NEHEMIA 13 - Lacid Common Language Bible

Tungbau Byumyu" yi mo Kho' To" da" Khyoo:

¹ Mung" byu yiri thui: zeing khyo" Moshe da" tarha" ri nghab kyo" uri nyangnu" gi Amon byumyu" nghoid nghoid Moba byumyu" nghoid nghoid hang" dayug we' Mangso da" byumyu" yi khoug: khyoo: ayo" vang yhi wa ga: da" du moo nghab ju" lo ago".

² He: zigi Israela byumyu" yi Egutu mo thu lo da" khyoo: mo nyangnu" ri Amon yo' Moba byumyu" yi wigi zoo: noem yo' shug gyid abyid: yoomo nghoid da:. Hau: gungthid nyangnu" gi Israela byumyu" yiri nheing" khoin" yhe: kaid nhang: wa shid re" Balam ri ngei byid: ago". Nghoid loug we' ngoonu" da" Mangsoo gi nheing" khoin" ri mainkaid jeju" khyoo: phug pyam byid: da:.

³ He: tarha" ri nghab kyo" ziri Israela byumyu" yi shoug" gyoo: lang" nyangnu" gi tungbau byu dangain" ri hau: byu phung: gung mo khaid thu pyam ago".

Nehemia wigi Doem Nyheing Pyam Khyoo:

⁴ Noku Yhoem: Moo" mo zi too" yab joem ri yu" coung: yug khainjung Eliashab gi ayo, gye" myang" mo Tobia yo' zoem" khau: nyid da:.

⁵ Nyang: gi ngei" byid: da" shivoo: nam pyo: xu:- Noku Yhoem: Moo" moo ci: da" zi joem khainjung yi shid re" xoin"- Levi byu yi Noku Yhoem: Moo" mo music phung: yo' Noku Yhoem: Moo" zung" bang: ri byid: to" da" shivoo:- zabyid yhid: yo' zhainloin: xu: daxi: boem mo daboem ri ze: shoung: too" wa shid re" yab zeing ri ci: wa shid re" Tobia ri akhang" byid: da:.

⁶ Hid su" xo' bue" nyid uri ngoo gi Yerusalem moo anyid eung:. Ciwim gari Babelon moo Artaxaxe khokham bue" zi soem" xe: eig zain ein: zain ri ngoo gi nya: jhang lu dang: lo" kyoo" wa shid re" doem tau" loo" bye:. Dayo, zoo: myang" thang: ri ngoo gi nya: jang" mo akhang" doem yo" yu ci: lho:

⁷ Yerusalem khyoo: doem tau" lo da:. Houg moo Eliashab wigi Tobia ri Noku Yhoem: Moo" mo yab da yab ri ci: nhang: to" ziri lo myang wigi mau" pyam da:.

⁸ Ngoo gi nheig joem: yo: lho: Tobia da" jonu" dangain" ri tunggung khyoo: she: lhei" pyam byid: bye:.

⁹ Ngoo gi hau: yab ri laloem: lakhoug: thung" khyo" kyeing sain' pyam wa amyeing" byid: lho: Noku Yhoem: Moo" moo ci: da" zi joem shivoo: xoin" joem yo' nam pyo: xu: joem ri doem kaid too" nhang: bye:.

¹⁰ Noku Yhoem: Moo" mo music phung: yo' gootu: Levi byu yigi mung" byu yi wigi nyangnu" ri yo" zo: nyid wa yhi' abyid: boem yoomo Yerusalem mo thu lo" lho: nyangnu" nya: yoo khyoo: doem tau" phang: lo" byug ziri lo" shoug" se' yu da:.

¹¹ Ngoo gi gyizoug: yiri Noku Yhoem: Moo" ri hougsu" she: pyam to" khyoo: ri nheig yoo: bye:. Houg: lho: ngoo gi Levi byu yi yo' music phung: ri Noku Yhoem: Moo" khyoo: doem shu" yu wigi nyangnu" ri moo" doem byid: bye:.

¹² Hau: thang: Israela byumyu" yi dangain" bang: gi Noku Yhoem: Moo" zi too" yab joem khyoo: nyangnu" da" shivoo:- zabyid yhid: yo' zhainloin: xu: daxi: boem daboem ri doem ci: re" shid" boem ago".

¹³ Ngoo gi vhoo: mo bang: ri zi to" da" yab joem yu" coung: wa shid re" sain' too" bye:. Khainjung Shelemia- tarha" si' su: Zadog yo' Levi byu Pedaia bang: nghoid ago". Matania da" myid: zoo:- Zakhura da" yuggi zoo: Hanan gi nyangnu" da" pang" thoug yug nghoid da:. Hid bang: gi nyangnu" da" moo" zei: byencang" yiri zoo: noem ci: wa zi joem ri kho' gam byid: wa shid re" loem gi" bang: nghoid ein: ngoo se' da:.

¹⁴ Nga" Mangsoo we"- Re" Noku Yhoem: Moo" yo' hau: noku coung" moo" shid re" ngoo he: gu: dangain" ri koid lid lo ziri myid boin: xoem" too" byid: la.

¹⁵ Hau: ayo, moo Yuda mung" mo mung" byu yigi Dougno: Bidnyid ri zabyid shi" joem mo ayeing pyeig nyid boem ziri ngoo shau" myang da:. Gooji dayham" gi nyangnu" da" loo zei: joem too: moo shivoo:- zabyid yhid:- zabyid shi" joem lafoem' shi" joem yo' goo" ja: joem ri koid: soin' tho' lho: Yerusalem khyoo: yhe: lo" boem da:. Ngoo gi nyangnu" ri Dougno: Bidnyid moo ci: we' aoung" zoo: goo" ein: tid poin" bye:.

¹⁶ Turu mo byu dayham" gi Yerusalem moo nyid ago". Houg: lho: nyangnu" gi wimdo, yo' gootu: jonu" dangain" ri Dougno: Bidnyid moo ngoonu" byumyu" yi jhang oung" byid: wa shid re" voomoo" khyoo: de" re" ago".

¹⁷ Ngoo gi Yuda vhujhung: yiri nheig yo: lho: nyangnu" ri «Nanu" koid nyid da" akhyeing" ashoeb moo" ri yu" yu" ge'. Nanu" gi Dougno: Bidnyid ri agyeing" ashang: koid nyid ago".

¹⁸ Mangso wigi he: voomoo" ri phyo' shoin' pyam lho: nanu" phoug" phyid" yiri yooboo dam byid: ziri hid: su" wim yoomo nyang: nghoid bye:. Nghoid loug we' nanu" gi Dougno: Bidnyid ri phung youg sho' koid lho: Israela byumyu" yi dang moo Mangso da" nheig yo: zi je gyo" zang" nhang: wa khyo" jhen" lho: koid nyid ago"» ein: tid bye:.

¹⁹ Houg: yoomo ngoo ri Dougno: Bidnyid ju" loo khang" myen" thang: bidvang yo, voomoo" khoem" joem ri myhid" pyam lho: Dougno: Bidnyid lid sho' adoem phang wa shid re" amyeing" byid: too" bye:. Dougno: Bidnyid moo voomoo" khoug: khyoo: ci: daja: we' ade" vang zi nghoid anghoid si' wa shid re" nga" byu dayham" ri hau: khoem" moo" joem cang zung" nhang: too" bye:.

²⁰ Kid" zi aja: ja: oung" zo: da" phaga: byu yigi damyen eig myen koo: wim: nyid" nyid" myen" ri voomoo" tunggung shoid moo yhoeb ago".

²¹ Ngoo gi nyangnu" ri «Houg moo moug: boo" sho' lang" loug ce: akyu" aboo goo" wa lhid"- nanu" hidsu" doem koid nghoid rigi ngoo nanu" ri shoug" khaid thu wa» ein: tid poin" bye:. Hau: ayo, mo gi Dougno: Bidnyid ri nyangnu" adoem ri" loo nghoid ago".

²² Ngoo gi Levi byu yiri nyang: yug nya: gung ri kyeung sain' pyam lho: Dougno: Bidnyid ri gyeung" shang: nhang: wa shid re" hau: khoem" moo" joem moo yhe: zung" nhang: too" bye:. O" Mangsoo we"- he: ziri we' myid boin: lho: xoem" too" byid: la. Houg: lho: re" da" gyi: sheung: da" jheddab myid yoomo ngoo ri ashid: lho: nyid deing too" nhang: la.

²³ Hau: ayo, moo ngoo gi Yuda yuggi myoo" sho' yug gi Ashdod- Amon yo' Moba mo myiyi: yiri lo, xo' yu to" boem ziri we' shoug" se' yu bye:.

²⁴ Nyangnu" da" zooshang: yi agung dayi" mo, gi Ashdod myeing" la'- anghoid lang" daja: ja: myeing" ji wigi ngoonu" nya: myeing" ase' ji nghoid ago".

²⁵ Hau: yuggi yiri ngoo nheig yo: wigi nyangnu" dang moo nheing" khoin" khe: khyo' yu ziyo' nyangnu" ri baid- nyangnu" shoomoug" lang: phoin' pyam byid: bye:. Hau: thang: ngoo gi nyangnu" yo' nyangnu" da" zooshang: yiri khanham we' tungbau byumyu" yi yo' myi: byid: myi: yu akoid loo: wa ga: da" jham' tang: dang: ri Mangso myeing lang: wigi too" nhang: bye:.

²⁶ Ngoo gi nyangnu" ri «Khokham Sholumon ri yooboo shoid nhang: zigi tungbau myiyi: joem nghoid ago". Nyang: gi gootu: byumyu" yi da" khokham dangain" tho' je gyi: sheung: da" byu dayug nghoid lid loo bye:. Mangsoo gi nyang: ri jheddab lho: nyang: ri Israela byumyu" yi dangain" adang moo khokham bui" nhang: bye:. Nghoid loug we' nyang: gi he: yooboo khoug: khyoo: gyo" vang loo" bye:.

²⁷ Houg ri ngoonu" gi nanu" da" leig ri yu" lho: tungbau myiyi: yiri lo, xo' da" khyo" Mangso dang: ri acang yo" koid wa la"» ein: tid bye:.

²⁸ Yoiada gi khainjung moo" Eliashab da" yuggi zoo: nghoid da:. Nghoid loug we' Yoiada da" yuggi zoo: yi mo dayug gi Bed Horon voogung mo Sanbalad da" myiyi: zoo: ri lo, xo' yu da:. Houg: yoomo ngoo gi Yoiada ri Yerusalem mo phang: thu loo" nhang: bye:.

²⁹ O" Mangsoo we"- hau: byumyu" yigi khainjung aya: ri we' nang wigi khainjung yi yo' Levi byu yiri byid: to" da" dang: theing ri we' khayhi' phung" youg nhang: ago" la".

³⁰ Ngoo gi mung" byu yiri tungbau yo' sen: da" khyoo: dangain" mo kyeing shang: pyam byid: bye:. Khainjung yi yo' Levi byu yi yugkhang" moo" nyang: yug nya: moo" ri si' goo" wa shid re" cang yhi: ca" da" tarha" joem ri nyheing too" bye:.

³¹ Nya: ayo, yo' ayo, moo ci: ri" ca" da" xoin" joem ri nghe' ngei" wa shid re" nghi' wa thang" ri soin' to" wigi mung" byu yi xoin" khyo" shivoo amoin" yo' xang: shi" zei: da" shi" joem ci: ri" wa tarha" joem ri nyheing byid: bye:. O" Mangsoo we"- he: joem dangain" ri myid boin: byid: la. Houg: lho: ngoo ri hau: moo" zei: su: dayug khyo" too" la.