NEHEMIA 7 - Lacid Common Language Bible

¹ Houg: lho: akhid" vang doem bain zhug pyam lho: khoem" moo" joem we' nya: joyoo moo nyang: yo" tab too" bye:. Houg: lho: Noku Yhoem: Moo" zung" bang: gyeung" shang: thui: joeb jihkoin" phung: moo bo boo bang: yo' gootu: Levi byu ri nyang: yug nya: moo" moo khyen: sain' too" bye:.

² Ngoo gi Yerusalem ri vhoeb wa shid re" byu eig yug ri khyen: too" bye:. Nya: eig yug gi nga" nhung" Hanani yo' gyigoo zung: vhoeb da" zoug: Hanania tang: nghoid ago". Hanania gi loem ge" da" byu nghoid lho: Mangsoo ri gyoug phoug" da" yug- hang" yo' we' ayo" tu' sho' ge yug nghoid da:.

³ Ngoo gi nya: eig yug ri hidsu" ein: pyeing: too" bye:. Yerusalem voomoo" khoem" moo" ri nab soin: bid axain" shi" yo, ju" sho' aphang wa shid re" yo' bidvang zoo" moo khoem" zung" bang: moo" mo aphang: byoo shi" ri khoem" moo" joem myhid" lho: khoem" kyang joem kyang too" wa shid re" tid too" bye:. Ngoo gi nya: eig yug ri Yerusalem moo nyid da" byu yi mo khyen: yu wigi voomoo" zung" bang: ri khyen: to" too" wa shid re" houg bang: mo dayham" gu: ri gooki' lid yhouggyen: joyoo cang nyid: to" lho: gooji gu: rigi nyangnu" nya: yhoem: aqei: ayam moo so" yen" lho: jooyu" yen" wa shid re" tid too" bye:.

Pyoung" She: Loo" Shau" Jang" Mo Doem Tau" Loo Bang: da" Zhayhen"

⁴ Yerusalem gi gyi: da" voomoo" daloem: nghoid da:. Nghoid loug we' houg moo byu myoo: sho' anyid nghoid ago". Houg: lho: yhoem: myoo: sho' azhug too" shi" nghoid da:.

⁵ Mangsoo gi mung" byu yi yo' nyangnu" da" vhujhung: yi gyizoug: yiri khe: zheing" lho: nyangnu" da" yhoemkhung: lhid" xoem" joem ri joeb yu" wa shid re" ngoo ri jhoin" byid: da:. Ngoo gi pyoung" she: loo" shoug" jang" mo xang: shi" doem tau" loo bang: da" lhid" xoem" zhayhen" ri sho: wigi he: gu: ri shoug" sho: myang yu bye:.

⁶ Pyoung" she: loo" shoug" bang: myoo" sho' gi Babelon mung" du mo thu lo wigi Yerusalem yo' Yuda mung" nyang: yug nya: voogung khyoo: doem tau" lo ago". Nyangnu" yhoemkhung: byu yigi khokham Nebukhadneza wigi nyangnu" ri thung: byu yi khyo" shu" lo" da" ayo, mo Babelon moo pyoung" she: loo" shoug" ziyo' dakhyo" nyid lid lo ago".

⁷ Nyangnu" da" vhujhung: yigi Zerubabela- Yoshu- Nehemia- Azaria- Ramia- Nahamani- Modekhai- Bilshan- Mispered- Bigvai- Nehum yo' Bana bang: nghoid ago".

^8-25 He: gu: gi pyoung" she: loo" shoug" jang" moo doem tau" lo da" Israela kung: yi yo' nyangnu" kung: khang" moo" moo boo mo da" byu zhayhen" nghoid da:. Parosha - 2,172 Shephatia - 372 Ara - 652 Pahad Moba (Yoshu yo' Yoba da" amyed ashen yi) - 2,818 Elam - 1,254 Zatu - 845 Zakai - 760 Binui - 648 Bebai - 628 Azgad - 2,322 Adonikam - 667 Bigvai - 2,067 Adin - 655 Atera (Hezekia ga: we' myheing da:) - 98 Hashum - 328 Bezai - 324 Harib - 112 Gibeon - 95

^26-38 Vhoo: moo bo da" voogung joem mo nyid lid lo mo da" phoug" phyid" yi we' doem tau" lo ago". Bedlehem yo' Netopha - 188 Anathod - 128 Bed Azmaved - 42 Kiriad Yearim- Khephira yo' Berod - 743 Rama yo' Geba - 621 Mikmasha - 122 Bethela yo' Ai - 123 Gootu: Nebo - 52 Gootu: Elam - 1254 Harim - 320 Yerikho - 345 Lod- Hadid yo' Ono - 721 Sena - 3930

^39-42 He: gu: gi pyoung" she: lo" jang" mo doem tau" lo da" khainjung kung: joem da" zhayhen" nghoid da:. Yedaia (Yeshua da" amyed ashen yi) - 973 Imera - 1052 Pashura - 1247 Harim - 1,017

^43-45 Pyoung" she: lo" jang" mo doem tau" lo da" Levi kung: bang: gi Yeshua yo' Kadmiela (Hodavia da" amyed ashen yi - 74 Noku Yhoem: Moo" music phung: (Asab da" amyed ashen yi) - 148 Noku Yhoem: Moo" zung" bang: (Shalum- Atera- Talamon- Akub- Hatita yo' Shobai da" amyed ashen yi) - 138 nghoid ago".

^46-56 Phung" she: lo" jang" mo doem tau" lo da" Noku Yhoem: Moo" mo moo" zei: bang: da" akung: yigi Ziha- Hasupha- Tabaod- Kero- Siaha- Padon- Lebana- Hagaba- Shalmai- Hanan- Gidela- Gahara- Reaia- Rezin- Nekoda- Gazam- Uza- Pasea- Besai- Meunim- Nephushesim- Bakbud- Hakupha- Harhura- Bazlid- Mehida- Harsha- Barko- Sisera- Tema- Nezia yo' Hatipha bang: nghoid ago".

^57-59 Pyoung" she: lo" jang" mo doem tau" lo da" Sholumon da" dei zoo: kung: bang:- Sotai- Sophered- Perida Yala- Darkon- Gidela- Shephatia- Hatila- Pokherid- Hazebim yo' Amon- kung: bang: nghoid ago".

⁶⁰ Pyoung" she lo" jang" mo doem tau" lo da" Noku Yhoem: Moo" mo moo" zei: mo, da" amyed ashen yi yo' Sholumon da" dei zoo: yi zhayhen" gi 392 yug nghoid da:.

^61-62 Tela Mela voogung- Tela Harsha voogung- Kherub voogung- Adon voogung yo' Imera voogung mo doem tau" lo da" Delaia- Tobia yo' Nekoda kung: moo bo boo nghoid loug we'. Israela amyed ashen yi nghoid gu: nyangnu" nyang: sagse: ayo" ci: shug mo gi 642 yug nghoid ago".

^63-64 Vhoo: moo bo da" khainjung kung: bang: gi nyangnu" nya: phoug" phyid" byuxeig ri sagse: khyo" alhid" xoem" too" nghoid ago". Hobaia- Hakoza- Barzilai kung: bang: nghoid ago". (Khainjung Barzilai kung: mo phoug" phyid" dayug gi Gilead mo Barzilai kung: mo myiyi: dayug ri lo, xo' yu yoomo nya: yug pho myeing ri yu da:.). Nyangnu" gi nyangnu" da" phoug" phyid" hang" hang" nghoid ziri sagse: ayo" ci: shug byid: yoomo nyangnu" ri khainjung yi khyo" akhab yu loo.

⁶⁵ Yuda mung" zoug: yigi khainjung dayug yug wigi Urim yo' Thumin ayu" yu" gi Mangsoo ri ngei" byid: da" zoo: noem ri nyangnu" age zoo: goo" wa ga: nyangnu" ri tid da:.

^66-69 Pyoung" she: lo" jang" mo doem tau" lo da" bang: dangain" gi 42,360. Nyangnu" da" dei zoo: yuggi yi yo' myiyi: yigi - 7,337 Music phung: mo yuggi yi yo' myiyi: yigi - 245 Myang: joem - 736 Loo kung" joem - 245 Gola-ug joem - 435 Loo zei: joem - 6720 du: nghoid da:.

^70-72 Byu myoo" sho' bang: gi Noku Yhoem: Moo" ri doem nyheing koid jang" moo gyoo" eung: da" aphoug" ri bo kaid ago". Mung" zoug: yi Sheing: 4 joid: jain". Jarung: 50 loem. Khainjung Byisheing: 530 khyab Byumyu" kung: vhujhung: yi Sheing: 92 joid: jain" Ngei 884 joid: jain" Deing da" mung" byu yi Sheing: 92 joid: jain" Ngei 803 joid: jain" Khainjung byisheing: 67 khyab bo kaid ago".

⁷³ Khainjung yi Levi byu yi Noku Yhoem: Moo" zung" bang:- music phung:- Mung" byu myoo" sho' bang:- Noku Yhoem: Moo" moo moo" zei: bang:- he: Israela byumyu" dangain" gi Yuda mung" voogung joem yo' voomoo" joem moo de: nyid boem ago".