MATHE 8 - Lacid Common Language Bible

Manggam: Noo Ri: Ge Loo" Nhang: Da" Khyoo:

¹ Akhid" hau: boem tho' mo doem gyoo" loo lang" Byu ajoem ayoo nya: thang: moo cang lo boem.

² Houg: lang" yu" ge'. manggam: noo dab, su: dayug ju" re" wigi Yesu ri re" pid lho: «Aseing we"- nang nau nghoid rigi ngoori he: noo phyoo" mo ge loo" nhang: wa nghoid» ga: re" tid.

³ Nyang: gi lo, tu: lho: nyang: ri zang" tain" wigi «ngoo nau- ge san loo" we'» ga: tid. Houg: lang" hau: youg da" manggam: noo gi ge lo" byug bye.

⁴ Houg: lang" Yesu gi «he: khyoo: hang" ri we' atid kyoo"- nang thu' lo" lho: re" da" gung khainjung phoo ri lo toin" shid we' nyangnu" gi nga" da" shid re" sagsi: bui" baja"- Moshe tid to" da" xoin" lo" byid: we'» ga: tid kaid.

Roma Gyizoug: Mo" Da" Dei Dei Zooshang: Ri: Noo Ge Loo" Nhang

⁵ Akhid" Kaperna-um voogung khyoo vang lo" boem ri Roma gyizoug: moo" dayug ju" re" wigi

⁶ «Aseing we"- nga" dei dei zooshang: ajoem: shid: noo yo" wigi yhoem: moo za: daleing jo, gye thau" kyang nho: nyid» ga: re" mho' tid.

⁷ Aseing gi «nyang: ri ge loo" nhang: wa shed re" ngoo ju" re"» ga: tid.

⁸ Houg: lang" gyizoug: phoo gi «Aseing we" nga" yhoem: khoug: moo nang vang ri" wa zigi amoin yi"- re" dang: dakhoin" za: tid kaid byid: we'. Houg: lang" nga" da" zooshang: gi ge loo" wam: bye.

⁹ Khasu" wim gari ngoo we' zau vhoo mo su: nghoid. Nga" vhoo: khyoo: we' gyizoo: yi myoo" sho' nyid shi. Dayug ri loo" we' ein: ri lo"- loo we' ein: lang" gi lo. Nga" deizoo: phoo ri we' hid: koid: we' ein: ri nyang: koid: nyid» ga: tid.

¹⁰ Hau: dang: ri Yesu shau" gyoo: lang" gi nyang: gyo: mau" lho: nya: thang: cang mo, ri «nanu" ri ngoo jhug jhug tid ba- Israela amyu" moo lang" houg: yhi' loem" jeung" da" byu gi ngoo amyang yu" shi.

¹¹ Hau: lho: nanu" ri ngoo doem tid da" zigi bid thu' bidvang shoid' mo byu yi myoo" sho' mo, ju" loo wa nghoid wigi Mougkhung: mungdain: moo we' Abraham Isag Yaku yo" dage" zoo: wa shid re" shau" shoin" zung: boem wa zi nghoid.

¹² Xang: shid" mo mougkhoung: mung" byu bui" eung: mo, gi nghe: shoid' mo moug: coid' khoug: khyoo: khaid zei kaid zi shau" boem wa. Hau: jang moo ngougmyeing" sho" thui: yo,- zei yang: kyeig ga: ngaid wi zheung: yau nyid goo" wa"» ga: tid.

¹³ Yesu gi hau: gyizoug: phoo ri we' «nang loo" re'- nang loem" jeung" ziyo' dakhyoo" ti"- nang moo bui" baja"» ga: tid kaid. Hau: uri nyang- nya: zooshang: gi ge lo" byug bye.

Noophyoo" Shoug" Mo, Myoo" Sho' Ri: Ge Loo" Nhang:

¹⁴ Hau: thang: ri Yesu gi Petru da" yhoem: moo vang lo" ri Petru da" yug myhi' nooyoem" no jhang" to" zi lo" myang.

¹⁵ Nya: da" lo, moo tain" byid: lang" nuyoem" bei: ge lo" wigi nyang: gi Aseing ri zoonoem to' moo" zho.

¹⁶ Akhid" yu dab mo, myoo" sho' Aseing jang" moo zheung: shu" re" boem wigi dang: thui: yo' za: hau: yu joem ri zheung: khaid pyam' byid. Noophyoo" shau" mo, dangain" bang: ri we' ge loo" nhang kaid.

¹⁷ Hau: khyoo: gi «nya: gung nyang ngoonu" da" noophyoo" ri yu pyam' byid: wigi ngoonu" da" amyen akhyoid da" khyoo: ri voin vu, pyam' byid:» ga: Esaia tid to" dang: zung: loo baja: ga: bue" loo bye.

Aseing Yesu Da" cangzoo: Bui" Noug Mo,

¹⁸ Akhid" Yesu gi nyang: ri lheing khoem to" da" mung" byu yi ri myang lang" gyid thoem: thei tab khyoo gu loo" wa ga: nya: cangzoo: yi ri tid to.

¹⁹ Tarha" sara: dayug ju" re" wigi «sara: we" nang ju" da" joyoo khang" moo" moo ngoo we' cang loo wa» ga: re" tid.

²⁰ Yesu gi «zeigni joem gi khyung: yo" ago"- moug moo dang: yen" da" ngho' zoo: joem we' soid jo: ago" hau: byu nya: zoo: koem gi vhuloem too" jang: we' ajo,» ga: nyang: ri tid.

²¹ cangzoo: yi mo dayug we' «Aseing we" nga" pho, da" mang lo" shung: khoo, wa akhang" shi" byam byid: we'» ga: tid.

²² Yesu gi «nga" thang: cang loo we' shid: mo, gi shid: mo, nyang: cang" myhoeb go" nyid baja"» ga: tid.

Uglid Ri: Noem: Loo" Nhang: Da" Khyoo:

²³ Aseing gi lhid' khoug: khyoo vang loo" bye. cangzoo: yi we' Aseing yo" dage" cang lo" boem.

²⁴ Hau: uri gi nyeigdain tung" gyid thoem" tho' moo uglid hau, gyoo" lo wigi being: mhoid gi hau: lhid' ri doin mhoug lo" nyid. Nghoidloug Aseing gi yhoeb' pyo: jo.

²⁵ Houg: yoomo Aseing ri yhe: nhau" boem. Nyangnu" gi «Aseing we"- khyoid' yu we' o"- ngoonu" bain joem: lo" nyid boem bye» ga: coem tid boem.

²⁶ Nyang: gi «ade: loem" jeung" mo, we" ciwim gyoug nyid go" lha"» ga: nyangnu" ri gyikoid houg: lang" nyang: to' lo lho: uglid yo" being: mhoid ri gyikoid. Houg: lang" uglid yo" being: mhoid gi atho' tid loo sho' sam" tam" to.

²⁷ Bo myang mo, gi mau" fo' yoin" to" boem wigi «He: yug gi cite" byu nghoid lha". Uglid yo" being: mhoid lang" nyang: ri tam" gyo:» ga: tid go" nyid boem.

Byu Eig Youg Jhang Mo Yu Khaid' Thu' Pyam, Byid: Khyoo:

²⁸ Akhid" Yodan gyid thei: tab Gadare mung" gyoo: moo ju" lo" ri loeb boug moo re" nyid da" yu dab byu eig yug Aseing ri lhoem: tau yu. Nya: eig yug gi gye akhyeing" zi nghoid wigi hau: meing: khyoo: khyo" hang" we' avoem" led lo" boem.

²⁹ Nya: eig yug gi «Mangso da" nya: zoo we"- nga" eig yug nang yo" cisen: lha". ayo, aju" shi" ri nga" eig yug ri shen" wa ein: nang ju" re" la"» ga: wigi nyho: tid ago".

³⁰ Akhid" nyangnu" yo, gye" ve: da" joyoo moo vu, phung: zheung: boid zo: nyid ago".

³¹ Yu joem gi nyang: ri mho' yoid toung" bain: lho: «nang ngoonu" ri khaid pyam' wa nghoid rigi hau: vu, joem moo vang nhang: we'» ga: mho' boem.

³² Aseing gi «yhe: loo" ge'» ga: nyangnu" ri tid kaid. Thu' lo" lho: hau: vu, joem moo zheung: vang lo" boem wigi vu, joem gi gyid thoem" moo byam vang lo" boem wi dangain" se" shid: pyam' boem.

³³ Vu, zung" mo, koem gi hau: voogung moo phang: vang lo" boem lho: bue" lo khyoo: dangain" yo' yu dab su: eig youg khyoo: ri lo" tid kyo.

³⁴ Houg: yoomo davoo goin" mo, Yesu ri tau yu wa ga: zheung: thu' lo boem wigi Yesu yo" shau" goo" lang" nyangnu" nya: voo mo thu' loo" wa shid re" toung" pain nyid boem.