MARKU 8 - Lacid Common Language Bible

Byu Myid: Khyeung" Ri: Voem Zho" Khyoo:

¹ Hau: thang: atoung" myang" ri Byu phung: moo" zeing daphung:-doem zeung: phoung nyid ago". Nyangnu" zoo: wa zoo: noem ayo" boem lang" gi Yesu gi nya: cangzoo: yi ri nya: jhang khe: yu lho:

² He: mung" byu yi ngoo yo' dage: nyid zi soem" nyid nghoid bye:- akhid" nyangnu" zoo: noem ci" we' ayoo" loo: go" nghoid da:- houg: yoomo ngoo he: mung" byu yi ri gung youg you da:- ga: tid.

³ Nyangnu" ri ci: azhoo" loo: zeing- yhoem: khyoo: phang: nhang: kaid nghoid loug we' nyangnu" khyoo: laid moo yoid shang" goo" wa khasu" wim ga: ri nyangnu" mo dayham" gi moug: vi: mo ri" mo, nghoid ago" ga: nyangnu" ri tid.

⁴ Houg: lang nya: cangzoo: yi gi nyang: ri tu" lho: hid: yhang: te" doin" pyoid yoo moo mung" byu dangain" ri zhoo" wa yhi' - zoo: noem khayo yoo" wa lha"» ga: tid ago".

⁵ Yesu gi nyangnu" moo «zooyho' khamyoo, yoo" go" la"» ga: myid. Nyangnu" gi «zooyho' nyhed yho' yo"» ga: tu" ago".

⁶ Yesu gi Meing: byu yi ri myidjang: moo zhoug: jo, wa shid re" amyeing" byid:- hau: zooyho' nyhed yho' ri nyang: yu lho: Mangso jeju" ri bain coung" lang" khyu phe yu wigi meing byu yi ri byid: wa shid re" nya: cangzoo: yi ri byid: kaid- cangzoo: yi gi mung" byu yi ri gam byid: bye.

⁷ Nyangnu" we' gi ngoo: zoo: dajhi yo" ago"- Yesu gi jeju" ri bain coung" lang" ngoo: ri we' mung" byu yi ri gam byid: wa shid re"-nya: cangzoo: yi ri tid.

^8-9 Yug khang" moo" tham: sho' shau" zo: ago"- cangzoo: yi gi zo: teung to" da" ajab amoin" gyoin nyhed loem: byeung" sho' yo" koid: zheung" yu ago". Zoobyo, zo: da" mung" byu yi gi myid: khyeung" koo: nghoid. Houg: lang" Yesu gi mung" byu yi ri-hau: joyoo mo phang: loo" nhang.

¹⁰ Hau: uri nyang nya: cangzoo: yi yo' dage" lhid khyoug: moo vang zhoung: lho: Dalamanuta meing: khyoo: yhe lo" khare".

Pharishe" Alhoo: Again Toin" She Wa shid Re" Mho' Khyoo:

¹¹ Pharishe" dayham" Yesu jang" moo re" wigi nyang: yo' re" ngeug go" nyid.Nyang: ri leug yu yu" nau khyoo:- Mangsoo nyang: ri vho: ngei: khyoo: ri sagsi: toin" shid wa shid re" alhoo: again daja: koid shug we' ga: nyang: ri mho' ago".

¹² Yesu gi so' moo" she: lho: khid" nyid" mo byu yi gi ciwim wigi alhoo: again mho' go" lha". ngoo nanu" ri tid ba:- hid: bang: ri houg: yhang: te"- alhoo: again koid shug zi anghoid ga: tid.

¹³ Nyang gi nyangnu" ri nyhed: too" kho' lho: lhid khyoug: moo doem do, zhoung: wigi thoem" thei: tab khyoo: gu: dab yhe: lo".

Herod Yo' Pharishe" Be" Da" Doo cid"

¹⁴ Cang: zoo: yi gi zooyho' tham: sho' voin wa zi to" myhed pyam abye: go". Lhid khyoug: moo zooyho' daloem: za: te: bo.

¹⁵ Houg: lang" Yesu gi nyangnu" ri «Pharishe" bang: da" doo cid" yo' Herod doocid" ri lhed, lho: jang" pyam ge» ga: tid poin".

¹⁶ Cangzoo: yi gi - nyang: hidsu" tid zigi ngoonu" zooyho' atham: voin yoomo tid zi nghoid da" ga: nyang: cang" nyang tid go" nyid boem.

¹⁷ Nyangnu" hougsu" jho: lho: tid go" nyid uri Yesu si' lang" nyang: gi Nanu" ciwim wigi zooyho' atham: voin khyoo: ri tid go" nyid go" akhid" ju" sho' ase' gyoo: shi" goo" la".

¹⁸ Nanu" myojid" dab, boem nghoid lougwe,- amyang goo" la". Nanu" nukhyab dab, boem nghoid lug we' ashaug" gyoo: goo" rhe" amyid boin: goo" rhe".

¹⁹ Ngoo gi byu wim: khyeung" ri zooyho' wim: loem za: xeung phi, zho" ziri nanu" aboin: loo: goo" la". zo: teung da" ajab amoin" joem nanu" khmyhoo, gyoin byeung" sho' koid: zheung" yu go" lha" ga: nyangnu" ri myid:- nyangnu" gi daxe: eig gyoin nghoid ga: tid boem.

²⁰ Hau: thang: ri byu myid: khyeung" ri zooyho' nyhed loem: za: xeug phi' zho" uri zo: teing da" ajab amoin" joem nanu" khamyhoo, gyoin, byeung" sho' koid: zheung" yu go" lha" ga: myid:- nyangnu" gi nyhed gyoin ga: phoug tu" ago".

²¹ Houg: lang" nyang: gi nyangnu" ri nanu" ciwimwigi- akhid" ju" sho'- ase' gyoo: go" lha".- ga: nyang: nyangnu" ri myed:.

Bedsaida Mo Myo, Jed Dayug Ri:Yesu Noo Ge Loo" Nhang:

²² Nyang: nu" gi-Bedsaida voogung moo re" yhe: ago". Hau joyoo moobyu dayham" gi myo, jed dayug ri Yesu jang" moo shu" re" wigi hau: yug ri tain" byid: wa shid mo nyang ri mho' ago".

²³ Yesu gi myo, jed su: ri vooyam, khyoo: shu" she: thu' lo"- Nya: myojid" moo shi" kain" bain teug byid: lang" Yesu gi hau: youg tho' moo lo, ki" byid: lho: daja: ja: ri nang myang la"» ga: nyang: ri myid: da:.

²⁴ Houg: lang" myo, jed su: gi tu" lho: «byu joem ri ngoo myang- nghoid loug we nyangnu" gi seig gam joem yhang: ti" so" yen" ago"» ga: tid kyo".

²⁵ Yesu gi hau: youg myojid" tho' moo nya: lo, doem ki" byid:- he: lheung: we' nyang: gi yoem: kaid lho: yu" kaid da:- houg: lang" myo, doem myang lo wigi ja: khang" mo" ri yeung: yeung: za: myang bye.

²⁶ Houg: lang" Yesu gi nyang: ri voogung khyoug: khyoo: avang loo: ga: amyeung" byid: lho: nya: yheom: khyoo: loo" nhang.

Yesu Dakhyoo: Petru Tid Thu' Byid:

²⁷ Hau: thang: ri Yesu yo' nya: cangzoo: yi gi Kesarea philipi yo' jhang da" voogung khyoo: yhe: lo" ago". Khyoo: laid moo nya: cangzoo: yi ri «mung" byu yi gi ngoori hang" nghoid da ga: ziri ngoori tid ge'» ga: nyang: tid.

²⁸ Nyangnu" gi nyang: ri dayham" gi Baptisma byid: su: Yohan nghoid ga: dayham" gi: Elia nghoid ga: hau: lho: dayham" gi Lapi: yi mo, dayug yug nghoid- ga: tid nyid ago"» ga: tu" boem.

²⁹ Nyang: gi nya: cangzoo: yi ri houg: ri nanu" gi ngoori hang" nghoid ein: jhoo: go" la"» ga: myid:- houg: lang" Petru phoug tu" wigi «nang gi Meshia nghoid ga» tid.

³⁰ Houlang" Yesu gi nya: cangzoo: yi ri-ngoo hang" nghoid ga: ziri nanu" hang" ri we' atid kyoo" goo"- ga: amyeng" byid:.

Shid: Kham Wa Ziyo' Kyi" Khyeug Kham WA Khyoo Yesu Tid

³¹ Yesu nya: cangzoo: yi ri jhau byid: zigi byu nya: zoo: gi khyeug shu: da" khyoo: myoo" sho' ja: kham: zoo: ca" wa nghoid-zoug: ludaid, yi Khainjung zeing yi yo' tarha" sara yi wigi ngeug pyam zi shau" lho: said pyam zi shau" wa. Nghoid loug we' soem" nyid lang" doem dei to'' loo wa ga: jhoug" byid.

³² Nyang: gi he: khyoo: ri bang bang za: nyangnu" tid kyoo" bye. Houg: yoomo Petru gi nyang ri ayam khyoo: shu: yhe lho: gyi" sho' yooboo foin:.

³³ Nghoid loug we' Yesu gi cangzoo: yi ri lheung: yu" lho: Petru ri satan we"- nga" jang" mo gang loo" we' nang gi Mangso shoid khyo" amyid soin" yu"- byu shoid khyo" za: myid soin: ga: wigi Petru ri yooboo foin: dang: tid.

³⁴ Hau: thang: ri Yesu gi cangzoo: yi yo' mung" byu yi ri nya: jhang khe: yu nyangnu" ri nga" thang: moo cang noug su: gi nyang nya: gungri he: pyam lho: nya: pyang" zeing tu: vu, wigi nga" thang: cang goo" baja" ga: nyang: nyangnu" ri tid..

³⁵ Khasu" wim ga: ri nyang: nya: da" kangso' ri khyoid yu noug su: hang" nghoid lug we' kangso' soem" loo" wa nghoid loug nga" mahtang: mo yo' ngeibu: ludang" yoomo kangso' soem" loo" su: gi nya: kangso' yo" yu wa.

³⁶ Hau: lho: byu yi gi mougmyid goin" ziri yo" seung: ci: nghoid loug we' nyang: nya: kang: so' soem" lo" byug nghoid ri gi ce: akyu" boo wa lha".

³⁷ byu yi gi nyang: nya: kangso' ri ce: ja: wigi thed, lho: doem yo" khyoid yu wa lha".

³⁸ Khasu" wim ga: ri Mangsoo ri aloem khau: ziyo' akhyeung" ashoeb da" he: pyaid moo ngoo yo' nga" jhoug myeung" ri sho' su: hang" nghoid lug we' byu nya: zoo: gi nya: pho, phung" yoeb bang yo' gyeungshang: da" moug: lagyoo: yi yo' dage" ju" re" da" uri nyang: ri sho' thu' nhang wa nghoid.