1 SAMUELA 3 - Lacid Common Language Bible

Samuela ri Aseing Thu' Shug Khyoo:

¹ Hau" bidnyid joem moo zooshang: Samuela gi Eli da" jhau" shid da" akhoug: moo Aseing ri dei dei byid: nyid ri Aseing jang" mo mungdang: we' athei" thu- nya: jang" mo we' ce" myo, myang we' athei" amyang wim nyid da:.

² Damyen ri myo, athei" myang lo: da" Eli gi nya: yab moo yhoeb jo,.

³ Samuela gi deing byeung" da" Dang: Theing Kuid: jo, da" younglho' joyoo moo yhoeb jo, da:. Hau: uri nab soin: myo, we' amyang shi". Myibung: we' dab jo, shi" ayo, ri

⁴ Aseing gi Samuela ri khe: da:. Nyang: gi shoug" gyoo: bye: «Aseing we"» ga: tu" kaid.

⁵ Eli jhang khyoo: gei lo" lho: «Nang ngoo ri khi: yoomo ngoo ju" ri" bye:» ga: tid. Nghoid loug we' Eli gi «Ngoo nang ri akhid: lo" doem yhoeb jo, we'» ga: tid lang" Samuela gi yhoeb yoo khyoo: doem vang lo".

^6-7 Aseing gi Samuela ri xo' wigi doem khe: nyid Aseing gi nyang: ri khanham we' akhe: yu" yoomo Aseing nghoid ziri yuggi zoo: asi' nghoid da:. Houg: yoomo nyang: gi to' wigi Eli jhang khyoo: lo" lho: «Nang ngoo ri khi: yoomo ngoo ju" ri" bye:» ga: tid. Nghoid loug we Eli gi «Nga" zoo: we" ngoo nang ri akhi:- lo" yhoeb jo, we'» ga: doem tid.

⁸ Aseing gi Samuela ri soem" lheing: ein: lheing: doem khe: wigi nyang: to' lho: Eli jhang khyoo: lo" lho: «Ngoo ri khi: yoomo ngoo ri" bye:» ga: tid. Houg: lang" Eli gi yuggi zoo: ri Aseing khe: nyid ziri boin: loo yoomo

⁹ Eli gi nyang: ri «Yhoeb yoo khyoo: loo" we' nyang: nang ri doem khe: nghoid rigi tid we' «Aseing we" re" dei zoo tam" gyo: nyid ein: tid we'» ga: tid. Houg: yoomo Samuela gi yhoeb cuang khyoo: doem tau" loo" bye:.

¹⁰ Aseing gi houg: moo re" yab kaid lho: shid mo yhang: ti" «Samuela- Samuela » ga: khe: nyid. Samuela gi «Tid we' Aseing we"- re" dei zoo: ngoo tam" gyo: nyid» ga: tid bye:.

¹¹ Aseing nyang: ri «Danyid" nyid" ri gyoug dain pho" moo" zoo" ri Israela byumyu" khoug: moo ngoo koid wa. Houg: khyoo: ri shoug" gyoo: bang: dangain" mo, khyid: bug loo" sho' dain zi shoug" wa.

¹² Hau: bidnyid moo Eli da" Deungkhu: ri thougtheung wa shid re" tid kyug da" dangain" ziri koid shid" jang" mo bain da" ayo, moo ju" sho' ngoo ci: shug wa zi nghoid.

¹³ Nya: zoo: tang: gi ngoo ri aphoug" akhyoid da" dang: tid bye:. Hougsu" tid ziri Eli si' nghoid loug we' hau: tang: ri atoem' yoomo nya: ikoin deungkhu: ri dapyaid goin" dam byid: wa ein: ngoo nyang: ri tid too" bye: zi nghoid.

¹⁴ Hougsu" nghoid yoomo xoin" ngei" ziyo' nghoid nghoid- xoin" jhungshug yo' nghoid nghoid- hau: gyoug pho" youg: noo yooboo ri khanham we' yo" khyoid pyam zi anghoid ein: Eli da" ikoin deungkhu: byu yiri ngoo bang bang jham' tang: too" bye:» ga: tid.

¹⁵ Samuela gi nab soin: ju" sho' yhoeb joyoo moo nyid nyid da:. Hau: thang: ri nyang: to' wigi Aseing da" yhoem: khoem" duang: ri phang kaid. Hau: nugyoo: gyo: da" dang: ri Eli ri tid kyoo" wa ziri nyang: gi gyoug nyid da:.

¹⁶ Eli gi nyang: ri «Nga" zoo: Samuela we"» ga: khe: Samuela gi «Shoug" gyoo: bye:. Aseing: we"» ga: tu" da:.

¹⁷ Eli gi «Aseing nang ri citid lha". Ce: noem ri we' azau" too". Nyang: tid dang: dangain" ziri nang ngoo ri atid kyoo" lang" Mangsoo gi nang ri gye" thain: da" dam byid: wa zi nghoid» ga: tid.

¹⁸ Hougsu" nghoid yoomo Samuela gi ce: noem ri we' azau" too" loo: za: dangain" ziri nyang: ri tid kyoo" bye:. Eli gi «Nyang: gi Aseing nghoid nyid da" nyang: moo je gi boin: da" khyoo: ri nyang: koid wa zi nghoid» ga: tid.

¹⁹ Samuela we' apyaid gyi: loo nyid uri Aseing gi nyang: yo' dage" nghoid nyid. Samuela ri Mangsoo tid da" mungdang: dangain" zi joeb byeung" lo da:.

²⁰ Hougsu" nghoid yoomo Samuela gi gyeing" nyang: Aseing da" lapi: nghoid nyid ziri mungdain: dathang: mo zi gootu: dathang: moo ju" sho' nyid da" Israela byumyu" yi dangain" gi se' lo boem bye:.

²¹ Aseing gi Samuela jang" moo thu shug wigi dang: tid yu" bye: da" Shilo joyoo moo nya: gung nyang: doem thu shug nyid zi nghoid. Samuela gi dang: tid nyid uri Israela byumyu" yi dangain" bang: gi tam" gyo: nyid boem.