MARKU 3 - Lacid Common Language Bible

Lo, Dashoid Shid: Da" Byu Dayug

¹ Houg: lang" Yesu gi Tarha" jung moo doem vang lo". Houg: moo lo, dashoid shid: da" byu dayug nyid.

² Meingbyu yi dayham" gi Dougno: Bidnyid moo hau: yug ri nyang: gi, byid: la"- agi byid: la". Yesu ri yooboo zhug wa ga: jang" mo zheung: yu" nyid boem.

³ Hougsu" wi Yesu hau: yug ri hid: shid vhu" khyoo: re" yab we' ga: tid.

⁴ Houg: lang" nyang gi mung" byu yi ri Dougno: Bidnyid moo ge da" moo" zei: wa anghoid lang" age da" moo" zei: wa kangso' khyoid wa anghoid lang" gi said wa kha: loem: tarha" vang la".- ga: myid: da:- nyangnung" gi sam: zoo" tam" to" ago".

⁵ Nyangnu" da" nheigloem: thain: lho: shoid vhang: nyid yoomo nyang nheug yu" koug wigi nheug yo: ziyo' ayam aqei: cang yu" zhoug to". Hau thang: hau: yug ri re" lo, yhoin" kaid we' ga: tid. Nyang: lo, yhoin" kaid yo' - nya: lo, ge loo" khari" bye.

⁶ Houg: lang" Pharishe" gitarha: jung mo thu' lho:-Yesu ruL yo" said pyam wa zi Herod da byu yi dayham" yo' houg: jang: nyang: byen, phyoo" lo" zain: go" nyid boem.

Thoem" Yam Mo Byu Phung: Moo"

⁷ Yesu gi nya: cangzoo: yi yo' dage" Galile thoem" khyoo: yhe: lo". Galile mo byu phung: moo" zeing we' nya: da" thang: moo bo cang lo ago".

⁸ Yerusalem voo mo mo, Idumia meing: mo mo,- Yodan gyung thei tab' mo mo, Turu yo' Sidun mo bang; we' ju" re. Hid: bang: dangain" Yesu jhang ciwim ju" re" boem gari nyang: koid da" moo" ri shoug" gyoo: yoomo nghoid.

⁹ Houg: lang" yesu gi nyang ri mung" byu yi gye" jhen" jhab, go" loo yoo mo nyang: ri anyhen" lheing: goo" baja" ga: nya: shid re" lhid dakhyab, nyheung" too: byid: wa shid mo nya: cangzoo: yi ri tid to".

¹⁰ Khasu" wim ga: ri byu myoo" sho' ri ge loo" nhang: yoomo nyang: ri shau" tain" sho' ga: nyang: jang" moo noo mo, dangain" jhen" go" nyid.

¹¹ Yu vang ci: mo, we' nyang: ri myang lang" nyangnu" gi nya: shid khoin" moo leung goeb lo lho: nang gi Mangso nya: zoo: nghoid da" ga: zeug yoid ago".

¹² Yesu gi nyangnu" ri nya khyoo: yo' sen: lho: afu" nheung loo" wa shid re" zheung: zung" nhang: kaid boem.

Yesu Gi: Lagyoo: Daxe: Eig Yug Ri: Khyen: Yu Khyoo:

¹³ Houg: lang" nyang: gi boug gung daloem: khyoo: do' yhe: lho: nyang: vhoo: mo, ri khe: yu da" nyang: bang: we nya: jhang khyoo: lo" ago".

¹⁴ Nyang: gi daxe: eig yug ri khyen: yu lho: nyang: nu' ri Lagyoo: yi ga: myheing myeung byid. Nyang gi nyangnu" ri nanu" ngoo yo' dage" nyid wa shid' mo khyen: to" zi nghoid- ga: tid mungdang: kho" loo" wa shid re" we' nanu" ri ngoo nhang- kaid wa.

¹⁵ Houg: lang" nanu" gi yu joem ri yo" khaid thu' pyam wa da" yoem: vhoo" we yo" lo boem wa"- ga: tid.

¹⁶ Nyangnu" daxe 2 yug mo Simon khyen yu lho nyang ri Yesu ri Petru ga: myeung myheung byid.

¹⁷ Zebedi nya: zoo: Yaku yo' Yohan tang: ri (Buaenega ga: Yesu myheung byid: hau: zigi moug: doem: nu" tang: ga: zi nghoid da).

¹⁸ Houg: mo Andre- Philib- Batholume-Mathe- thoma- Alphe nya: zo: Yaku- Thade- myu" jhed myid gyi: su:- Simon Yo'

¹⁹ Yesu ri ab pyam da: Yuda Iskarud nghoid.

Yesu Yo' Hezebula

²⁰ Houg: thang" Yesu gi yhoem: khyoo: doem lo:- Yesu yo' nya cangzoo: yi voem: zoo: ayo, lang" ayo" loo: sho' - byu phung: moo" yi doem zeung: re" ago".

²¹ Hau: khyoo: ri nya: yhoem: byu yi shaug" gyoo: lang" nyangnu" gi nyang ri myheug yu wa ga: thu' yhe: lo" ago". Khasu" wim ga: ri mung" byu yi gi nyang: ri foin" abye:" ga: tid nyid boem ago".

²² Hougsu" wigi Yesusalem mo gyoo" lo da" tarha" sara dayham ba tid zi gi Bezebula qi: nyang moo bo- hau yu zoug: phoo gi yu joem ri yo" khaid thu pyam wa Yoem nyang ri byid yoo mo nghoid ga: tid boem.

²³ Houg: lang" nyang: gi nyangnu" ri khe: yu lho: dang: tu' yo' satan gi satan ri khasu" se' khaid thu' wa lha".

²⁴ Mungdan daloem: gi nyang phung: nyang kho' go" lho: nyang: cang" nyang: gyi koid go" nyid rigi hau: mungdan gi byo, yoin" lo" byug wa zi nghoid.

²⁵ Oug" khu, daloem: we' nyang: cang" nyang:- kho' go" lho: myeung myo: byo go" nyid rigi hau: oug" khu, gi byo, sain" lo" byug wa.

²⁶ Houg: yo' dakhyoo" ti" satan gi satan nyang: cang" kho' go" lho: gyi to' koid thu' re" rigi-satan da mungdan gi ayo" geung: teung jo, loo:- thang lo" byug wa zi nghoid.

²⁷ Yoem: boo su: ri shi"- xangshid" atei" too" loo: za: hang" nghoid loug we nya: yhoem: khoug: khyoo: vang yhe: lho: nya: ziyoo jonu" ri ayhe: yo" lhoid yu nghoid da. Nyang: ri bain tei" to" thang: ri she- nya ziyoo ri dayo" syhe: lhoid yu wa zi nghoid.

²⁸ Ngoo nanu ri deing" deing tid zigi Xang: su byu yi gi nyang: nu shoid da" yooboo dangain" yo' akhyeung" da" dang: aja: ja: tid da yooboo ri yo" khyoid pyam byid:.

²⁹ Nghoid loug we gyeungshang: da" Wenyi: ri akhyeung" dang: tid shoid su: gi khanham we yooboo khyoid pyam byid: zi shau" loo: wa anghoid. Khasu" wim ga: ri nyang gi apyaid atoo: mo yooboo ri shoid loo" su: nghoid.

³⁰ (Yesu he: zi tid zigi khasu" wim ga: ri mung" byu yi dayham" nyang: moo yu bo ga: tid byid: yoomo nghoid.)

Yesu Nya: Myhi, Yo' Nya: no,

³¹ Houg: lang" Yesu da" nya: myhi' yo' nya: no, gi ju" re" nyangnu" gi yhoem nghe: shoid moo re" ju" yab jo, wigi byu dayug ri nya: jhang khi: nhang: kaid ago".

³² Yesu ayam aqei: moo zhoug: jo, da" mung" byu yi gi nyang: ri re" myhi, yo" re" no, -re" nham" moo" yi yhoem: nghe: shoid moo nang ri" re" sho" nyid ago"- ga: tid kyo" boem.

³³ Yesu tu" lho" tid zigi - nga" myhi, yo' nga" no gi hang" nghoid ago" lha"» ga: tid.

³⁴ Houg: su" nyang: gi nya: ayam aqei: moo zheung" zhoung: jo, da" mung" byu yi ri goem: sho' lheung: yu" lho: Yu" ge" hid: bang: gi nga" myhi, yo' nga" nhung"- nghoid bye-

³⁵ Khasu" wim ga: ri Mangsoo: myidvho: khyo" cang mo, hang" nghoid loug we' nga" no' nga" nham" moo" yo' nga" myhi" nghoid bye".