2 Corinthiendjé 11 - Mbede Lə Luba Kone Gə Sigi

Pɔl je gə njeka̰y kulaje gə gə mbɔr-ɛ baa

¹ Ha! A koreje ur-si kar m-ndoo mbə njɛ̰ ang wa? Oreje ur-si ja!

² Mba m-nər mə mba tar lə-si, to gə nər mə gə ḭ rɔ Luba gə ja, mba m-uwa gə si mɔrə m-ar jingaw kara baa ja, to to gə ꞌmbakum gə to gə losang-ɛ, mba kɔr-si kar Kirisi.

³ Be ja kara, ɗəw kara baa to gə li ərə ne Ɛbə gə gusu le, kar-m gədə-m gədə mba kar kəji lə-si turu buguju ngaɓa ɔsə-si ila-si əw gə lo kum naa gə lə-si, gə lo sangə rɔ gə lə-si mba Kirisi.

⁴ Mba to gə ɓo dɔngɔr dəw ɗe ila mbərə lə Jeju gə to dang gə ye gə sijee j-ila mbər-e j-ar-sisəy, ose to gə ɓo ꞌtaje njil gə to dang gə ye gə ingaje kede, ose oje Tar gə May gə ɗangə oreje ne dɔ ꞌye gə oje kede nama nj-ɛ nee le ilaje kud-e gə ya̰ ja.

⁵ Mba m-o to gə nje gə d-o rɔ-je gə njeka̰ykulaje gə to ɓəəl ya̰ kən le, ne gə ꞌnday-m ne ꞌma kara ja godo.

⁶ Tɔgərɔ, m-gərə pa tar yororo-yororo ang ja, ngaa negərə lal-m ang baa, ngaɓa ja tɔji ngadə no sisəy gə gə ɗəb-eje tɔ̰y nəm ɓa gə go kulaje tɔ̰y gə ja ɗa horo-sisəy gə.

⁷ Ose, logə m-ɗa rɔ-m gə dəw gə njɛ̰ baa ɗaa sisəy ɓa m-ɗa-si gə dəwje gə to ɓəəl ya̰ ɓa m-ila ne mbərə Tar gə May lə Luba baa ja m-ar-si le to neɗa gə kṵra̰y ɓa m-ɗa wa?

⁸ Mbo̰ naaje lə njetakagəje gə kɛm ɓa ꞌgədə-m gə nekuga dɔ ji d-ar m-ɗa ne kula horo-sisəy gə,

⁹ mba logə m-ga̰ ɓə lə-sisəy le, ndoo neje to-m ja ngaa m-ta ne kara ji dəw gə ang, ngaa ngan ko̰-sijee gə d-ḭ Masedowan ɓa d-ar-m neje gə ndoo-e to-m. Ɔji dɔ neje tɔ̰y le, m-njigi mba to nekodo dɔ sisəy gə ang, ngaɓa m-ɔgə rɔ-m mba to nekodo dɔ si gə ja saar gə no.

¹⁰ Gə go ɗəw gə lə tar gə tɔgərɔ lə Kirisi gə to mə-m gə le ɗaa, m-pa gə ndu gə boy wəəl to gə mə dəbə ɓeko̰ gə Akayi tɔ̰y ja, dəw gə a kɔgə-m lo kɔsə rɔ lə-m nee le godo.

¹¹ Mba ɗi ɓa m-pa ne to gə be wa? Mba njigi gə m-njigi-si ang wa? Luba gərə to gə m-njigi-si ja!

¹² Ne gə m-ɗa le, m-a ɗa ja cibi, nje gə d-aw sangə ɗəw mba kɔsə rɔ-je kasə nee naa gə sijee le, m-a kiya̰ ɗəw kara ja kara kar-je ang.

¹³ Dəwje gə nee le, ꞌto njeka̰ykulaje gə gə mbɔr-ɛ baa, njekulaje gə gə nje kəsə tarje, ꞌlom rɔ-je gə njeka̰ykulaje lə Kirisi.

¹⁴ Ngaɓa to ne gə sigi ang, mba ꞌne ꞌSu ja kara n-aw lom rɔ-ɛ gə anji gə lokarə gə.

¹⁵ Kar ngan njekulaje lə-a ꞌlom rɔ-je gə ngan njekulaje gə gadə-gadə kara to ne gə sigi ang. Kula ɗa-je le bo̰-ɛ̰ a kɔsə ta-je gə ɓi.

Kulaje gə ꞌməsərəje lə Pɔl

¹⁶ M-təl m-pa ja cibi, may kar dəw kara ja o-m gə mbə ang; ɓo be ang nama, may kar ḭya̰je ɗəw ar-mje ndoo mbə ja tɔ mba kar ꞌma ja kara m-inga ɗəw m-ɔsə ne rɔ-m ɓəəl.

¹⁷ Tar gə m-pa nee le m-pa gə ndu Mbayɓe ang, ngaa m-pa to to gə dəw gə dɔ-ɛ godo be, gə ɓəəl ang mba kinga ne ɗəw kɔsə ne rɔ-m ja baa.

¹⁸ Mba dəwje bula ja d-ɔsə rɔ-je ɗəw darɔ gə ɗaa ꞌma kara m-a kɔsə rɔ-m tɔ.

¹⁹ Sisəy gə nje kəm karə le ja, ḭje gə mə njigi lə-sisəy ja ilaje gəl nje dɔ godoje gə səmə!

²⁰ Mba ilaje gəl nje gə d-uwa si ɓərə gə, d-ula mbə dɔ-si gə, ꞌtuwa nemayje lə-si, d-o si gə ne ang, ꞌkunda kambɔr-si bangang-bangang!

²¹ M-pa gə rɔ kul, to to gə sijee j-a tɔji tɔgə godo lə-sijee ja. Ne tɔ̰y gə dəw asə ɗa le, m-pa gə tar mbə, ꞌma kara m-asə ɗa ja tɔ!

²² ꞌTo Ebərəje wa? ꞌMa kara m-to Ebərə ja tɔ. ꞌTo Ijirayɛlje wa? ꞌMa kara m-to Ijirayɛl ja tɔ. ꞌTo gə gəl kuji gə lə Abəraham wa? ꞌMa kara m-to gə kəne ja tɔ.

²³ ꞌTo njekulaje lə Kirisi wa? M-pa to to gə dəw gə dɔ-ɛ godo gə kɔrɔ be, m-to njekula lə Kirisi m-unda-je: ɗəw kula gə, ɗəw to kəy kula gə, ɗəw kunda gə ꞌkunda-m gə. Taar-taar ja m-aw ta yo cɛbɛdə-cɛbɛdə,

²⁴ gɔl mḭ ja Jiibije d-unda-m ndəy dɔg munda gə gir-e gə ji nay kara,

²⁵ ꞌkunda-m gə ndəy kɔb tarara-tarara gɔl munda, ꞌɗɔ-m gə kɔr ər gɔl kara, to njuyi sə-m gɔl munda, m-ɗa kar kara gə cil kara dan baa gə dana.

²⁶ Ɗəw kaw mbaje gə le taar-taar ja m-ce ta yo gə dɔ baaje gə, m-ce ta nje ɓogo singaje gə, m-ce ta njebaɓeje lə-m gə ꞌsangə mba tɔl-m, dəwje gə ꞌgərə Luba ang kara m-ce ta-je gə nəm, d-aw sə-m ndama-ndama mə ɓeboje gə, m-ce ta yo gə mə ndag lo gə, gə mə babo gə, nay njɛ̰ baa kar-m m-inga yo horo ngan ko̰-mje gə gə mbɔr-ɛ baa,

²⁷ kula rɔ ndubu gə kɔr, ɓi na kəm-m tasə-tasə, m-isi dan labə gə ngaɓa dan kunda gə; m-tɔl mə-m ɓo taar-taar, m-isi dan kul gə ngaɓa m-aw kudu-m dum.

²⁸ Ngaɓa lo pa kɛsɛje gə nay godo, ne gə uwa mə-m gə ndɔ-ndɔ ja nee: to gə no rɔ lə-m mba Mbo̰ naaje lə njetakagəje tɔ̰y!

²⁹ Na ɓa tɔg-ɛ godo ɓa tɔgə-m ꞌma godo sə-a ang wa? Na ɓa oso ɓa m-ɗunga rɔ-m kadə mb-ɛ ang wa?

³⁰ To gə ɓo kəm kɔsə rɔ nama tɔgə godo lə-m ja m-a kɔsə ne rɔ-m.

³¹ Luba gə to Bɔ Mbayɓe Jeju je ngaɓa ndu tɔr to k-ɛ gə ndɔ gə ndɔ le, gərə to gə m-pa tar gə negərə ang!

³² Mə ɓe gə Damasə gə, njeko̰ ɓe lə mbay Aretas ar dəwje gə Damasə ꞌngəm ta ɓebo mba kuwa-m,

³³ ngaa d-ila-m mə karɛ gə gə ꞌtɔ kula kəne, d-ar m-ɗisi gə ɗəw gə dɔ ndogo bɔrɔ gə, gə ꞌgugu dɔ ɓe, m-oso ɗaga m-ce ne t-ɛ gə.