MATHE 17 - Lacid Common Language Bible

Aseing Yesu Aved' Led Lo" Da" Khyoo:

¹ Khyug nyid" koo: myang" thang: ri Yesu gi Petru Yaku yo' nya: nhung" Yohan ri khe: shu" lho"- myhang: da" boem tho' khyoo: nyangnu" kyeing" do, lo" boem.

² Nyangnu" da" shid khoin" moo Yesu da" gungdu: gi goo" zang" led loo" khare". Myonhoo: gi bid yhangti" doug bang lho: void to" da" byimi we' doug bang lo.

³ Hau: lho: cangzoo: soem" youg bang: gi Moshe yo" Elia thu' lo lho: Yesu yo" doem, go" nyid zi zheung: myang boem.

⁴ Houg: lang" Petru gi Yesu ri «Aseing we"- he: joyoo gi nyid wa ge da" houg: yoomo nang veing" rigi Re" shid re" zoem" daloem Moshe shid re" zoem" daloem:- Elia shaid re" zoem" daloem:- ngoo koid: byid: wa agi la"» ga: tid.

⁵ Petru houg: su" ga: dang: da tid nyid shi" uri gye bang da" jhoem: phyu: thei" daloem: gi nyangnu" da" tho' moo ju" gyoo" lho: hau: jhoem: phyu: thei" khoug: mo da" thui: gi «He: yug gi ngoo jheddab da" nga" zoo: nghoid. Nyang: ri ngoo gye vho: ngei su: nghoid. Nya: da" dang: ri tam" gyoo: ge"» ga: da" thui: myeing thu' lo.

⁶ Hau: da" thui: ri cangzoo: yi shau" gyoo: lang" gye" gyo: gyoug dain lho: goeb' jo, ago".

⁷ Aseing Yesu ju" lo wigi houg: bang: ri lo, wigi tain" byid: lho: «too ge" agyug goo"» ga: tid.

⁸ Nyangnu" to' tu: yu" kaid ri Aseing Yesu mo gootu: hang" dayug ri we' amyang boem loo.

⁹ Hau: thang: ri Aseing Yesu yo' nya: cangzoo: yi gi boem mo doem gyoo" lo ago". Houg: su" zheung: gyoo" lo da" uri Aseing Yesu gi «nanu" shau" myang bye: da" khyoo: joem ri Byu da" nya: zoo: shid: jang" mo doem dei to' lo da" bidnyid ju" sho' hang" ri we atid kyoo" goo"» ga: wigi cangzoo: yi ri toung: to".

¹⁰ Hau thang: ri cangzoo: yigi Tarha" sara: yigi «ciwim wigi Elia xangshid" ju" ca" ga: tid go" lha"» ga: Yesu ri zheung: myid: boem.

¹¹ Yesu gi «gyeing" nyang: Elia shi" ju" wigi bue" loo wa da" khyoo: dangain" ri soin wa zi nghoid» ga: tid.

¹² «Nanu" ri ngoo tid nau da" zigi Elia gi gyoo" loo bye. Nghoidloug we' byu yi nyang: ri asi yoomo nyang: ri cinoug cikoid lo abye: go. Houg: yo' dakhyoo" ti" Nyangnu" gi byu da" nya: zoo: ri we' Houg: bang: da" lo, moo kyi" khyeug shen" yhen zi kham: wa» ga: wigi tid.

¹³ Hau: lho: ri she- cangzoo: yi gi Yesu gi Baptisma sara: Yohan ri yeing lho: tid zi dase' gyo: ago".

Ngho, Yu Vang To" Da" Yuggi Zoo: Ri: Yesu Wi Ge Loo" Nhang

¹⁴ Aseing yo" cangzoo: yi gi byu phung: moo" yi nyid da" jang" moo ju" lang" byu dayug gi Aseing da" shid khoin" moo poid thug re" thoug lho: wigi «Aseing we"- nga" zoo: ri nheig khyeig byid: shi" we' o"-

¹⁵ nyang: gi ngho' baid baid da" noo bo wigi coid' lo" lho: myikhyoem moo we' gyid thoem" moo we' daso' so' leung vang vang wim nyid.

¹⁶ Ngoo nyang: ri re" da" cangzoo: yi jhang khyoo: khe: shu" yhi: nghoid loug we' nyangnu" gi noo gi sho' ayo" koid: nghoid ago"» ga: tid.

¹⁷ Aseing Yesu gi «nanu" gi loem" jeung" nheigloem: abo zi yo" shoid vhang: nyid boem nhung: lha". Ngoo gi nanu" yo' dage" kha: myhang ju" sho' nyid ca" la". kha: myhang ju" sho nanu" ri kham: zheung: nyid wa. Hau: zooshang: ri nga" jhang khe: shu" ri" ge'» ga: tid.

¹⁸ Aseing Yesu gi ngho' yu ri nheig yo: kaid lang" gi hau: ngho' yu gi zooshang: gung mo phang: thu' loo" bye. Houg: lang" zooshang: no zi ge loo" bye.

¹⁹ Hau: thang: ri cangzoo: yi gi Yesu jang" moo sam" zoo: yu: yhe: lho: «ngoonu" gi hau: ngho' yu ri ci: wim ayo" khaid thu' pyam lha"» ga: zheung: myid: boem.

²⁰ Aseing Yesu gi «Nanu" moo loem" jeung" nheigloem: ngi, yoomo nghoid. Ngoo deung" deung nanu" ri tid zigi nanu" moo loem" jeung" nheigloem: nghang" shi" cab yhi' koo: bo nghoid rigi He: da" boem ri he: joyoo mo zi fo: joyoo khyoo yu: loo" we' ga: tid nghoid ri yu: loo" khari" wa loem" jeung" nheigloem: bo rigi nanu" ayo" koid: wa zi ci" we ajo.

²¹ (He: ja: ngho' yu rigi Akyu mho' da" ziyo' zoonoem zeung: khyo" za: date: yo" khaid thu' ga: jhoug" byid.) ‹Loem ge" da" lo, wigi lhid" to" da Jhoem: mougsoug" xoug" myoo" sho' moo he: da" abeing: zoo: gi aboo.

Yesu Gi: Said Kham: Wa Khyoo: Yo" Doem Dei Loo Wa Khyoo: Tid Lhoem: To" Da" Zi

²² Yesu da" cangzoo: yi gi Galile meing: moo doem shau" go" uri Aseing Yesu nyangnu" ri tid da" zigi «Byu nya: zoo: gi su" be" da" lo, moo said pyam zi shau" wa nghoid.

²³ Nyang: ri said pyam goo" wa hau: thang: ri soem" nyid byeung" loo lang" Byu nya: zoo: gi shid: jang" mo doem dei to'' loo wa» ga: tid. Nya: cangzoo: yi we nheigloem: gye" agyo: pyo: boem loo.

Kyu" Mho' Yhoem: Moo" Da" Kheing" Kaid Khyoo:

²⁴ Yesu yo" cangzoo: yi gi Kaperna-um voo moo ju" lo" da" uri Kyu" mho' yhoem: mo" shid re" kheing" khyu: mo ju" re" boem wigi Petru ri «re" sara: phoo gi-Kyu" mho' yhoem: mo" shid re" kheing" gi kaid nyid la"» ga: re" zheung: myid: boem.

²⁵ Petru gi «kaid nyid» ga: tid. Petru yhoem: khoug: khyoo vang loo" lang" Yesu xangshid" tid zigi «Simon we" nang khasu" myang nyid Mougmyid khokham" yi gi akhoin: kheing" hang" jang" mo khyu: yu nyid ago" lha". Nyangnu" da" nya: zoo: yi jang" mo khyu: yu la". houg: su" anghoid lang" gi gootu: da" byu yi jang" mo nghoid la".»

²⁶ Petru gi «gootu: byu yi jang" mo lhung khyu: yu ago"» ga: tid. Houg: lang" Yesu gi «houg: su" nghoid lang" gi nya: myid nya: zoo: yi gi kheing" khyu: jang" mo loid byoin da" akhang" yo" boem.

²⁷ Houg: su" nghoid loug we' nyangnu" da" nheigloem: moo anoo nhang: wa da" shid re" Nanu" gi gyid thoem" khyoo yhe: lho: ngoo: myhed' ge'. Xang: shid" shau" myhed' yu da" ngoo: ri nhoid' lang: fo, yu" ge" Dingga" ngei dakyab' ri shau" yu goo" wa. Hau: da" ngei ri yu lho: nang nyang: yo" nga" shid re" houg: bang: ri byid: pyam we'» ga: tid.