MARKU 2 - Lacid Common Language Bible

Gung Joem: Shid: Su: Ri Yesu NooGe Loo" Nhang: Khyoo:

¹ Dayo' zoo: kyo: lo" thang: ri Yesu gi Kaperna-um voo moo doem tau: ju" lo wigi Yesu yhoem: khoug: moo nyid nyid ziri fu" loo" bye.

² Houg yoomo Yab khyoug: mo khoem duang: ayu" loo sho' mung" byu yi zeung: re" boem ago". Houg: lang: Yesu gi nyangnu" ri mungdang: kho" kyo" nyid.

³ Gung joem: shid: da byu dayug ri we' byu myid: youg wigi Yesu jang" moo dang ju" re" ago".

⁴ Nghoid loug we' nyangnu" gi mo, pug soung thu yoomo Yesu jhang ayo" tain" yhi: lang" gi nya: vhuloem tho' mo da" mhang" moug: ri tu: shed' pyam lho: gung joem: shid: su: ri yhoeb joyoo yo' dage" yhoin" khyo' kaid ago".

⁵ Nyangnu" da" loem" jeung" e" myed ri Yesu shau" myang lang" nyang: gi gung joem: shid: su: ri nga" zoo: we"- re" yooboo ri khyoid pyam byid bye:- ga: tid da.

⁶ Houg: moo zhoung: jo, da" tarha" sara yi dayham" da" nheigloem: khoug: moo soin: nyid.-

⁷ He: yug gi khasuwim he: dang: ri voem" tid lha". he: zigi Mangsoo ri juang" zi danghoid. Mangsoo dayug kyeing" yooboo dayo" khyoid byid: ga: myid: sho: nyid ago".

⁸ Nyangnu" da" nheugloem: khoug: moo hidsu" myid: sho: nyid boem ziri Yesu si lang" ciwim hid su" myid soin: nyid go" la" ga nyangnu" ri tid.

⁹ Gung joem: shid: su: ri re" yooboo khyoid pyam byid: bye: ein: ziyo' too' we' re" a: thain: yoeb ciwigi loo" we' ga tid.

¹⁰ Nghoid loug we' byu nya: zoo: gi moug myid hto' mo yooboo yo" khyoid byid: da" a myeing a: na: bo ziri ngoo nanu" ri toin" shid' wa"- ga: tid wigi gung joem: shid: su: ri

¹¹ Nang ri ngoo tid ba- too' we' re" yhoeb yoo koid: vu, lho: yhoem: khyoo: loo" re, - ga: tid.

¹² Houg: lang" jang: nyang to' lo wigi na: yhoeb yoo koid: vu, lho: nyangnu" da" shid' khoin" mo myab phang: thu' loo" khare". Houg: lang" nyangnu" dangain" mo, mau" hang" to" boem wigi Mangsoo ri coung" nghei zoore"- ngoonu" gi hid: te" gyeing" moug" phau" khyoo: kha" nham we' amyang yu" shi" ga: tid boem.

Levi Ri: Yesu Khe: Yu Khyoo:

¹³ Yesu gi Galile thoem" yam khyo" doem tau" yhe: lo". Byu phung: moo" yi dangain" nya: jhang zeung foem lang" gi nyang: gi nyangnu" ri jhoug" byid: nyid.

¹⁴ Houg: mo nyang doem so" yhe: lo" ri Alphe nya: zoo: Levi gi nya: yung" moo kheung" khyu zung: jo, ziri myang lang" Yesu gi nyang: ri nga" thang: cang shang ga: tid Houg: lang" jang Levi gi to' lho: nya: thang: cang yhe: lo".

¹⁵ Hou: thang: ri Yesu gi Levi yhoem: moo voem: zo: nyid. Nya thang: cang da" kheung" khyu: zoo: mo, myoo" sho' we' yooboo yoo" mo, myoo: sho' mo dayham" gi Yesu yo' nya: cangzoo: yi yo" dage" voem: zoo: jang: moo bo zhoung: jo, ago".

¹⁶ Houg: lang: kheung" khyu: zoo: mo, yooboo yoo" mo, yo' dage" Yesu zo: shug nyid ziri Pharishe" bi mo tarha" sara yi dayham" myang lang" nyangnu" gi ciwim wigi yooboo yoo" mo, kheung" khyu: zoo: mo, yo, dage" zo: shug nyid lha".- ga nya: cangzoo: yi ri myid: nyid boem ago".

¹⁷ Hau: ziri Yesu shaug" gyoo: lang gi nyang: gi nyangnu" ri yang" zain mo, gi doctor aca" nghoid loug we' noo mo, gi ca" ago"- deungmain" mo, ri khi" wa shid re" ngoo re" zi anghoid. Yooboo yo" mo, ri khi: wa shid re" koem ngoo re" zi nghoid ga nyangnu" ri phoug tid..

Zoo: Noem Zeing: Da" Dang: Myid: khyoo:

¹⁸ Babtisma byid: su: Yohan da" thang: cang moo yo' Pharishe" gi joyoo daloem: moo zoo: noem zeing: kyu mho' boem. Hougsu" byu yi dayham" gi Yesu jhang re" lho: nyang: ri_ Babtisma byid: da" Yohan cangzoo: yi yo' Pharishe" yi da" cangzoo: yi gi zoonoem zeing: pyam ri re" cangzoo: yigi ciwim wigi zoo: noem azeing: pyam' lha"» ga: nyang: ri myid:.

¹⁹ Yesu gi nyangnu" ri phoug tu" wigi myi: pheung" fang pui" loem mo, gi Phoo, seig yo' nyid shi" uri zoonoem ge jung" pyam' wa la". nyangnu" gi phoo seig yo" dage" danyid nyid gi zoo: noem age jang" pyam.

²⁰ Nghoid loug we phoo seig ri nyangnu" mo kang" shu" lo" da" bidnyid ju" loo wa-houg: lang" gi nyangnu" zoo: pyam zeing boem wa zi nghoid.

²¹ Byixoug" moo pain" cu' aseig wigi hang" alhoung phoo- hougsu" pho nghoid rigi pain seigcu, wigi byixoug" ri lang: ceug wigi byi: je jeug loo" wa.

²² Hau: lho: zabyid yhid: aseig ri we' shooyid thung: axoug" moo hang" alhoung kaid. Hougsu" kaid rigi shooyid thung: bug gyam: lo" wigi zabyid yhid: yau shoin: lo" ziyo' shooyid thung: we' yoin" lo" byug wa nghoid. Houg: yoomo zabyid yhid: aseig rigi shooyid thung: aseig moo kaid too" ca"» ga: tid.

Dougno: Bidnyid seung: Da" Dang: Myid (Mat. 12:1-8, Luk. 5:12-16)

²³ Houg: thang: ri Yesu gi Dougno: Bidnyid moo sungsoo: gug yoo khyo" so" lid loo" eung: nyid. Nya: cangzoo: yi gi nyang: yo' dage" nghoid uri nyangnu" gi sungsoo: gug shi" ri shoin" yu ago".

²⁴ Houg: lang" Pharishe" gi nyang: ri Yu" we' Dougno: Bidnyid ri re" cangzoo: yi gi ngoonu" tarha" ri thoug theug ago" ga: tid.

^25-26 Yesu phoug tu" wigi Khainjung moo" Abiatha pyaid moo David gi nya: thang: cang mo, zooyoid ca" nyid uri Khasu" Noku yhoem khoug: moo vang yhe: lho: Khainjung moo" yi mo lid lho"- hang" we' age zoo:- Mangso shid khoin" moo teung: to" da" zooyho' ri zo: wigi nya: byu yiri we' gam zho" da:- khyoo: ri nanu" khanham we anghab yu" goo" la".- ga: nyangnu" ri tid.

²⁷ Houg: lang" Yesu gi nyangnu" ri Byu gi Labain nyid shid mo anghoid- Labain nyid" gi byu shid re" to" zi nghoid.

²⁸ Hougsu" yoomo-Byu da" nya: Zoo: gi labain nyid" da" Aseing: we' nghoid.