2 Thessaloniciendjé 2 - Mbede Lə Luba Kone Gə Sigi

Ndɔ təl lə Mbayɓe

¹ Ngan ko̰-mje, tar gə ɔji dɔ ndɔ təl lə Mbayɓe lə-si Jeju Kirisi, mbo̰ gə j-a mbo̰ naa mbɔr-ɛ gə, ne gə j-a dəji-si kəne ɓa nee:

² tar gə dəw a pa na njil gə be ɓa pa, ose tar gə ban-ban gə dəw pa, ose mbede gə ɗa-ɗa gə d-a pa na sijee ɓa ja ɗa, ɓa gə mba pa ne kar-si to gə ndɔ təl lə Mbayɓe le ce ɗaa, ar-je tar kəji lə-si aw gə yo gə nee gə ngɔdə baa ang.

³ Ar-je dəw inga ɗew kara kara ərə si gə tar gə baa ang. Mba kar nam ɓa kar ndɔ-ɛ gə əng le ɗe ɗaa, dəwje bula d-a kuba ɗəw lə Luba kḭya̰, ngaɓa dəw gə njeneɗa gə dɔ buguru a kila rɔ-ɛ gə ɗaga, ꞌne ngon gə nje kuba tuji.

⁴ ꞌNe gə n-to nje kəm tar n-un rɔ-ɛ n-unda dɔ neje tɔ̰y gə ꞌɓar-ɛ Luba ose ne gə d-a polo ngaɓa n-aw saar n-isi mə kəy gə lə Luba, ngaɓa n-ɗa rɔ-ɛ to gə ꞌne ja to Luba be.

⁵ Se mə-si ole dɔ tar gə m-pa m-ar-si logə m-ga̰ horo-si gə le ang wa?

⁶ Ɗaa ɓisine sisəy gərəje ne gə uwa-a nangə mba kar-ɛ tɔji rɔ-ɛ gə ɗaga dɔ kar gə lə-a.

⁷ Singamongə lə njeneɗa gə dɔ buguru gə to lo kiya-a gə le, un kudu kula nam ngaa. Logə gə nje kuwa-a nangə le a godo ɓa n-a ɗa kula lə-a gadəmagay gə.

⁸ Be ɓa, njeneɗa gə dɔ buguru a kila rɔ-ɛ gə ɗaga ɗaa Mbayɓe Jeju a tɔl-ɛ gə kundu t-ɛ, n-a tuj-e pugudu gə singamongə ndɔ təl gə lə-a.

⁹ Njeneɗa gə dɔ buguru le a ɗe gə ɗəw kula ɗa gə lə ꞌSu. N-a ɗa neje dang-dang gə kəm dəw o ndɔ kara ang, netɔjije, ngaɓa neje gə to ɓəəl to ɓəəl baa gə nangə əng,

¹⁰ ngaɓa nekərəje gə dɔ buguru mba nje d-uba tuji, mba ꞌmbadə njigi tar gə tɔgərɔ mba kinga ne kaji.

¹¹ Gəl-e gə nee le ɓa, Luba ula singamongə ndəəm ar-je mba kar ꞌta ne kagə tar gə ɗəgərə,

¹² mba kar ꞌjejee tɔ̰y gə ꞌta kagə tar gə tɔgərɔ ang, ngaa ꞌjungəri rɔ-je gə neje gə dɔ buguru le, d-a gangə tar dɔ-je gə.

Kuwa gədərə lə nje Tesaloniki

¹³ Sijee le ɗaa, may kar j-ar oyo Luba gə dɔ karje tɔ̰y ɔji dɔ sisəy, ngan ko̰-sijee gə Mbayɓe njigi-si. Mba Luba mbərə-si lo kun kudu neje gə ləw baa mba kar-si ingaje kaji gə go ɗəw Njil unda-si gə losang-ɛ nəm gə go takagə tar gə tɔgərɔ.

¹⁴ Ye gə ne ja tɔ ɓa, n-ɓar-si ne ɗəw Tar gə May gə lə-sijee mba kar ingaje ne riɓar lə Mbayɓe le-si Jeju Kirisi.

¹⁵ Be ɓa, ngan ko̰-sijee, ar-je dɔ gɔl si njang ngaɓa uwaje netɔji gə ꞌtɔji-si gədərə gə ye ja tɔji-si gə ta-si ose ye ja ɗa mə mbede gə.

¹⁶ May kar ꞌne gə Mbayɓe lə-si Jeju Kirisi je gə Bɔ-sijee Luba gə njigi-si ɓa ula jingaw mə-si gə gə ndɔ gə ndɔ ngaɓa ar-si ne kunda mə gə gə may pɛdə ɗəw mənuji gə le,

¹⁷ ꞌkul mə-si gə d-ila singa dɔ mar-ɛ gə d-ar-si, ꞌɗaje ne ne gə may lo kula ɗa gə lə-si tɔ̰y, gə lo pa tar gə lə-si tɔ̰y tɔ.