1 SAMUELA 9 - Lacid Common Language Bible

Sholu gi Samuela yo' Shoug" go" Khyoo:

¹ Akhid" Benyamin akung: ako' mo Kisha ga: su: gi yoo" zoo: yoo" shug lho: phau" myang: wa asam" bo da" byu dayug nghoid. Nyang: gi Aphia kung: mo nghoid nyid da" Bekhora ikoin deungkhu: mo gyoo" re" da" Zerora da" myid zoo: Abiela da" nya: zoo: nghoid nyid da:.

² Nyang: moo Sholu ga: myheing da" yuggi zoo: dayug yo" da:. Nyang: gi gye" yung" sam" dab da" yuggi zoo: dayug nghoid. Sholu gi Israela mung" goin" jang" mo byu dangain" tho' moo vhuloem daloem: jain" sho' myhang: su: nghoid lho: je" wigi myonhoo: yung" su: nghoid da:.

³ Akhid" Kisha seung: da" loo zei: dayham" khyoodam: dam: byug yoomo nyang: gi Sholu ri «Nang yo' dage" dei zoo: dayug shu" wigi hau: loo zei: joem ri cang shoo: ge'» ga: tid.

⁴ Houg: lang" nyang: tang: gi Ephrim boem moug: yo' Shalisha moug: thang sho' moo cang sho: yen" nghoid loug we' hau: loo zei: joem ri amyang loo: nghoid ago". Hougsu" nghoid yoomo nya: tang: gi Shalim mung" khyoo: xo' sho: yhe: loo" nghoid loug we' hau: joyoo moo we' loo zei: joem anyid nghoid da:. Hau: thang: ri Benyamin da" mougkyoo" khyoo: yhe: shoo: nghoid loug we' amyang shi" nghoid ago".

⁵ Nya: tang: gi Zupha moug: khyoo: ju" yhe: lo" uri Sholu gi nya: dei zoo: ri «Nyha" tang: yhoem: khyoo: doem tau" loo" loo goo"- nga" phoo gi loo zei: joem tho' nyha" tang: ri seing" kho" nyid wam bye:» ga: tid.

⁶ Dei zoo: gi «Lang" shi" shang he: voogung moo nyang: tid zi dangain" lhung jo lo wim da" gye" phau" myang: cang bo da" gyeung" shang: byu dayug nyid. Hau: yug jang" moo yhe: yu" shang. Nyha" tang: da" loo zei: ri khamoo: yhe: shoug" shoo: wa ziri nyang: nyha" tang: ri yo" to' tid kyoo" abe» ga: tid.

⁷ Sholu gi «Nyha" tang: nya: jhang khyoo: yhe: nghoid rigi ciyhe: se' byid: wa lha". Nyha: tang: da" yoovoin moo we' zookhoo: aboo loo:- nyang: ri byid: wa shid re" nyha" tang: moo ciwe' ayoo" loo: anghoid rhe"» ga: myid:.

⁸ Hau: dei zoo: gi «Nga" jang" moo ngei dapyi" bo- ngoo hau: ziri nyang: ri byid: lang" nyha" tang: ri loo zei: khamoo: myang wa ziri nyang: gi nyha" tang: ri yo" tid kyoo" wa zi nghoid» ga: tid.

^9-11 Sholu gi «Ge da" khyoo: nghoid da- sa yhe: yu" shang» ga: tid. Hougsu" nghoid yoomo hau: gyeung" shang: da" byu dayug nyid da" voogung khyoo: nya: tang: gi yhe: loo" bye:. Hau: voogung jo, da" boem khyoo: nya: tang: do, lo" ri gyid kham: re" da" myiyi: zoo: yi daphung: yo' shoug" go". Nya: tang: gi myiyi: zoo: yiri «Voogung khoug: moo myo, gyeing: su: anyid la"» ga: myid: ago". (Hau ayo, aboin: moo gi lapi: ri ‹Myo, gyeing: su:› ga: myheung wigi kha: yo, nghoid loug we' byu dayug yug gi Mangso jang" moo dang: myid: nau uri «Myo, gyeing: su: jhang yhe: yu" shang» ga: wigi nyang: tid wa zi nghoid.)

^12-13 Myiyi: zoo: yigi «Nghoid bye:- nyang: nyid da:- Akhid" nyang: gi re" tang: da" shid moo za: shi" danghoid. Re" tang myab nghoid rigi nyang: ri re" tang: khaid myhi: shi" goo" wa zi nghoid. Re" tang: voogung moo ju" vang loo" yo' nyang: ri myang zi nghoid. Boug gung mo xoin" to' jang" moo byumyu" yigi xoin" ngei" byid: goo" wa ga: yoomo akhid" nyid" hau: voogung khyoo: nyang: ju" wa zi nghoid. Hau: xoin" ri nyang: xang: shi" mainkaid byid: wa zi nghoid yoomo hau: jang" moo nyang: aju" ju" gi khe: to" da" byumyu" yigi ciri we' yo" zo: shid" wa zi anghoid. Re" tang: akhid" nyang: yhe: nghoid rigi zoo: wa shid re" nyang: boem khyoo: ado, loo" shi" uri nyang: yo' re" tang: shoug" goo" wa zi nghoid» ga: wigi tid kaid ago".

¹⁴ Houg: yoomo Sholu yo' nya: dei zoo: gi voogung khyoo: do, lo" nyid uri Samuela gi nya: tang: shid moo noku joyoo khyoo: do, yhe: lo" nyid ziri myang kaid ago".

¹⁵ Anyinab Aseing Samuela ri

¹⁶ «Nab yo nyid" he: da" ayo, koo: ri Benyamin akung: mo byu dayug ri re" jhang khyoo: ngoo nhang: kaid wa zi nghoid. Nyang: gi nga" Israela byumyu" yiri vhoebkhang" wa shid re" nyang: ri Main kaid xu: foid gyoin byid: ca" wa zi nghoid. Houg: yoomo nyang: gi nyangnu" ri Philisti byu yi lo, mo khyoid yu wa su: nghoid. Nga" byumyu" yi kham zo: nyid da" yau: khe" khyoo: ri ngoo myang bye: ziyo' bo pang" wa shid re" nyangnu" yoid ngau nyid ziri ngoo shoug" gyoo: bye:» ga: tid.

¹⁷ Samuela gi Sholu ri shau" myang lang" Aseing gi nyang: ri «He: yug gi ngoo nang ri tid yug nghoid bye:. Nyang: gi nga" byumyu" yiri vhoebkhang" wa zi nghoid» ga: tid.

¹⁸ Hau: thang: ri Sholu gi «Khyam: khoem" nam moo nyid nyid da" Samuela jhang khyoo: yhe: wigi Myo, gyeing: su: khayoo: nyid lha" ein: ziri ngoo ri tid kyoo" we'» ga: myid: bye:.

¹⁹ Myo, gyeing: su: gi «Ngoo nghoid bye:. Noku joyoo khyoo: nanu" shi" yhe: loo" lang" ge'. Re" eig yug akhid" nyid" ngoo yo' dage" voem: zoo: wa zi nghoid. Nab kyoo' nab soin: ayo, ri nang myid to" da" khyoo: dangain" ziri tid kyoo" wa nghoid hau: thang: ri re" tang: ri re" de" kaid nhang: wa.

²⁰ Lid loo" bye: soem" nyid" koo: moo byug lo" da" loo zei: joem shid re" aci' nyid loo goo"- hau: loo zei: joem ri myang abye: go". Nghoid loug we' Israela byumyu" yi gye" vho: nyid su: gi hang" nghoid wa lha". Hau su: gi nang nyang: nghoid nyid da:. Nang yo' re" pho da" ikoin deungkhu: yi nghoid da anghoid lha"» ga: tid.

²¹ Sholu gi «Ngoo gi Israela byumyu" yi mo nge thang da" Benyamin akung: mo danghoid. Nga" ikoin deungkhu: we' nge thang zi nghoid nyid. Hougsu" danghoid nyid ziri nang ngoo ri ciyoomo houg: yhang: ti" tid lha"» ga: doem phug tid.

²² Hau: thang: ri Samuela gi Sholu yo' nya: dei zoo: ri yab zeing khyoo: shu" vang lo" wigi being" vo soem" xi: yug yo" zhung: da" zoobui" vhoem" thung moo joyoo byid: da:.

²³ Samuela gi voem: jhoug su: ri «Gootu: gam too" wa shid re" nang ri ngoo tid wigi byid: to" da" shoo" khyi' joem ri ci: ri" we'» ga: tid.

²⁴ Houg: yoomo voem: jhoug su: we' gootu: gam to" da" shoosain: ri ci: re" wigi Sholu da" shidkhoin" moo khyoo' byid: bye:. Samuela gi «Yu" we' he: zigi re" shid re" gootu: gam to" da" shoo" nghoid. He: ziri nang zoo: we'- he: ayo, moo ngoo khe: to" da" byumyu" yi yo' dage" nang zoo: wa shid re" ngoo soin' too" byid: zi nghoid» ga: tid. Houg: lang" gi Sholu we' Samuela yo' dage" hau: nyid" ri zoo: bye:.

²⁵ Nya: tang: gi noku joyoo mo wigi voogung khyoo: gyoo" lo uri nyangnu" gi Sholu shid re" yhoem: atho' pyam: moo yhoeb yoo soin' to" jang" moo: nyang: yhoeb da:.

Samuela gi Sholu ri Vhoeb Khang" su: Dayug Khyo" wigi Main kaid Xu: Foid Gyoin: Byid: Khyoo:

²⁶ Nab soin: myo, myang yid ri Samuela gi yhoem: atho' pyam: moo yhoeb jo, da" Sholu ri «Too' we' nang ri ngoo re" de" kaid ba» ga: tid. Sholu we' to' wigi Samuela yo' dage" khyoogung khyoo: thu yhe: lo" boem.

²⁷ Vooyam moo nyangnu" ju" yhi: lang" Samuela gi Sholu ri «Re" da" dei zoo: nyha" tang: da" shid khyoo: nhang: kaid we'» ga: tid. Dei zoo: gi shid khyoo: thu so" lo" thang: ri Samuela gi Sholu ri «Hid: moo daso' yab shi" we' Mangsoo tid da" dang: ri ngoo nang ri tid kyoo" wa» ga: xo' tid.