Matiu 1 - Label

A risan a mangis a tarai ane Iesu Karisito

¹ Ine a risan a mangis a tarai tagun nating ning e Iesu Karisito i hanot tagun la. E Iesu, a nat e Dewit, e Dewit a nat e Abaram.

² E Abaram e tamana e Aisak, E Aisak e tamana e Jekop, pa e Jekop e tamana e Juda pa na tastasna.

³ E Juda e tamana e Peres dia ma e Serah, pa e kabatnan diau e Tamar. E Peres e tamana e Hesron, e Hesron e tamana e Ram,

⁴ pa e Ram e tamana e Aminadap, e Aminadap e tamana e Nason, pa e Nason e tamana e Salmon,

⁵ e Salmon e tamana e Boas, pa e tana a risana e Rehap. E Boas e tamana e Obet, pa e tana a risana e Rut. E Obet e tamana e Jesi,

⁶ pa e Jesi e tamana e Dewit, i ning a king. E Dewit e tamana e Solomon pa e tana a hane ning i taulai pas o e Uria.

⁷ E Solomon e tamana e Rehoboam e Rehoboam e tamana e Abia e Abia e tamana e Asa

⁸ e Asa e tamana e Jehosapat e Jehosapat e tamana e Jehoram pa e Jehoram e tamana e Usia

⁹ e Usia e tamana e Jotam e Jotam e tamana e Ahas pa e Ahas e tamana e Hesekia

¹⁰ e Hesekia e tamana e Manase e Manase e tamana e Amon pa e Amon e tamana e Josaia

¹¹ e Josaia i aitna e Jekonia taum ana tastasnala. Lamur tana, a tarai Babilon la dat pas a tarai Israel utumo e Babilon sur lar kes na dodot.

¹² Lamur ana tinan utumo e Babilon: E Jekonia i aitna e Salatiel, e Salatiel e tamana e Serubabel,

¹³ e Serubabel e tamana e Abiut, e Abiut e tamana e Eliakim, pa e Eliakim e tamana e Asor,

¹⁴ e Asor e tamana e Sadok, e Sadok e tamana e Akim, pa e Akim e tamana e Eliut,

¹⁵ e Eliut e tamana e Eliaser, e Eliaser e tamana e Matan, pa e Matan e tamana e Jekop,

¹⁶ e Jekop e tamana e Josep, i ning i taulai o e Maria. E Maria i agon e Iesu, ning di atongi a Karisito, i ning e God i sune seni.

¹⁷ A mangis a tarai turpasi o e Abaram tuk o e Dewit i arlar ana ning a bonot pa diat la, pa tagun e Dewit tuk ana tinan na dodot tumo e Babilon ning a bonot pa diat otleng la, pa tagun a tinan na dodot tumo e Babilon tuk ana Karisito ning a bonot pa diat a mangis a tarai otleng.

A ususrai o e Maria ning i agon e Iesu Karisito

¹⁸ Di agon pas e Iesu Karisito larne: E tana, e Maria, di ka suah alar tari sur ane Josep, ika lanigo ana nundiau a taulai, e Maria ka tasmani mang i tianan tana Talngan Tabu.

¹⁹ E Josep ning di ka suah alar tar e Maria teteki, i a tena tostos, pa bel i mang sur ir ame e Maria na matan a tarai. Pa i nuki mang ir kutus kumnan sen anundiau a lele sur a taulai.

²⁰ Ning i nuknuk kol ot ana utna ne, a angelo ana Leklek i hanot teteki ana reresa pa i atongi mang, “Josep, a nat e Dewit, gong u urmatana nuknuk o e Maria, ur ben pasi ka sur anuma hane. Anasa a kaklik ning i tianan pasi, i hanot tagun a Talngan Tabu.

²¹ Ir agon pas a kaklik barsan pa ur pasar a risana e Iesu, anasa ir alaun pas anuna tarai kusun anunla na toltol laulau.”

²² A ututnala rop ne i hanot sur dir tolsot pas a warwarala ana Leklek ning anuna propet ka apuasa tari mang,

²³ “Oroi i, a basbas a hane ir tianan pa ir agon pas a kaklik barsan pa dir atongi o e Emanuel,” Ais 7:14 a kamkamna mang, “E God i kes taum ondala.”

²⁴ Ning e Josep i mata, i muri lar otning a angelo ana Leklek i ka atai tari ono, pa i ben pas e Maria sur anuna hane.

²⁵ Ika bel dia borbor taum pas tuk ning e Maria i agon pas a kaklik barsan. Pa e Josep i pasar a risana o e Iesu.