2 SAMUELA 8 - Lacid Common Language Bible

David da" Gyi Oung: Khyoo:

¹ Akhid" ayo, akhyeing: dajhi' myang" lo" thang: ri khokham David gi Philisti byumyu" yiri doem khaid zain: ziyo' nyangnu" oung: pyam yoomo mungdain: goin" ziri vhoebkhang" nyid da" nyangnu" da" yoem: vhoo" ri yo" ze" toem' pyam bye: zi nghoid.

² Hau: thang: nyang: gi Moba byumyu" yiri meing: zain: oung: pyam bye:. Nyang: gi thung: byu yi yugkhang" moo" ri myidgung moo jhang" nhang: wigi hau: jang" mo soem" yug mo eig yug yug ri she: yu lho: said pyam bye: zi nghoid. Houg: yoomo Moba byumyu" yi we' David da" vhoebkhang" da" akhoug: moo vang wigi nyang: ri kheing" kaid bye: zi nghoid.

³ Hau: thang: nyang: gi Uphrad gyid lang da" gyid moin du mo mougmyid ri doem yo" vhoebkhang" wa shid re" Zoba mung" ri vhoebkhang" da" Rehob nya: zoo: Suri khokham Hadadeza ri meing: zain: oung: pyam bye: zi nghoid.

⁴ David gi nya: da" myang: jui: da" byu dakhyeing" nyhed shoo: yo' khyid: soo" so" da" gyizoo: eig moid ri yo" myheig yu bye: zi nghoid. Nyang: gi myang: rheing" dasho: shid re" myang: gi" koo: yu wigi deing gu: dangain" ri khyid: zain: khyoug" bye:.

⁵ Damasku voomoo" mo Suri byu yi khokham Hadadeza ri re" bo pang" wa shid re" gyi daphung: ri nhang: kaid uri houg: bang: ri David khaid said yoomo byu eig moin eig khyeing" ri said pyam bye: zi nghoid.

⁶ Hau: thang: nyang: gi nyangnu" moug: moo gyidab koid to" lho: nyangnu" we' nya: da" vhoebkhang" akhoug: moo nyid nyid ziyo' nyang: ri we' kheing" kaid byid: boem ago". Aseing we' David ri khyi khang" moo" moo oung: doid nhang: byid: da:.

⁷ Hadadeza da" moo" voin bang: ci: da" sheing: goo joem ri we' David shoug" myheig yu wigi Yerusalem khyoo: yu loo" bye: zi nghoid.

⁸ Nyang: gi Hadadeza vhoebkhang" da" Beta yo' Berothi voomoo" mo gyid: mid" myoo" sho' ri we' yu lo" byug bye:.

⁹ Akhid" Hadadeza da" gyizoo: dangain" ziri David khaid zain: oung: bye: ga: ziri Hamad khokham Toi shoug" gyoo: bye: zi nghoid.

¹⁰ Houg: yoomo Toi gi nyang: yo' myoo: sho' lheing: khaid zain: yu" bye: da" Hadadeza ri yo" zain: oung: da" khokham David da" oung: doid khyoo: ri coung" wigi lo, zei: zei: wa shid re" nya: zoo: Yoram ri nhang: kaid bye:. Yoram we' ngei sheing: gyid: mid" yo' koid to" da" jonu" joem ri David jhang jhungshug yhe: byid: bye:.

¹¹ Khokham David gi byumyu" yi jang" mo yo" oung: yu bye: da" ngei sheing: yo' dage" noku jang: moo ci: yhung: wa shid re"

¹² Edom- Moba- Amon- Philisti yo' Amaleg byumyu" yi jang" mo nyang: ci: lo da" lanyhoeb ngei sheing: joem we' Hadadeza jang" mo shoug" yu da" jo, nu' joem ri we' shugbyid: bye: zi nghoid.

¹³ David gi xoo" langkhung" moo Edom byumyu" yi damoin shid khyeing" ri yo" said pyam lho: doem tau" lo uri je" wigi myeing gyi: loo bye: da:.

¹⁴ David gi Edom mung" dangain" jang" mo gyidab koid to" wigi nyangnu" dangain" mo, we' nyang: vhoebkhang" akhoug: moo nyid nyid boem ago". Aseing we' David ri joyoo khyi' khang" mo" moo oung: doid nhang: nyid da:.

¹⁵ David gi Israela mung" dangain" jang" moo vhoebkhang" nyid wigi nya: byumyu" yiri deingmain" tarha" ziyo' khanham we' dang: phyed byid: nyid da:.

¹⁶ Zeruia da" nya: zoo: nghoid da" Yoab gi gyizoo: yiri vhoeb khang" da" zoug: zeing dayug nghoid da:. Ahiluda da" nya: zoo: Yehoshaphad gi mhoomyid: shen" dam ri lhid" xoem" bang: da" nheigboo nghoid nyid da:.

¹⁷ Ahitub da" nya: zoo: Zadog yo' Abiatha da" nya: zoo: Ahimeleg tang: gi khainjung tang: nghoid. Seraia gi tarha" rung" mo moo" seing: nghoid nyid da:.

¹⁸ Yehoiada da" nya: zoo: Benaia gi David ri lhoug zung" da" nheigboo nghoid wigi David da" nya: zoo: yuggi nu" yi we' khainjung yi nghoid nyid da:.