2 Thessaloniciendjé 3 - Mbede Lə Luba Kone Gə Sigi

Ndəji gə ɔji dɔ dəji gə kula

¹ Ngan ko̰-mje, tar gə j-a pa tɔl ne t-ɛ ɗaa, ꞌdəjije Luba ɔji dɔ-si, mba kar tar lə Mbayɓe ta lo gə ngɔdə baa, ngaɓa d-ila riɓar dɔ-ɛ gə to gə d-ila ne riɓar dɔ-ɛ horo-sisəy gə be tɔ.

² Cibi mba kar d-ɔr ne sijee ji njeməndulje gə njeməkṵra̰yje mba ꞌjejee tɔ̰y ja ꞌto njetakagəje ang baa.

³ Ngaa Mbayɓe to dəw gə dana gadə. N-a kula jingaw mə-si gə ngaɓa n-a ngom-si ta njeməkṵra̰yje gə tɔ.

⁴ Ɔji dɔ sisəy ɗaa, ne gə sijee ja ꞌgərə gə maj-ɛ ɔji dɔ-si ɗəw gə lə Mbayɓe le ɓa nee: nduje gə j-un j-ar-si le ꞌɗaje ne kula ngaɓa a ɗaje ne kula dɔ-si gə kede ja ɓi.

⁵ May kar Mbayɓe turu mə-si gə njigi gə lə Luba, ngaɓa gə kuwa gədərə gə lə Kirisi tɔ.

⁶ Ngan ko̰-mje, ja dəji-si gə ri Mbayɓe lə-si Jeju Kirisi, kar-si ꞌsaje rɔ-si rɔ ngon ko̰-si gə ɗa-ɗa gə to njedabə, ngaɓa neɗa lə-a to ɓədə gə netɔji gə ja tɔji-si kede.

⁷ Sisəy le, ꞌgərəje ɗəw gə a ndəjije ne kəm sijee, mba sijee ja to gə njedabəje horo-si gə ang;

⁸ Sijee le, j-usa ne lə dəw baa ang, ngaa kara gə cil gə le j-ula rɔ-si ndubu j-ɔr ɗɛgə-ɗɛgə mba təl to nekodo dɔ dəw gə kara kara horo-si gə ang.

⁹ Sijee kara j-aw gə ɗəw mba kar j-a ta ne ji-si gə ja, ngaa kar-sijee ja to gə ne kɔji mar-ɛ mba kar-sisəy ꞌndajije ne kəm sijee.

¹⁰ Be ɓa, logə ja ga̰ horo-si gə le, j-un ndu j-ar-si na: To gə ɓo dəw gə njigi ɗa kula ang nama, may kar-ɛ usa ne ang tɔ.

¹¹ Mba j-o tar lə dəwje gə naaje d-aw nja horo-si gə to gə njedabəje ngaɓa d-al d-uru ne gə lə mar-jeje ɓo ꞌɗa ne ɔji dɔ-je kara ang

¹² J-un ndu j-ar njedabəje nee le ngaɓa j-ula jingaw mə-je gə ri Mbayɓe Jeju Kirisi kar ꞌɗa kula taar-taar d-inga ne nekusa d-odo ne rɔ-je.

¹³ Kar-sisəy ɗaa, ngan ko̰-mje, oreje kəm-si dɔ may aw ɗaje gə.

¹⁴ To gə ɓo dəw ila kuji dɔ tar gə ja ɗa mə mbede gə nee le ang nama, ꞌtən-eje oje gə maj-ɛ, ɗaa ɔs-ɛje ngərəng mba kar rɔ kul uwa-a.

¹⁵ O-eje gə njeba̰a̰ ang ngaa ꞌndəj-eje to gə ngon ko̰-si.

Ndu tɔr gə ko naa

¹⁶ May kar Mbayɓe ja gə nje gəl ɗɛgɛgɛ ar-si ɗɛgɛgɛ lə-a gə ndɔje kara-kara tɔ̰y, gə ɗəwje dang-dang. May kar Mbayɓe nay gə si tɔ̰y.

¹⁷ ꞌMa Pɔl ja m-un ji-m m-o-si ne. Ye gə nee to ndaji ji-m gə to mə mbedeje gə tɔ̰y. Ɗaa ꞌma ja m-ɗa mbede le.

¹⁸ May kar mənuji lə Mbayɓe lə-si Jeju Kirisi nay gə si tɔ̰y.