ESAIA 31 - Lacid Common Language Bible

Aseing gi Yerusalem ri Goem Loem Byid: wa khyoo:.

¹ Egutu mung" khyoo: pang" thoug wa ziri yhe: mho' da" bang: gi joem: lo" abye:. Nyangnu" gi Egutu da" gyidab yoem: nghoid da" myang: joem myang: rheing" joem yo' gyizoo: yiri khau: nghe: ago". Nghoid loug we' nyangnu" gi Israela da" gyeung" shang: da" Aseing Mangsoo ri akhau: nghi: nghoid ago". Pang" thug wa shid re" we' nyang: ri amho' goo" nghoid da:.

² Nyang: cikoid nyid ziri nyang: se' da:. Nyang: gi yau: khe" kyi" khyeug zi nhang: kaid wa. Akhyeing" da" bang: ri yooboo dam byid: wa yo' houg bang: ri goem loem byid: da" bang: ri yooboo dam byid: wa shid re" nya: da" kyug nhain' da" ziri nyang: bue" sho' koid thu kaid da:.

³ Egutu byu yigi yu phara" joem anghoid- nyangnu" xangsu: byu yi za nghoid ago'. Nyangnu" da" myang: joem gi mougkhung: dei: noem anghoid. Aseing moo" zei: kaid lang" yoem: bo da" byumyu" joem gi gyoeb gyo" lo" wigi yoem: neing: da" byumyu" yigi byed gyoo" lo" byug wa. Eig loem: goin phyo' shoin' pyam zi shoug" goo" wa.

⁴ Aseing gi ngoo ri «Yang zung" bang: khayhi' kyi: nyhoo: nyhoo:- gougnyhoug ri ngaid said da" khangkhyi ri nyangnu" ayo" kyug tang" kaid nghoid ago'. Hougsu" nyang:- Ziun boem ri goem loem nyid da" myhang: thang Aseing nga" lo, mo hang" we' ayo" toem' pyam nghoid ago".

⁵ Ngho' nu" joem ri goem loem byid: wa shid re" ngho' soid dang moo dang: lheing: yen" da" ngho' yhang: ti" ngoo myhang: thang Aseing gi Yerusalem ri goem loem byid: lho: gyi zung" byid: wa» ga: ngoo ri tid da:.

⁶ Aseing gi «Israela byumyu" yi we"- nang gi ngoo ri gyi koid lho: yooboo shoid abye:. Nghoid loug we' akhid" nga" jhang doem tau" loo we'.

⁷ Ngei yo' sheing: wigi nanu" koid to" da" yooboo bui" nhang: da" yu phara" soolhoo: joem ri nanu" dangain" mo, she: pyam goo" wa da" ayo, ju" lo goo" wa.

⁸ Asuri gi gyikhaid pui" moo phyo' shoin' pyam zi shau" wa. Nghoid loug we' xangsu: byu yoem: so' yo' anghoid wa. Asuri byu gi gyikhaid jang: moo tang" phang: loo" goo" wa. Nyangnu" da" zoolu: yigi join koid pyam byid: zi shoug" loo goo” wa.

⁹ Nyangnu" da" khosen gi gyoug wigi tang" phang: loo" goo" wa. Gyizoug: yigi sung gyoug boem yoomo nyangnu" gyikhaid dungkhoin: joem ri she: pyam too" kho' loo goo" wa» ga: tid. Yerusalem mo coung" nghei shau" da" Aseing yo' xoin" shid re" myi: nghe' too" su: Aseing tid too" bye:.