MARKU 11 - Lacid Common Language Bible

Yerusalem Khyoo: Oung:Doid Khyo" Vang Yhe: Lo" Khyoo:

¹ Yesu yo' nya: cangzoo: yi gi Yerusalem yo" zhainlun boem khyid: mo Bedphagi yo' Bethani voo moo jang loo lang". Yesu gi cang: zoo: eigyug ri shid khyoo: nhang: kaid lho:

² Re" eig yug shid' vhu" mo voogung khyoo: yhe: loo" ge'- voogung khyoug: moo ju" yhe: yo" su‹- hang" azhoung: yu" shid" da" loozei: nu" dadu: tei" to" ziri re eig yug yhe: myang goo" wa. Hau: ziri tei" phoid yu wigi she: loo ge'.

³ Byu dayug yug ciwim houg: su" koid go" la"» ga: re" myid: lang" re" eig yug gi Aseing: he: ziri ci: ca" ga: akhid" nyang: hid: khyoo: doem tau" nhang: kaid wa ga: nyang: ri tid we'.

⁴ Nya: eig yug gi yhe: lo" wigi yhoem: daloem: mo khoem zeug khyo: shoid moo loozei: nu" dadu: tei" to" ziri yhe: myang lang" hau: ziri yhe: phoid: nyid ago".

⁵ Hau: khyi moo yab jom mo, gi loozei: nu" ri cenoem koid phoid: la"» ga: myid: boem ago".

⁶ Nya: eig yug gi Yesu tid kaid ziyo' dakhyoo"- nyangnu" ri tid kyo" ago"- Houg: lang" nyangnu" gi nya: eig yug ri loozei: nu" ri phoid: she: loo" nhang: ago".

⁷ Nya: eig yug gi loozei: nu" ri Yesu jhang khyoo: she: lo wigi loozei: nu" da" tho' moo nyangnu" da" byimi nhi" byid: ago". Yesu we' loozei: nu" tho' moo do, zhoung

⁸ Byu myoo" sho' we' nyangnu" byi sheing: ri khyoo gung moo myhu" byid boem ago". Goo" tu: dayham" gi pa: dam mo ci: lo da" seig deing" joem ri khyoo: gung moo myhu" byid: ago".

⁹ Yesu da" shid vhu" mo mung" byu yi yo' thang: moo cang lo da" mung" byu yi gi nyho: yoid boem wigi Hosana myeing yo' ju" ri" su: ri Mang" So: nyang: ri main' kadi' byid: baja" o" Mangsoo: ri coung" boem.

¹⁰ Ju" loo wa ngoonu" nya: phoo David da" Mungdain: gi Mangso main" kadi' byid:- ga: Mangsoo ri coung boem.

¹¹ Yerusalem moo ju" lang" Mangso da" yhoem: khyoug: khyoo: vang lo" wigi Ja: khang" moo" ri lheung yu" lo" nghoid loug we' Bidvang lo" nyid yoo mo cangzoo: daxe": eig yug yo" dage" nyang gi Behtani voogung khyoo: thu' yhe: lo.

Lafoem Gam Ri: Yesu Nheing" Da" Khyoo:

¹² Hau: thang: nyid" ri Yesu yo' nya: cangzoo: yi gi Behtani mo doem tau" lo uri Yesu gi zooyoid nyid.

¹³ Houg: lang" Yesu gi afu' mung" jo, da" lafoem dagam ri vi" mo myang kaid. Nyang: gi ashi" zei: la' ga" lafoem zeing yang: khyoo: yhe: lo". Nghoid loug we' lafoem shi" zei: yo, anghoid yoomo afu' za: te: mung" jo, ziri yhe: myang.

¹⁴ Houg: lang" Yesu gi Lafoem gam ri thang: phyang" apyaid atoo: moo khanham we' re" da" ashi" ri hang" we' adoem shau" zoo: loo: goo" baja"- ga" tid. Nya: cangzoo: yi we' hau: dang: ri shau" gyo: boem.

Noku Yhoem: Moo" khyoo: Yesu Yhe:

¹⁵ Yesu yo' cangzoo: yi gi Yerusalem khyoo: ju" yhe: boem bye. Houg: lang" Yesu gi noku yhoem: moo" khyoug: khyoo: vang yhe: wigi zi ung" zi qei mo, ri khaid thu' lho: ngei jag zoo: mo, da" zoobue" joem ri we' pheing" khyoug" ung" zoo: mo, da" tang khug joem ri; tu: phoug sain" pyam byid.

¹⁶ Nyang: gi Noku yhoem: moo" khyo" ceja" ziri nghoid loug we' aci: lid yen" nhang: nghoid da.

¹⁷ Hougsu" nyang: gi mung" byu yi ri nga" yhoem: ri byumyu" acang: joeb sho' mo da" akyu" mho' yhoem:- ga: myeing boem wa"- ga:Mangsoo tid jhoem: mougsoug" moo lhid" to"- nghoid loug we' nanu" gi hau: ziri khyangtoug: joem gau" to da" lug ug koid pyam boem bye- ga: jhoug" byid: da.

¹⁸ Hau: khyoo: ri khainjung agyi moo" yo' tarha" sara yi shaug" gyoo: lang" Yesu ri said pyam wa khyoo: sho: lo boem- Khasu" wim ga: ri mung" byu yi dangain" nyang jhoug" byid: da" khyoo: ri mau" nyid boem yoomo-nyang: ri gyoug ago".

¹⁹ Myenthang: ju" loo lang" gi Yesu yo' cangzoo: yi gi voomoo" mo zheung: thu' lo" ago".

Lafoem Gam Mo Jhau" Yu Khyoo:

²⁰ Hau: thang: nab kyoo no" re- Yesu yo' cangzoo: yi so" lid: lo" nyid da" uri hau: lafoem gam gi gam, goin" nyang: kyoug shid: jo, ziri myang ago".

²¹ Houg: lang" Petru gi myid: boin: lo wigi Yesu ri sara we"- yu" we' nang nheung" kho' da" lafoem gam gi kyoug shid: byug bye nhung:- ga: tid.

²² Yesu gi phoug tu" lho: nyangnu" ri Mangsoo ri loem" jeung" myid ge".

²³ Ngoo nanu" ri deung" deung tid zigi nyang: nya: nheigloem: khoug: moo ug vho" zi aboo loo: za: tid zigi bui" wa, ga: loem" jeung" mo, hang" nghoid loug we' he: da" boem ri boem nang yu: loo" we' hau: lho: panglai khyoo: gyo" vang loo" we' ga: tid nghoid rigi hau: zigi nyang: tid ziyo' dakhyoo: bue" loo wa nghoid.

²⁴ Hougsu wigi ngoo nanu" loem" jeung" myid yo, daja: ja: mho' ri hau: zi yo" yu wa.

²⁵ Nanu" akyu" mho' yab, jo, uri nanu" ri shoid too" mo, da" yooboo ri khyoid byid: ge' Houg: lang" za: moug: khung: tho' mo Phoo, Mangsoo: gi nanu" shoid vhang: da" yooboo joem ri we' khyoid pyam byid wa nghoid.

Yesu Ci: Da" Amyeing" A: na: Ri: Myid: Yu" khyoo:

²⁷ Yesu yo' cangzoo: yi gi Yerusalem voo moo dalheung: doem ju" lo ago"- Yesu gi Noku yhoem moo so" yen" uri Khainjung yi yo' tarha" sara yi zaug: ludaid yi gi nya: jang" moo re" lho:

²⁸ Nang hau: gu: ri hang" amyeing" akhang" khyo" koid lha"» ga: Yesu ri myid: boem ago".

²⁹ Yesu gi nyangnu" ri ngoo nanu" ri dang: dakhoin" myid: yu" ba- nanu" hau: ziri yo" phoid: kyoo" lang" gi ngoo we hau: gu: hang" amyeing" akhang" khyo" koid ziri tid kyoo" wa.

³⁰ Yohan byid: da" Babtisma gi Mangso amyeing" akhang" khyo" nghoid la".- anghoid lang" gi byu da" amyeing" akhang" khyo" nghoid la". ngoori tid kyoo" ge' ga: tid.

³¹ Houg: lang" nyangnu" gi Mangso: amyeing" akhang" khyo" nghoid ein: tid ri gi houg: su" nghoid rigi nanu" ciwim wigi ngoori aloem" go" la"» ga: tid loo wa.

³² Houg su" wigi byu da" amyeing" akhang" khyo" nghoid- ein: ngoonu" tidboem wa la' ga: nyang: cang" nyang sham go" nyid boem (nyangnu" gimeingbyu yi ri gyoug boem ago"- khasu" wim ga: ri byu myoo" sho' mo, gi Yohan gi Lapi gyeung" nyang: nghoid ga: myid nyid ago".

³³ Houg: lang" nyangnu' tid zigi ngoonu" asi ga: Yesu ri tid ago". Yesu we' nyangnu" ri hau: gu: ce: amyeing" akhang" yo' koid ziri ngoo we' nanu" ri atid kyoo" wa"- ga: tid.