2 TIMOTHI 3 - Lacid Common Language Bible

Lo" Thang Bidnyid Da" Khyoo:

¹ Lo" thang da" bidnyid moo yau: khe" da" ayo, gi ju" loo wa ziri se' nyid we'.

² Byu yi gi nyang: nya: da" akyu" ri za: shoo: mo, myo, no, vhoo: boo mo, nghoid thui: gyoo: mo, nheigloem: myhang: phau: khuang mo, za: bue" loo wa. Nyang: nu" gi juang" yi gei sang: yen" mo, myhi, phoo ri thougtheung mo, - jeju" ase' boin: mo, noku loem, khoug: khyoo: ci: aboo mo, bue" lo boem wa nghoid.

³ Nyang: nu" gi nheig ase' khyeig bang:- jheddab da" nheigloem: abo boem ziyo' nheig ashid: mo, akhyeing" ashoeb moo" zei: nyid mo, sube" myonhoo: ri lhu: pyang: byid: wa shid re" gei sang; shang pyang: yen" mo, subi" yo' sham: ashoin" wa da" khyoo: acang loo: za: lhoid zoo: lhoid shug cang nyhen " zhoung: yen" mo, athoug" akhyoug: koid yen" mo, ju" lo boem wa. Hau: tho' moo gootu: nyangnu" gi ge, khyoo: ce" ja: ri nghoid loug we' avhoo: angei mo, nghoid boem wa.

⁴ Khoug: zoug" myhang moid mo, khoug: vhoid' loo: zhu: zoo: noug mo, nheigloem: azoung" ziyo' nheigloem: myhang: yoomo phau: khuang nghoid boin: wigi nyangnu" gi Mangsoo ri jheddab wa gung khoo:- nyang: nya: da" pyo: khyoo: ri je" vhoo: bang: nghoid boem wa.

⁵ Nyang: nu" gi yha" da" noku thung ri ri atho' dapyam: za: bo cang mhau' boem lho: wigi hau: noku thung" mo, phung" yoeb, rigi ngeug pyam mo, nghoid nyid boem ago". Houg: yhang: te" byu yi ri we' jang" pyam' nyid we'.

⁶ Nyang: nu" mo dayham" bang: gi sube" yhoem: moo; cang vang yen" lho: asi aboin: khyo" ase' myid soin: yu" da" yoem: nu: nyid myi: yi: yi ri nyangnu" lo, moo vang sho' mhe, yu ago- hau" myi: yi: yi gi nyangnu" shoid lid lo" yooboo yoomo nheigloem: yoolid: voin, lho: myid' apyo: zoore"- gung shoo" aco' ajhoid khyoo: aja: ja: moo bo myu: lo" wigi

⁷ Jhau" mho' khyoo: ri kham: yu wa shid re" kha: nham, we' vhongei yoem: kaid' nyid boem nghoid loug we' nyangnu" gi hau" deingmain" da" khyoo: ri se' jhang: jang" khyoo: kha: nham, we' ayo" ju" loo, lo: boem.

⁸ Akhui" yanne" yo' Yanbre eig yug gi Moshe ri thoutheung ngeug pyam' ziyo' dakhyoo" ti"- he: byu joem we' hau: deingmain" khyoo: ri thoutheung ngeug pyam nyid boem ago". Hau" byu joem gi nyangnu" ase' myid soin: yu" boem, loo: yoomo loem" jeung" khyoo: moo byo, yoin" soem" joem: lo" boem, ago".

⁹ Nghoid loug we' nyangnu" da" oung: doid' lo" khyoo: gi hau: gu" mo jain" lho: myang" sho' yo" kham, zoo: goo" wa zi anghoid. Khasu" wim ga: ri Yanne yo' Yanbre" eig yug moo bue" lo da" khyoo:- myang thu' lo yhang: ti"- he: da" byu yi khayhi' ko" nyid boem khyoo: joem ri we' yu dangain" bang: da" shid khoin" moo myang thu loo wa zi nghoid.

Thang: Thang Mo: Pyeing: Dang:

¹⁰ Nghoid loug we' nang koem gi nga" da" jhoug" myeing" jhoug" thui: nga" asam" avoid yo' nga" kang: so' dei khyoo: moo myid soin' nyheung lo ziyo' dakhyoo" ti" cang lo" abye:. nga" da" loem" jeung khyoo:- ngoo nheigloem: sheung: kham, zeung: khyoo:- nga" da" jheddab myid- ngoo yoem: kaid' thoug shang" lo da" khyoo:-

¹¹ Nga' da" kyi" khyeug shen" yhen lo da" khyoo: joem ri bo myang bo si' bye. Antioki voo, Ikoni voo, Lustra voo joem moo ngoo thoung" shau" da" gyoug pho" shen" yhen pyi: sho: khyoo: yo' ngoo kham, zo: loo bye: da" khyoo: joem dangain" ri nang se' nyid gu nghoid bye. Aseing: koem gi hau: khyoo: dangain" jang mo ngoori khyoid yu abye:.

¹² Gyeing" nyang: Khristu moo kangso' dei lho: tarha" ri phau" cang khyoo: moo kangso' dei nyid noug mo, hang" nghoid loug we' shen" yhen kyi" khyeug da" jam, jau ri shau" boem wa zi nghoid.

¹³ Akhyeing" ashoeb, da" byu yi yo' mhoug zoo: mhoug shug yen" da" byu yi koem gi-subi" yo" mhoug zoo: lang" nyang: nyang: ri we' mhoug zo: zi doem, thoung" shau" wigi akhyeing" ashoeb, ziyo' age da" khyoo: moo age da" khyoo: khyoo:- je" je, jhen" vang lo boem wa zi nghoid nyid.

¹⁴ Nghoid loug we' nang koem gi jhau" mho' da" khyoo: ri kham: yu wigi geing: geing: teing teing loem" jeung" nyid bye: da" hau: deingmain" da" khyoo: moo xo' lho: d acang yhe: loo" we'. Re" sara: gi hang" nghoid ziri nang se' nyid gu nhgoid bye.

¹⁵ Nang gi zoonu" pyaid mo nyang:- se' da" akhyoo" bo jo, wigi Khristu Yesu ri loem" jeung" khyoo: yoomo khyoid yu khyoo: ri shau" yu wa shid re" khyoo: shed' vhu" she: da" hau: gyeungshang: da" jhoem: mougsoug" ri goolhoo" za: si' bye: su nghoid ziri we' daboin: nyid we'.

¹⁶ Hau: jhoem: mungdang: dangain" gi Mangsoo nyang: yoem: foin: byid: ziyo' lhid" to" zi nghoid yoomo deingmain" khyoo: ri jhoug" byid: wa ziyo' shoid vhang; khyoo: ri we' yoobo toin" shid' gyikoid lho: jhoug" byid: nyid. Shoid vhang: lo" khyoo: ri so' koid so' nyheung wa ziyo' jo da" kangso' dei khyoo: moo jhoug" byid: mhoo, byid: wa shid re" akyu" bo.

¹⁷ Houg: yoomo Mangso da" moo" ri voin, vu, su: gi ge da" moozoo" ja" khang" moo" ri zei: wa shid re" yoem: so' byeung" sho' kaid' ci: lo" jang" moo Khin' azi akhoo: joeb, loo wa zi nghoid bye.