2 SAMUELA 9 - Lacid Common Language Bible

David yo' Mephiboshed

¹ Danyid" nyid" ri David gi «Hid moo Sholu ikoin deungkhu: mo byu dayug yug deing nyid shigo" la". Nyid nghoid rigi Yonathan da" shid re" ngoo nyang: ri jheddab myid ci: shug nau zi nghoid» ga: tid.

² Hougmoo Sholu ikoin deungkhu: mo Ziba ga: myheing da" dei zoo: dayug nyid. Nyang: gi David jhang khyoo: vang yhi: wa shid re" tid to" zi shoug" su: nghoid. Khokham gi «Nang Ziba nghoid la"» ga: myid: bye:. Nyang: gi «Aseing we" re" dei zoo: nghoid nyid da» ga: doem tid.

³ Khokham gi nyang: gi «Ngoo koid wa ein: Mangso shidkhoin" moo dangsoo" byid: to" ziyo' dayhang: ti" deingmain" ziyo' nheig khyeug shoomyen: khyoo: Sholu ikoin deungkhu: byu yiri ci: shug wa shid re" nyangnu" dayug yug nyid boem shi" ago" lha"» ga: myid: da:. Ziba gi «Yonathan zooshang: yi mo dayug nyid ashi"- nyang: gi khyid: gyau: nyid da» ga: tid.

⁴ Khokham gi «Nyang: khamoo nyid» ga: myid:. Ziba gi «Nyang: Lodeba voogung mo Amiela da" nya: zoo: Makhira da" yhoem: moo nyid nyid da» ga: tid kyoo" bye:.

⁵ Hougsu" nghoid yoomo khokham David gi nyang: ri khi: nhang: kaid bye:.

⁶ Yonathan da" nya: zoo: Sholu da" nya: myid: Mephiboshed ju" lang" David shidkhoin" moo phau" myang: ziyo' goeb pid bye: zi nghoid. David gi «Mephiboshed» ga: yoid lang" nyang: we' «Aseing: we" re" dei zoo: hid: moo nyid» ga: doem phug tid bye:.

⁷ David gi «Agyug lhe"- re" phoo Yonathan da" jeju" yoomo nang ri ngoo nheig khyeug shoomyen: wa zi nghoid. Ngoo nang ri re" phoug" Sholu seing: to" da" mougmyid dangain" ziri doem byid: wa. Houg: lho: nang nga" zoo: shug zoobui" moo khanham we' yo" zo: nyid wa zi nghoid» ga: tid bye:.

⁸ Mephiboshed dalheing: dam goeb pid wigi «Aseing: we"- ngoo gi lakhuid" shid: dadu: yhi' lang" amoin: loo. Ciwim yoomo nang nga" adang moo thei" ge nyid la"» ga: tid.

⁹ Hau: thang: khokham gi Sholu da" join Ziba ri khe: yu wigi «Ngoo re" aseing: da" nya: myid: Mephiboshed ri Sholu yo' nya: ikoin deungkhu: wigi seing: da" jonu" dangain" ziri ab byid: nyid zi nghoid.

¹⁰ Nang we' re" zoo: yi we' re" join yi we' wigi re" aseing: Sholu ikoin deungkhu: byu yi shid re" yoothung" tung: yoo koid wigi gugzoo mei: loem: yhoem" yu lho: nyangnu" da" zooshug shid re" lo" pang" thoug byid: nyid ge'. Nghoid loug we' Mephiboshed koem' gi khanham we' being" voo dayug ri yhang: ti" ngoo nga" zooshug zoobui" moo do" zho" nyid wa zi nghoid» ga: tid. (Ziba gi zoo: daxe: wim: yug yo' dei zoo: eig xi: yoo" su: nghoid)

¹¹ Ziba gi «Nang aseing: khokham amyeing" dang: dangain" ziri ngoo koid wa zi nghoid» ga: tid. Houg: yoomo Mephiboshed gi khokham da" nya: zooshang: dayug yhang: ti" khokham da" zooshug zoobui" mo zo: nyid bye: zi nghoid.

¹² Mephiboshed gi Mikha ga: da" zooshang: zoo: dayug yo" da:. Ziba da" ikoin deungkhu: byu yi dangain" koem' gi Mephiboshed da" dei zoo: joem bue" loo bye: zi nghoid.

¹³ Hougsu" yoomo Yerusalem mo khyid: eig shoid goin" gyau: da" Mephiboshed gi khokham zoo: shug zoobui" moo nya: zooshug ri zo: nyid da:.