MARKU 14 - Lacid Common Language Bible

Yesu Ri Thoutheung Phajhi" Khyau" Khyoo:

¹ Lhid: kaid pui" yo' doo cid" abo zooyho' zoo: pui" ju loo wa eig nyid" kyoo: shi" ri khainjung agyi moo" yi yo' tarha" sara yi gi Yesu ri sam: za: myheug yu lho: said pyam wa shid re" phajhi" khyoug" go" nyid boem bye.

² Nghoid loug we nyangnu" gi mung" byu yi: aloin: lo boem wa shid mo pui" bidnyid gyoo: moo gi akoid shi" ja"- ga: sham: go" boem.

Bethani Moo Yesu Mam mam" Xu: Foid Gyoin: Kham:Khyoo:

³ Yesu gi Bethani voo mo manggam bue" yu" bye: da" Simun yhoem: moo voem: zo: nyid da" uri myiyi: dayug gi gye" phoug" dab da" moo" ra: nadu: xu:-lug gyeing" jhuang: daloem: ci: re" lho: Yesu da" vhuloem moo hau: xu: re" foid gyoin: byid.

⁴ Hau: khyi moo nyid mo, dayham" gi hau: ziri nheig yu" yo: lo lho: cenoem wim hau: xu: ri amyid afoo" koid pyam' lha". ga: nyang: cang" nyang: tid go" nyid.

⁵ Hau: xu: ri ngei soem" shoo: kyab mo oung" pyam lho: myoung shoo" mo, ri yo" gam byid: zi nghoid da:- nyang: cang" nyang: lu wim, go" nyid ziyo' hau: myiyi: ri yooboo foin: ago".

⁶ Houg: lang" Yesu gi nyang: sam: zoo: nyid baja"- nanu" nyang: ri ce: noem wim goin, jang nyid go" lha". nyang: gi ngoori ge da" moo" zei: byid: bye.

⁷ Khasuwimgari-myung shoo" mo, gi-nanu" yo' dage" za: nyid boem. Nanu" nyangnu" ri yo" pang" nghoid loug we' ngoo gi-nanu" yo' khanham we' beung abyid loo: nyid jo, wa zi anghoid.

⁸ Nyang: koem gi nyang: yo" koid yhi' koid abye:- nyang: gi myhoeb pyam wa nga" shid' mo soin' myeung lho: xu: joid byid: abye:.

⁹ Akhid" ngoo nanu" ri deing" deing tid zigi ngeibu: ludang: ri kho" kyo" lo" da" moug: gyab goin" jang" moo he: myiyi: ri myid boin" wa shid mo nya: moozoo" ri tid kyo" lo" boem wa"- ga: tid.

Yesu Ri: Ab Byid: Pyam Wa Shid Mo Yuda Fain" Lo" Khyoo:

¹⁰ Houg: lang" daxe: eig yug moo bo da" Yuda Iskarud gi-Yesu ri ab byid: pyam wa shid mo-Khainjung zeing jhang khyoo: thu' yhe: lo".

¹¹ Nyangnu" gi nya: dang: ri shau" gyo: boem lang" gi ngei wigi nyang: ri ngei byid: wa ga:-dang: soo" byid: to" abye: go". Yuda gi kha: yo' yo" ab byid: wa zi sakhyoo" ho: nyid.

Yesu Nya: Cangzoo: Yi Yo" Lhid: Kaid Pui" Voem: Zo: Khyoo:

¹² Hau: lhid: kaid xoin" yang nu" ri said da" doocid" da" zooyho' zo: pui" bidnyid ju" wa xang: shi" nyid"- nya: cangzoo: yi gi Yesu ri-ngoonu" gi re" shid re"-lhid: kaid pui" myen" xoin: ri nang ngoonu" ri khakhyi moo yhe: nyheung too" nhang: nau lha"» ga: myid: ago".

¹³ Houg: lang" Yesu gi nya: cangzoo: eig yug ri re" eig yug voomoo" khoug: khyoo" vang yhi: ge' gyid jhuong: vu, ci: da" byu dayug gi re" eig yug ri lhoem: tau yu wa

¹⁴ Nya: thang: cang lo" lho:-nyang vang lo" da" yhoem: mo yhoem: seing: ri Ngoo nga" cangzoo: yi yo' dage" lhid: kaid da" pui: zoo: noem zoo: wa-being" do, yab khayoo: nghoid da" lha?-ga: sara myid: nhang" kaid ein: tid ge'.

¹⁵ Houg: lang" nyang: gi re" eig yug ri nyheing soin jen" too" bye:-tho' pyam: mo yab moo" dayab ri toin" shid wa nghoid. Hau: yab moo ngoonu" shid re" myen" xoin: yhe: nyheung too" ge"-ga: pyeung: kaid.

¹⁶ Cangzoo: eig yug we' thu' yhe: lo" ri voomoo" khoug: khyoo: vang yhe: lho: nya: eig yug ri Yesu tid kaid ziyo' dakhyoo" yhe: myang lang" lhid: kaid pui" zoo: noem ri yhe: nyheung to" ago".

¹⁷ Akhid" myenthang: zoo" ri Yesu gi nyang cangzoo: daze: eig yug yo' dage" ju" re" ago"

¹⁸ Nyangnu" -voem zoo: zoobui" moo zheung: zo: nyid uri-Yesu gi ngoo nanu" ri tid ba:-ngoo yo' voem: shoin" zo: nyid su: dayug gi ngoori gyivoo yi da" lo, moo ab, pyam ' byid wa nghoid-ga: tid kyo".

¹⁹ Houg: yoomo nyangnu" gi nheig gyo: koug ziyo' dayoug thang: moo dayug-hau: yug gi ngoo nghoid wa la". ngaoo nghoid wa la". ga: zheung myid: nyid ago".

²⁰ Yesu gi-hau: yug gi dae: eig yug moo bo lho: ngoo yo' dage" dabain mo za: zooyho' shoin" zoo: su: nghoid ga: tid.

²¹ Jhoem: mougsoug" moo lhid" to" ziyo' dakhyoo"- byu nya: zoo: gi shid: kham: wa zi nghoid- nghoid loug we' byu nya: zoo: ri gyivo lo, moo ab byid: pyam su gi byu xuid" vooyoem: lo" zi shau" wa nghoid-hau: yug gi akhu: re" nghoid ri-nya: shid mo je; gi zi nghoid-ga: tid.

Aseing: Dan Myen" Xoin: Zoo: Pui"

²² Houg su" nyangnu" voem: zo: nyid boem uri Yesu gi zooyho' ri yu lho: jeju" bain coung" byid: lang" hau: ziri xeig phe, lho: yu zoo: ge"-hid: gi nga" gung nghoid ga: tid wigi-cangzoo: yi ri gam byid.

²³ Yesu gi zabyid goem ri yu lho:-Mangsoo ri jeju" bain coung" byid: lang"-cangzoo: yi ri byid: da:-nanu" dangain" mo, hau: goem mo shug boem ago".

²⁴ Yesu gi he: zigi byu myoo" sho' mo, shid re" shoin: pyam da:- nga" suid" nghoid Mangso dang: theung ri dazeig thoung" tab to" da" nga" suid" nghoid- ga: Yesu tid.

²⁵ Ngoo nanu" ri tid ba:- Mangso mungdain moo zabyid seig ri ngoo shau" shug da" bidnyid ju" sho' ngoo gi he: zabyid ri khanham we' shug loo wa zi anghoid ga: tid.

²⁶ Hau: thang: ri nyangnu" gi coung" nghei jikhoin" daloem: bain coung" byid: lang" zhainlun boem khyoo: thu' yhe: lo boem ago".

Yesu Ri: Petru Ngeug Pyam Wa Zi No, Mo Tid Kyo"

²⁷ Yesu gi nyangnu" ri nanu" dangain" mo, ngoori too" kho' lho: gei phang: loo" goo" wa"- Khasu" wim ga: ri jhoem: mougsoug" moo- Mangsoo gi yang zoem: su: ri said wigi-yang joem dangain" gi-phang: byo sain" lo" boem wa"-ga: lhid" to".

²⁸ Nghoid loug we' ngoo doem dei to'' lo thang: ri moo Galile moug: khyoo: nanu" shid' moo ngoo yhe: loo" lang" wa ga: tid to".

²⁹ Petru gi Yesu ri-nyangnu" dangain" mo, nang ri phang: cau" too" khari" nghoid loug we' ngoo gi nang ri khanham we' aphang: cau" too" khyoo: wa ga: Yesu ri phoug tid.

³⁰ Yesu gi nyang: ri- ngoo nang ri deung" deing tid ba:-akhid" myen nyang: gyo, eig khoin" atoin" shi" ri-nang gi ngoori asi ga: soem" lheung: ngeug pyam wam bye: ga: Petru ri tid.

³¹ Nghoid loug we Petru gi-ngoo gi nang yo' dage" shid: ca" loo nghoid loug we nang ri ngoo angeug pyam wa ga: je phain" tid lo- cangzoo: gooji yi dangain" we' houg: yo' dakhyoo" tid ago".

Gesemane Moo Yesu Akyu Mho' Khyoo:

³² Yesu yo' cangzoo: yi gi-Gesemane ga: myeung da" joyoo: moo ju" re" lo ago". Yesu gi nya: cangzoo: yi ri ngoo akyu" mho' nyid uri nanu" gi hid: moo zhoung: jo, lang" ge' ga: tid khare".

³³ Hau: lho: nyang: gi-Petru Yaku Yohan yo' dage" shu" yhe: lo". Nyang: gi gye" myid myoo: ung: loug yau: khe: shau" nyid.

³⁴ Houg: lang" nyang: gi nyangnu" ri nga" nheigloem: boug go' wa yhi' gye" kougshu: nyid-nanu" hid: moo lhid lho: lang" nyid shi" ge' ga: tid da:-

³⁵ Nyang: gi houg: mo dajhi' zoo: lid: yhe: lo" wigi myid: jang: moo yhe: goeb jo, lho: ge bui" nghoid ri gi ayo' akhyeing: lid: loo" baja".

³⁶ Nga"- phoo we"-nang gi dangain" ri yo" ze" bui" su: nghoid nyid-houg: yoomo hid: yaukhe" kyi" khyeug da" goem ri nga" jang" mo yu pyam byid we-nghoid loug we' ngoo vho: khyo" anghoid nang vho: khyo" za" nghoid baja"-ga: akyu" mho' nyid.

³⁷ Nyang: doem tau" lo rigi-cangzoo: soem" yug yhoeb myhed jo, ziri lo myang lang"-Yesu gi Petru ri Simun we"-nang yhoeb myhed jo, la". Nang gi danayi khyalhang"-ayo" lhoug nyid rhe".

³⁸ Nanu" gi jhu, phyo' jang" moo agyo: loo" wa shid re"-lhid' lho: akyu" mho' nyid ge' Venyi: gi vho: nau nyid nghoid loug we' gung shoo" gi yoem: neung: nyid ga: nyangnu" ri tid.

³⁹ Nyang dalheing doem thu lo" lho: akhang: dang: yo' dakhyoo"- akyu" mho' nyid.

⁴⁰ Nyang doem tau" lo ri-nyangnu" gi myo, kug gye" lid: boem yoomo-yhoeb myed jo, ziri lo doem myang-houg: lang" nyangnu" gi Yesu ri khasu" doem phoug tid wa zi we' asi loo nghoid ago".

⁴¹ Yesu gi soem" lheing: ein: lheing: doem tau" loo lang"-nyangnu" ri nanu" gi akhid" ju" sho' yhoeb myhed lho: no: nyid goo" nhung: lha". gi" bye:- ayo' ju" bye:-yu" ge"-byu nya: zoo: gi yooboo koid akhyeung" mo, lo, moo ab pyam zi shau" abye:.

⁴² Too' ge'. Ngoonu" yhe: lo" boem loo: shang- yu" ge, ngoori ab pyam wa su: gi ju" re" nyid bye" ga: nyangnu" ri tid.

Yesu Ri: Myheug Lo" Khyoo:

⁴³ Yesu houg: su" da tid nyid shi" uri daxe: eig yug moo bo da" Yuda gi khainjung agyi moo" yi tarha" sara yi yo' Ludaid vhu" jhung: yi wigi nhang: kaid da-sham: lham: ci: da" byu phung: moo" yo' dage" ju" ri" bye.

⁴⁴ Yesu ri ab byid: pyam su: gi- ngoo boobug bug su: gi nanu" vho: yug nghoid ga:- nyang: ri myheug yu lho: nyeung" za: zung" lhug shu" loo" ge' ga: nyangnu" ri aved byid: to".

⁴⁵ Houg: su wigi- Yuda ju" ri" yo' Yesu jhang khyoo: tain" yhe: lo" lho: sara we"- ga: tid lho: boobug yhe: boug-

⁴⁶ Houg: lang" nyangnu" gi Yesu ri myheug ' tei" lho:-teung za: zei zeung ci: boem bye-

⁴⁷ Hau: yam moo yab jo, mo, mo dayug gi nya: sham: coin" she: yu lho:-Khainjung moo" yen" dayoug da" join pho nukhyab jab phyid khyo' pyam' byid.

⁴⁸ Hau thang Yesu gi nyangnu" ri-damya ri yhang: ti" ngoori myheug wa shid re"- sham: yo' thung" keung: yo' ri" go" la".

⁴⁹ Ngoo gi Noku yhoem moo" moo jhoug" byid: zoore"- nanu" yo' dage" nyid nghoid loug we' nanu" ngoori amyheug nghoid ago"- nghoid loug we' jhoem: mougsoug" gi joeb byeung" loo ca"» ga: tid.

⁵⁰ Houg: lang" cangzoo: yi dangain" mo, gi nyang: ri too" kho' lho: tang" phang: lo" byug: boem bye.

⁵¹ Jid: moo" paindu za: gang" ci: da" zooyam dayug gi-Yesu thang: moo cang yhe: lo" da:-nyangnu" gi nyang: ri myheug wa ga: soin' boem ri

⁵² Nyang: gi jid moo" pain" du ri too" kho' lho:-gung cen: tang" phang: loo" khare".

Koungsi Shid Khoin" Mo Yesu

⁵³ Hau: thang: ri nyangnu" gi-Yesu ri khainjkung moo" yhoem: khyoo: shu" yhe: lo" ago". Khainjung agyi yi dangain" mo, yo' ludaid yi-yo' tarha" sara yi mo gi houg: moo zeung foem: to" boem ago".

⁵⁴ Petru gi khainjung moo" da" yhoem: vang" khyoug: moo ju" sho' vi" vi: mo Yesu thang: moo cang yhe: da:- nyang: gi goem loem gyizoo: yi yo' dage" zhoung: jo, wigi-myi khyoem moo myi: bo gang nyid da.

⁵⁵ Khainjung yi yo'-Yuda tarha" yab do, goin" jang" mo ludaid yi dangain" mo, gi-Yesu ri yo" said pyam sho' ga: sagsi: sho: boem nghoid loug we' nyangnu" ce" sagsi: ashau" shoo: nghoid ago".

⁵⁶ Khasu" wim ga: ri byu myoo" sho' mo, gi Yesu khyoo: ri mhau' lho: sagsi: kham nyid ago".

⁵⁷ Nghoid loug we' nyangnu" da" sagsi: dang: joem gi dayug yo' dayug ajho du goo"- Houg: lang" byu dayham" bang: gi to' yab re" lho: nyang: khyoo: ri sagsi: mhau' kham boem lho:

⁵⁸ He: yug gi byu lo, wigi koid to" da" he: Noku yhoem moo" ri phyo' pyam lho: soem" nyid" kyoo: lang" byu lo, wigi akoid loo: za:-ngoo koid too" wa"-ga: tid ziri ngoonu" shau" gyo: boem bye- ga: tid ago".

⁵⁹ Nghoid loug we nyangnu" da" sagsi: dang: lang" gi daja yo' daja azhung" goo".

⁶⁰ Houg: lang" khainjung moo" gi-mo, phung gung mo to' yab lho: Yesu ri nyangnu nang ri yooboo foin: nyid ri nang dakhoin" we' aphoug tu" rhe".

⁶¹ Nghoid loug we-Yesu gi dakhoin" we' atu" loo sam" zoo: nyid Houg: lang" khainjung moo" gi-nyang: ri nang gi ngi lho, da" Mangso nya zoo Meshia nghoid la"» ga: doem myid.

⁶² Yesu gi ngoo nghoid-byu nya: zoo gi myhang: thang su; da" lo, yo shoid moo zhoung: jo, ziyo'-moug: khung: mo, jhoem: thei" khyoug: moo ju" re" ziri-nanu" dangain" lhoem: myang goo" wa nghoid-ga: tid.

⁶³ Khainjung yen" gi nya: athho, byi sheung: lang: ceug sain" pyam lho:-ngoonu" ce" sagsi; ca" lo: la".

⁶⁴ Nyang: Mangsoo ri Juang" yi gei sang: zi ri nanu" shaug" gyoo: boem bye nanu kha dang: phyed yo? ga: tid. Nyangnu" dangain" mo, we-Yesu ri shid: moin: yooboo yo" zi nghoid ga: dang: phyed pyam ago".

⁶⁵ Dayham" gi Yesu ri shikain" byi" gyoin: boem ago" nya: myonhoo: ri thoeb pyam byid: lho: «nang ri thoin: kha: yug nghoid lapi: pe: yu" we» ga: tid ago". Goem loem gyizoo: yi we nyang: ri boopyug pyug youg ago".

Yesu Ri: Petru Ngeug Pyam Khyoo:

⁶⁶ Petru gi hau: vang" khyoug: moo nyid jo, da: uri-Khainjung moo" da" vhu" kung: myiyi nu" dayug re" lho:

⁶⁷ Petru myi: gang nyid ziri myang lang" nyang: ri yu" zhug to" lho:-nang we' Nazared mo Yesu yo' dage" lhoung nyid yen" su: nghoid» ga: tid da:.

⁶⁸ Nghoid loug we' Petru gi hau: ziri ngeug pyam lho:-nang tid zi ngoo asi-gyoo: we' ase' gyoo:-ga: tid. Houg: su: nyang: gi vang" khoem duang: khyoo: yhe: lo". Hau u ri gyo, dalheing: toin: bye.

⁶⁹ Hau: vhu" kung: myiyi: nu" nyang: ri doem myang lang"-ayam moo yab jo, mo, ri-he: yug we' nyangnu" phung: mo dayug nghoid da:» ga: tid.

⁷⁰ Nghoid loug we' nyang: gi-hau: ziri doem ngueg pyam bye-houg: lang" hau: thang: daso' zoo: rigi-hau: ayam moo yab jo, mo, gi Petru ri gi" gi nyang: nang gi-nyangnu" phung mo nghoid da:-khasuwimgari-nang gi Galile mung" byu nghoid da:-ga: tid ago".

⁷¹ Houg: lang" Petru gi jo da" khyoo: ri ngoo jham tang: lho tid wa. Ngoo tid zi ajoo lang" Mangsoo ngoori dam byid: baja"- nanu" tid yid da" hau: youg: khyoo ringoo asi ga tid.

⁷² Houg: lang" gyo, eig lheing: toin: loo bye- Petru gi Yesu nyang: ri-gyo, eig lheing: atoin: shi" ri nang ngoori soem" lheung: ngeug pyam wa nghoid ga: da" dang: ri doem myid boin: lo wigi nheig myed koug ngau nyid.s