1 SAMUELA 27 - Lacid Common Language Bible

Philisti Byumyu" yi Akhoug: Moo: Nyid Da" David

¹ David gi «Danyid" nyid" ri Sholu gi ngoo ri said pyam wa myang. Philisti byumyu" yi jhang khyoo: phang: vang rigi nga" shid re" je gi wa. Hau: thang: Sholu gi Israela mungdain moo ngoo ri sho: nyid zi theing: byug lang" gau: nyu: nyid wa zi nghoid» ga: nya: oungkhoug: moo: myid nyid da:.

² Houg: yoomo David yo' nya: byu khyug shoo: gi dalheing: dam Gad khokham Mokha da" nya: zoo: Akhisha jhang khyoo: yhe: loo" bye:.

³ David yo' nya: byu yigi nyangnu" deungkhu: yo' dage" Gad voogung moo theing: nyid boem. David we' nya: yhoem: seing: myhi' eig yug nghoid da" Yezrela voogung mo Ahinoam yo' Kharmela voogung mo Nabala da" cougmoo" myhi Abigela tang: yo' dage" nyid nyid da:.

⁴ David Gad voogung khyoo: phang: loo" bye: ga: da" lu dang: ri Sholu shoug" gyoo: lang" nyang: ri sho: yen" moo" zoo" ri theing: pyam bye:.

⁵ David gi Akhisha ri «Nang nga" byencang" nghoid rigi voogung zoo: daloem: moo nyid wa akhang" byid: we'. Aseing nang yo' dage" voomoo" moo nyid wa zigi aca"» ga: tid.

⁶ Houg: yoomo Akhisha gi nyang: ri Zila voogung ri byid: yoomo Zila voogung ri akhid" ju" sho' Yuda khokham joem seing: to" boem.

⁷ David gi Philisti moug: moo lhammoo" daxe: khyug khyab nyid bye:.

⁸ Hau: ayo, ri David yo' nya: byu yigi hau: joyoo moo shidphyang" mo nyid da" Geshuri- Girazi yo' Amaleg byu yiri meing: yhe: zain: boem ago". Nyang: gi nyangnu" mougmyid ri Egutu mung" khyoo: gyoo" yhe: da" Shura voogung ju" sho' khaid zain: lho:

⁹ Myiyi: yuggi dangain" ri said pyam wigi yang- nu:- loo zei:- Gola-ug yo' byimi joem ri we' yu lo" boem. Hau: thang: nyang: gi Akhisha khyoo: doem tau" lo" ri

¹⁰ «Akhid" nang khayoo: yhe: khaid zain: nyid la"» ga myid: lang" David gi nyang: ri «Yuda mung" mougpyi: shoid- Yeramela akung: yi da" mougmyid- Keni byumyu" yi nyid da" moug: ju" sho' yhe: khaid" zain: bye:» ga: tid.

¹¹ Gad voogung khyoo: lo" wigi nyang: yo' nya: byu yi gyeing" koid bye: khyoo: ri ayo" lo" tid khyoo" sho' David gi myiyi: yuggi dangain" ziri said pyam bye:. David gi Philisti moug: moo nyid ayo, dangain" moo hid: su' kyeing" koid bye:.

¹² Nghoid loug we' Akhisha gi David ri loem ziyo' «David gi nya: Israela byumyu" yi wigi gye" ngheing" nyid yoomo ngoo ri dapyaid goin" dei byid: nyid wa bye:» ga: myid nyid.