yam, mooyab, jo.