1 Thessaloniciendjé 5 - Mbede Lə Luba Kone Gə Sigi

Ndɔ təl lə Mbayɓe

¹ Ngan ko̰-mje, tar gə ɔji dɔ dɔ kar gə dɔ ndɔ le, sisəy a njigije kar ꞌɗa ne mbede d-ar-si ang ngaa.

² Mba sisəy ꞌgərəje gə maj-ɛ pɛdə to gə ndɔ lə Mbayɓe le a ɗe to to gə nje ɓogo mə cil gə be.

³ Logə dəwje d-a pa na: Lo to ɗɛgɛgɛ ngaɓa nejɔgəje godo ngaa! Be ɓa dɔ kar-ɛ gə əng ja tuji a kuba-je nangə bus to to gə gə ndo gə ɔsə jene be ɗaa dəw kara kara a ce t-ɛ gə ang.

⁴ Ngaa sisəy le ɗaa, ngan ko̰-mje, isije dan londul gə ɓa ndɔ gə nee le a kuba-si nangə bus to to gə nje ɓogo be ang;

⁵ mba sisəy tɔ̰y ꞌtoje ngan lokarəje ngaɓa aw nja-je dan kara tɔ. J-a njaje mə cil gə ang nəm dan cil ciməri gə ang nəm.

⁶ J-a cibi to gə nje gə kɛm ang, ngaa ar-si j-isije kəm baa ngaɓa j-undaje kəm karə dɔ rɔ-si gə.

⁷ Mba ꞌjejee gə ꞌcibi le, ꞌcibi cil gə, ngaɓa nje gə kodo ɗa-je kara ɗa-je cil gə tɔ.

⁸ Ngaa sijee gə ja to nje nja dan kara-je le, j-undaje kəm karə dɔ rɔ-si gə: J-ulaje kubu ɗɔ gə ngira king-king kar takagə, gə kar njigi ngaɓa jɔgə kar kunda mə lə kaji.

⁹ Mba Luba uwa dɔ gɔl sijee mba wungu ang, ngaa mba kaji gə ɗəw gə lə Mbayɓe lə-sijee Jeju Kirisi,

¹⁰ gə uy mba-si, mba kar le j-ɔsə ne kəm-si kɔrə ose j-a cibi ne kara kar j-isi ne sə-a naa gə kəm baa.

¹¹ To gə be ɓa may kar ꞌndəjije naa ngaɓa ulaje jingaw mə naa gə, gə yo gə nee to to gə aw ꞌɗaje ne kede le ja.

Ɗudu tarje

¹² Ngan ko̰-mje, j-a dəji-si kar ilaje kuji dɔ nje gə d-aw ɗa kula horo-si gə, gə d-ɔr no-si ɗəw gə lə Mbayɓe ngaɓa d-aw ndəji-si.

¹³ May kar uwaje gə je nuji gə al dɔ mar-ɛ ngaɓa ꞌnjigije-je mba kula lə-je nee le. Ar-je ɗɛgɛgɛ to horo-si gə.

¹⁴ Ngan ko̰-mje, j-a ndəji-si kar ꞌndangəje njedabəje, ulaje jingaw mə nje gə singaje ɔr gə, ꞌlaje gə nje tɔgə godoje, ilaje mə-si pɔ̰ dɔ dəwje gə tɔ̰y.

¹⁵ Oje gə maj-ɛ, may kar dəw kara kara ɗa kṵra̰y toro mar-ɛ gə ang; ngaa ꞌsangəje ɗəw ɗa may ja jaga-jaga horo naa gə ngaɓa gə dəwje tɔ̰y.

¹⁶ Ar-je rɔ-si ləl-si jaga-jaga.

¹⁷ Əwje rɔ-si dəji Luba ang

¹⁸ Dan neje gə tɔ̰y le, ꞌɗaje oyo; mba to gə mə njigi lə Luba gə ɔji dɔ-si ɗəw gə lə Kirisi Jeju.

¹⁹ Ilaje kagə no Njil gə ang;

²⁰ ꞌDabəje tar gə ta pajambərəje gə ang;

²¹ ngaa ꞌtənje neje tɔ̰y so-so ɗaa ɔrəje kəm ꞌye gə may;

²² Ne ja gə ne gə kṵra̰y nama ɔsəje ngərəng.

²³ May kar Luba gə nje gəl ɗɛgɛgɛ gə darɔ-ɛ ja unda-si gə losang-ɛ, may kar lo kunda rɔ lə-si tɔ̰y, gə njil-si, kəm gə darɔ le ꞌto gə lo-e mɔgɔgɔ kar tar uwa ne dɔ-je ndɔ ɗe gə lə Mbayɓe lə-si Jeju Kirisi ang!

²⁴ Nje ɓar-si le to dəw gə dana gadə ɗaa ꞌne ja ɓa na ɗa ne mba-si.

²⁵ Ngan ko̰-mje, ꞌdəjije Luba mba sijee tɔ.

²⁶ Oje ngan ko̰-mje tɔ̰y, ꞌtoje ne mbi-je pu-pu gə rɔsangə ar-mje.

²⁷ M-dəji-si no-gɔl Luba gə ja mba kar ꞌtura mbede nee le d-ar ngan ko̰-si tɔ̰y ja.

²⁸ May kar mənuji lə Mbayɓe lə-si Jeju Kirisi nay gə si!