MATHE 13 - Lacid Common Language Bible

Myoug: Shi" Sain" Su: Da" Dangtu'

¹ Hau: bidnyid moo Yesu gi hau: yhoem: mo thu' lo" lho: gyid thoem" yam moo jhoug" byid: wa shed re" zhoung: jo.

² Hau: uri gye" myo: da" byu phung: moo" zeing gi houg: lang" Aseing ri lheing khoem phoung foem: loo yoomo nyang: gi lhid' khoug: moo yhe: vang zhoung: jo. Hau: byu phung: moo" gi gyid nung" yam moo yab jo, ago".

³ Hau: uri dangtu' myoo" sho khyo" khyoo: myoo" sho' jhoug" byid: da" zigi «shid phyang" byu dayug gi myoug: shi" sain" wa shed re" thu' lo.

⁴ Ashi" ri sain" kaid da" uri dayham" gi khyoo: gung moo gyoo" loo" yoomo ngho' joem gi hau: ashi" ri koid: zo: pyam.

⁵ Ashi" dayham" gi myid zhoo" athu: da" lug phoug tho' moo gyoo" lo" lho: myid zhoo" poo" yoomo myab, myab, youg re.

⁶ Nghoidloug we' bid zho: nge" loo lang" gi agyi: no, sho' ayo" cen, yoomo nyhau" kyoug shid: lo.

⁷ Ashi" dayham" gi zu: bang moo gyo" wigi yug ri" nghoid loug we' zu: bang gyi: ri" lang" te: foeb said pyam.

⁸ Myoug: shi" gootu: gi myidjang: gi moo gyo" yug yoomo azhang dashoo: azhang khyug xi:- azhang soem" xi: ashi" zei: myo: je: lo.»

⁹ «Nukhyab dab, mo, dangain" gi tam" gyoo: ge"» ga: Yesu tid.

Dangtu' Da" Nheig Byu Khyoo:

¹⁰ Nya: cangzoo: yi gi Yesu jhang zheung: lo boem lho: «ciwim wigi subi" ri jhoug" byid: ri dangtu' ci: ca" lha"» ga: myid: boem ago" da.

¹¹ Yesu gi «Nanu" gi mougkhoung: mungdain: da" no, thang khyoo: ri se' gyo: da" akhang" yo" ago". Goo" ji koem gi hau: akhang" ri ayoo" nghoid ago".

¹² Daja: ja: yoo" su: gi hang" ri nghoid loug we' yoo" su: ri myoo" sho' doem poug lung: byid: lho: nyang: gi je yo" jo, loo wa zi nghoid. Ayoo" ajo, su: jang" mo koem gi nyang: yo" gu: dajhi' kyeing" zi lang" yu pyam byid: wa nghoid.

¹³ Hid: su" dangtu' khyo" nyang: nu ri tid kyo" da" zigi nyanu" nyang: gi yu" nyid loug amyang- tam" gyoo: loug ashau" gyo: ziyo'- ase' gyoo: yoomo nghoid.

¹⁴ He: da" khyoo: ri Lapi: Esaia tid to" dang: gi nyangnu" moo joeb byeung" loo bye. He: da" byumyu" gi tam" gyoo: nghoid loug we' se' gyoo: zi anghoid. Yu" nghoid loug we' myang wa zi anghoid. ci: wim gari nyangnu" gi nheig gyeing: mo anghoid.

¹⁵ Khasu" wim gari He: byumyu" gi nheigloem: deig lid: nyid. nyangnu" da" nukhyab' we jid: jo, myojid" we' coem" ci: bang: nghoid. Houg: su" anghoid rigi nyangnu" da" myojid" gi myang boem wa. Nukhyab' we' shau" gyo: boem wa. Nheugloem: soo zoo: we' lheing: boem wa zi nghoid. Hau: lho: nyangnu" nga" jhang phoug lo wigi nyangnu" nya: dam noo ri ngoo ze: gi byid: wa zi nghoid› ga: Mangsoo tid nyid.

¹⁶ «Nghoidloug we' nanu" gi myo, myang ziyo' nu: gyo: loo yoomo ngilho' boem bye.

¹⁷ Nanu" ri ngoo gyeing" nyang: tid ba:- nanu" yo" myang da" zi joem ri Lapi: yi yo" deung: byeung" da" byu yi myoo" sho' myang noug goo" nghoid loug ashau" myang boem. Nanu" shau" gyo: da" khyoo: ri we' nyangnu" gi ashau" gyoo: nghoid ago".

Yesu Myoug: Shi" Sain" Su: Da" Dangtu' Mo Dangkang: Ri: Doem Phoid: Kyo" Khyoo:

¹⁸ «Houg: yoomo myoug: shi" sain" su: da" dangkang: ri tam" gyoo: ge'.

¹⁹ Khyoo: gung moo gyo" da" myoug: shi" da" khyoo: gi Mungdain: da" tarha" mungdang: ri shau" gyoo: nghoid loug we' ase' gyoo: su: yo" du. Akhyeing" su: ju" re" lho: nheigloem: khoug: moo sain" kaid to" da" myoug: shi" ri yu pyam byid: ga: tid.

²⁰ Lug phoug tho' moo sain" khyo da" myoug: shi" gi mungdang: ri shau" gyoo: lang" gau yi nheigloem: yo" dalheing: dam lhoem: yu bang: ri tid nau zi nghoid.

²¹ Nghoidloug we' nheigloem: moo agyi: no, no, azug yoomo daso' za: te: bo jo, lho: mungdang: tarha" yoomo sei: daja: ja: thu' lo lho: su" juang" yi shen" yhen zi thoung" shau" lo da" uri hau: yug gi dalheing: dam doem phoug lo" bye- houg: yhangti" su: ri tid nau zi nghoid.

²² Ju: byab moo gyoo" lo" da" myoug: shi" gi Tarha" mungdang: ri shau" gyo: lho: Mougmyid tho' mo myid myoo: ung: loug khyoo: yo' ziyoo jonu" ri myo, no, vhoo: bo khyoo: yoomo mungdang: tarha" myoug: shi" ri nghoeb zeig pyam lho: wigi ashi" ayo" zei: dakhyoo: ri tid nau zi nghoid.

²³ Myidjang: gi moo sain" khyo da" myoug: shi" gi mungdang: tarha" ri shau" gyo: lho: hau: ziri se' gyoo: su: yo" du nyid. Nyangnu" mo dayham" gi azhang dashoo:- dayham" gi azhang khyug xi:- dayham" gi azhang soem" xi:- myo: je lo da" ashi" ri yo" zei:» ga: tid.

Gug Yo" Myo, Dangtu'

²⁴ Aseing Yesu nyangnu" ri dangtu' gootu: doem tid kyo" da" zigi «Mougkhung: mungdain: zeing gi khasu" nghoid. Byu dayug gi ge da" gug myoug: ri nya: yoo moo yhe: sain" to.

²⁵ Nghoidloug we' myen" ri byu yhoeb' pyo: jo da" uri nya: gyivoo ju" re" wigi myo, shi" ri re" sain" kaid khare" lho: doem phang: lo" byug.

²⁶ Gug gam joem youg gyi: lo wigi anham: ashi" thu' lo da" uri myo, we' bo thu' lo.

²⁷ Houg: lang" hau: youg da" dei zoo: yi ju" re" wigi yoo seing: ri ‹yhoem: seing: we"- Gug gi myoug: ri re" yoo moo datei: anghoid la". nghoid loug we' he: myo, gam joem gi khayo, youg lo lha"› ga: zheung: myid: boem.

²⁸ Yoo seing: gi ‹he: da" moozoo" gi gyivoo zei: da" lo, moo" nghoid› ga: phoug tu. ‹Houg: su" nghoid lang" gi ngoonu" myo, ri yhe: phoin pyam wa nang aveing" la"› ga: deom myid: boem.

²⁹ Yoo seing: gi houg su" ‹akoid: goo" khasu" wim gari myo, gam phoin lang" gug gam ri bo zang" phoin wa nghoid.

³⁰ Gug yed nham" ju" sho' gug yo" myo, eig ja: goin" - dage" youg jo, lho: gyi: loo goo" baja". Houg: lang" gug yed mo, gi myo, gam joem ri xang: shid" yed deung: lho: myi: moo nghe pyam ge' hau: thang: gug rigi nga" da" jhi: moo zheung" kaid too" ge"› ein: wigi ngoo tid wa» ga: tid.

Nghang" Shi" Da" Dangtu'

³¹ Aseing Yesu dangtu' gootu: doem tid da" zigi «Mougkhung: mungdain: gi Byu dayug khyam: moo sain" da" nghang" shi" cab yo" du nyid.

³² Hau: da" nghang" shi" cab gi acab ja: khang" mo" da" tho' moo nge thang da" acab nghoid loug we' gyi: loo lang" gi nghang" poem: dangain" tho' moo je gyi: da" agam nghoid. Moug: moo dang: yen" da" ngho' joem we' akung: ako'' moo soid soid to.»

Doo Cid" Dangtu'

³³ Nyang: dangtu' gootu: doem tid da: zigi «Mougkhung: mungdain: gi doo cid" yo" du nyid. Myiyi: zoo: dayug gi doo cid" ri yu: lho: wigi cen: moin" soem tang moo kaid kaid ri cen: moin" dangain" ri do loo nhang:» ga: tid.

Yesu Dangtu' Ri: Ci: Lho: Jhoug" Byid: Da" Khyoo:

³⁴ Aseing Yesu gi dangtu' joem ri ci: lho: wigi byu phung: moo" yi ri kho" kyo" nyid. Dangtu' abo zigi daja: we' akho" kyoo.

³⁵ Hid: su" kho" kyo" da" khyoo: gi Lapi: yi da" dang: moo Nga" da" nhoid phang lho: «dangtu' khyo" ngoo tid wa. Moug: phain" myid phain" da" bidnyid mo wigi yhoem" to" da" khyoo: ri ngoo phoid: kyoo" wa» ga: Lapi: tid to" dang: zung: loo wa shed re" nghoid bye.

Yesu Myo, Gam Dangtu' Ri:- Dangkang: Doem Phoid: Kyo" Khyoo:

³⁶ Hau: thang: ri Yesu gi zoeb phoung: byu yi ri too" khoo, lho: yhoem: moo vang lo. Hau: uri nya: cangzoo: yi tain" re" wigi «yoo moo youg da" dangtu' mo dangkang: ngoonu" ri phoid: kyoo" we» ga: re" mho' boem.

³⁷ Yesu gi «myoug: shi" sain" su: gi byu da" nya: zoo: nghoid.

³⁸ Yoo thung" gi he: da" mougmyid nghoid ge da" myoug: shi" gi Mungdain: da" nya: zoo: yi ri tid nau zi nghoid. Myo, gam gi akhyeing" su: da" nya: zoo: yi ri tid nau zi nghoid.

³⁹ Soo" yo myo, shi" ri re" sain" da" gyivoo gi yu satan: nghoid. Gug yed nam" gi he: mougmyid thang loo" yo' nghoid. Gug yed mo, gi Mouglagyoo: yi nghoid.

⁴⁰ Myo, gam ri khyen: yham" lho: myi moo nghe pyam yhangti"- he: da" mougmyid lo" thang da" bidnyid moo we' houg: yo" dakhyoo" bue" loo wa.

⁴¹ Byu da" nya: zoo: gi nya: moug: lagyoo: yi ri nhang: kaid lho: byu yi ri shoid vhang: nhang: mo, yo"- atarha" da" moo" zei: mo, bain, sho ri Nya: mougkhoung: Mungdain: mo khyen: thu' yu lho: wigi

⁴² Dadab jo, da" moo myi: khyoem moo khyo kaid nhang: wa houg: moo vang loo" bang: dangain" gi ngougmyeing" shoo" thui: yo' zei yang: ngaid kyeig ga: nyid boem wa.

⁴³ Hau: uri deung byeung" mo, gi nyangnu" da" nya: pho, Mungdain: moo bid yhangti" doug bang to" boem wa. Nukhyab dab mo dangain" tam" gyo: yu ge'.

Shoung: To" Da" Soidgain Dangtu'

⁴⁴ «Mougkhung: mungdain: gi hid: su" bue" ziyo' du nyid. Byu dayug gi yoo dakhyang" moo myhoeb to" da" phougdab ziyoo ri myang- Houg: lang" nyang: gi dalheing: doem myhoeb too" khoo, lho: gau yi da" nheigloem: yo" lo" wigi nya: ziyoo dangain" oung" pyam lho: doem tau" yhe: wigi hau: yoo ri qei yu.

Palhe" Da" Dangtu'

⁴⁵ «Hau: lho: daja: gi Mougkhung: mungdain: gi phoug" dab da" palhe" ri sho: yen" da" phaga: byu yo" du nyid.

⁴⁶ Hau: da" phaga: byu gi gye phoug" dab da" palhe" ri shau" myang lang" doem tau" lo" wigi nyang: yo" da" zi dangain" ri oung" pyam lho: hau: da" palhe" ri qei yu.

Goin Du" Da" Dangtu'

⁴⁷ «Hau: lho: daja:- Mougkhung: mungdain: gi ngoo: kuang mo, gyid thoem" moo goin du" ri ngoo: aja: ja: ri yo" du" yu ziyo' du nyid.

⁴⁸ Hau: goin moo ngoo: myoo" sho' boo lang" tung gung khyoo: lang: she: yu lho: zhoung: jo, wigi ngoo: do, ri khyen ago"- ge da" ngoo: rigi gyoin khoug: moo khyen: kaid lho: age da" ngoo: rigi nghi: khyoo: khyen: du" pyam ago".

⁴⁹ Houg: yo' dakhyoo" ti"- he: mougmyid lo" thang da" bidnyid ri we' bue" loo wa nghoid. Mouglagyoo: yi gi thu' lo lho: deung main" mo, da" agung mo akhyeing: ashoeb bang: ri khyen: gam thu' to" lho: dab jo da" fang myikhyoem moo du" zei kaid pyam wa.

⁵⁰ Hau: joyoo moo ngougmyeing" shu: thui: to"- zei yang: ngaid zeing to" zi shau" boem wa nghoid.

Deung: Byeing: Tarha" Aseig Yo" Axoug"

⁵¹ Aseing Yesu gi «he: khyoo: dangain" ri nanu" gi se' gyoo: go" la"» ga: myid: yu" da" uri nya: cangzoo: yi gi «se gyoo: bye: Aseing we"» ga: tid ago".

⁵² Yesu gi «houg: su" nghoid yoomo Mougkhung: mungdain: da" cangzoo: agi yi bue" loo da" tarha" sara: hang" nghoid loug we' Aseig we axoug" ri we yu thu' shug da" yhoem: seing: yo" du nyid» ga: tid.

Aseing Yesu Ri: Nazared Voo Bang: Alhoem Yu Da" Khyoo:

⁵³ Hau: dangtu' dangain" ri bain tid kyoo" lang" gi Aseing Yesu hau: joyoo mo thu' lo" wigi

⁵⁴ Hau: thang: ri nya: voogung moo doem ju" lo" ri tarha" jung moo tid kyeing" tid poin" nyid da" uri voogung bang: gi nya: dang: ri shau" gyoo: mo, gye gyo: mau" boem yoomo «he: yug gi hid yhangte" da" phajhi" byen ya gi khayo yo" yu lha"» ga: myid boem.

⁵⁵ «Hid: yhangte" da" mau" pho" alhoo: again joem gi khasu" wim yo" koid shug la'. nyang: gi lagsama nya: zoo: anghoid la'. Nya: myhi' myeing gi Mari ga: zi anghoid goo" rhe"- nya: nhung" we' Yaku Yoseb Simon Yuda ga: bang: anghoid goo" la".

⁵⁶ Nya: nham" moo" yi we' yha" moug bang: angoid goo" la". Houg: su" nghoid ri he: yug gi he: phajhi" byen ya gi khayo, yo" yu lha"» ga: wigi Yesu ri alhoem: yu boem.

⁵⁷ Yesu gi nyangnu" ri «Lapi: gi nya: voo yo' nya: yhoem: mo gootu: joyoo moo gi myonhoo: bo nyid phau" myang: nyid boem.»

⁵⁸ Hau: voo byu yi gi nyang: ri loem" jeung" myid abo boem yoomo Aseing Yesu gi hau: voo moo mau" pho" alhoo: again myoo: sho' atoin" shid.