APOEM AYANG: 4 - Lacid Common Language Bible

Ka-in yo' Abela

¹ Hau: thang: Adam gi nya: yhoem: seing: myhi' yo' zoem" wigi myhi' zeing gi zoonu" gung bui" bye:. Nyang: gi yuggi zoo: khu: wigi «Aseing pang" thoug byid: yoomo ngoo gi yuggi zoo: yoo" bye:» ga: tid. Houg: yoomo nyang: ri Ka-in ga: myeing myheing.

² Hau: thang: gootu: yuggi zoo: Abela ri doem khu: bye:. Abela gi yang zung" su: bue" lo. Ka-in gi yoo moo" dain" moo" zei: zoo: su: nghoid.

³ Danyid" da" bidnyid moo Ka-in gi nya: da" shivoo: shiloem ci: re" lho: Aseing ri xoin" ngei" byid:.

⁴ Hau: thang: Abela gi nya: yang phung: mo xang: shi" xang" da" yang nu" dadu: ri said lho: ge nyeing" thang ziyo' xoin" re" ngei" byid: bye:. Aseing gi Abela yo' nya: xoin" ri nheugshid: ziyo' kham: yu bye:.

⁵ Nghoid loug Ka-in yo' nya: xoin" rigi lhoem: ngeug pyam byid:. Ka-in gi nheig joem: yo: wigi myonhoo: byo, byug bye:.

⁶ Houg: lang" Aseing gi Ka-in ri «nang ci: yoomo nheig yo: la"- ce: gang mo re" myonhoo: byo, la".

⁷ Nang gi ge da" moo" ri zei: nghoid rigi nang yinoug soem" si' bue" nyid wa nghoid loug we' nang gi age moo" zei: yoomo yooboo gi re" khoem" duang: moo vhoeb jo. Hau: zigi nang ri vhoebkhang" nau nyid nghoid loug we' nang gi houg: ri ung: pyam ca"».

⁸ Hau: thang: Ka-in gi nya: nhung" Abela ri «Sa- dain" khyoo: yhi: shang» ga: tid lho: nya: tang: dain" khyoo: yhe: lo" nyid uri Ka-in gi lheing: lo lho: nya: nhung" Abela ri said pyam bye:.

⁹ Aseing gi Ka-in ri «Re" nhung" Abela khayoo: nyid la"» ga: myid:. Nyang: gi «Ngoo asi'. Nga" nhung" ri lhoug zung" nyid yug ein: ngoo ri jho: lha"» ga: phug tid.

¹⁰ Hau: thang: Aseing gi «Nang gi ce: gang mo he: da" gyoug pho" mo" zei: la"- re" nhung" da" suid" gi latoo: phug byid: wa shid re" mho' yoid da" thui: yhang: ti" myidjang mo ngoo ri yoid ngau nyid.

¹¹ Nang gi nheing" khoin" zang" wigi myidjang moo: yoomoo" dain" moo" yo" zei: loo: wa zi anghoid. Hau: myidjang gi nang re" nhung" ri said uri suid" kham: yu wa shid re" nya: nhoid fo' lho: re" nhung" da" suid" ri shug too" bye:.

¹² Nang gug zoo: shivoo: sho" nghoid loug we' myidjang mo gug zoo shivoo: thu wa zi anghoid. Nang gi yhoem: yoo ayoo" mougmyid tho' moo so" lheing: yen" ca" wa nghoid».

¹³ Houg: lho: Ka-in gi Aseing ri «He: da" yooboo dam gi sung thain:- ngoo atho' ung: zeing:.

¹⁴ Nang gi ngoo ri mougmyid tho' mo we' re" shidkhoin" mo we' khaid thu pyam nyid da:. Ngoo gi mougmyid tho' moo yhoem: yoo ayoo" nyid yen" wa bye:- ngoo ri myang mo, hang" we' ngoo ri said pyam boem wa bye:» ga: tid.

¹⁵ Nghoid loug Aseing gi «Hougsu" anghoid wa. Dayug yug nang ri said pyam rigi nyhed lheing: latoo: phug zi shoug" wa nghoid» ga: tid. Ka-in ri myang mo, nyang: ri alhoem: said wa shid re" Aseing gi lhid zid" alhoo: tab byid: kaid.

¹⁶ Houg: lho: Ka-in gi Aseing shidkhoin" mo thu khare" lho: Eden khyam: da" bidthu shoid moo jo, da «So" lheing yen"» ga: da" joyoo daloem: moo yhe: nyid byug bye:.

Ka-in da" Amyed Ashen Yi

¹⁷ Ka-in yo' nya: yhoem: seing: myhi' gi zooshang: yuggi nu" dayug yo" lho: Enug ga: myeing myheing byid:. Hau: thang: Ka-in gi voomoo" daloem: ri tam: lho: nya: zo: myeing khyo" voomyeing myheing bye:.

¹⁸ Enug gi yuggi zoo: Irad ri yo" lho: Irad gi Mahuyala da" nya: phoo nghoid. Mahuyala gi Lamed da" nya: phoo Mathushaela ri khu: myhu: kaid bye:.

¹⁹ Lamed gi Ada yo' Zila ga: da" yhoem: seing: myhi' eig yug yo" da:.

²⁰ Ada ga: su: gi zoem" cang nyid lho: gyo,- vu,- gougnyhoug myhu: zoo: mo, da" nya: phoug" phyid" Yabala ri khu: myhu: kaid.

²¹ Yabala da" nya: nhung" Yubala gi teing she: khoolhang moid da" music si' mo, dangain" da" phoug" phyid" nghoid.

²² Zila gi gyid: mid" yo' joto' ri jonu" aja: ja: baid thu su: Thubala Ka-in ri khu: kaid. Thubala da" nya: nhammoo" gi Nama ga: su: nghoid.

²³ Lamed gi nya: yhoem: seing: myhi' tang: ri «Ada yo' Zila we" gyo: yu" ge'. zooyam zoo: dayug gi ngoo ri baid yoomo ngoo nyang: ri said pyam bye:.

²⁴ Ka-in ri said mo, yooboo dam nyhed lheing: shoug" nghoid rigi ngoo ri said su: rigi nyhed xe: nyhed lheing: shoug" wa zi nghoid» ga: tid.

Shed yo' Enusha

²⁵ Adam yo' nya: yhoem: seing: myhi' gi gootu: yuggi zoo: doem yo" lho: yhoem: seing: myhi' gi «Mangsoo gi Ka-in wigi said pyam su: Abela da" gung khoo: yuggi zoo: dayug ngoo ri byid: bye:» ga: tid. Houg: yoomo nyang: ri Shed ga: myeing byid: bye:.

²⁶ Shed gi Enusha ga: da" yuggi zoo: ri yo". Hau: ayo, mo shid" wigi byu yigi Aseing gyeung" shang: myeing moo mho' yoid coung" pid shid" loo bye:.