1 Thessaloniciendjé 1 - Mbede Lə Luba Kone Gə Sigi

Pɔl tɔji rɔ-ɛ ngaɓa oje

¹ ꞌMa Pɔl, gə Silibɛ̰ je gə Timoce j-a ɗa mbede nee j-ar Mbo̰ naa lə njetakagəje gə to Tesaloniki, gə to kar Luba gə Bɔ dəwje ngaɓa gə Mbayɓe Jeju Kirisi. May kar mənuji gə ɗɛgɛgɛ to kar-si.

Tar gə May ɓar kagə Tesaloniki

² J-a ɗa oyo Luba jaga-jaga mba-si tɔ̰y, ngaɓa j-aw dəji Luba kara j-ila ri-si kəne taar-taar.

³ Kula takagə gə ꞌɗaje, gə rɔ-si gə ulaje ndubu mba njigi ngaɓa kuwa gə uwaje gədərə dɔ kunda mə dɔ Mbayɓe gə lə-si Jeju Kirisi le, mə-sijee ole kəne no-gɔl Bɔ-sijee Luba gə.

⁴ Ngan ko̰-sijee, sisəy gə Luba njigi-si, j-a gərə to gə sisəy le ɗaa Luba mbərə-si ja.

⁵ Mba Tar gə May gə j-ila mbər-e j-ar-sisəy le, j-a pa gə ta-si baa ang, ngaa Njil Njerɔsangə ore kud-e gə singamongə ngaɓa to tar gə tɔgərɔ ja. Be ɓa sisəy ꞌgərəje pa nja sijee gə horo-sisəy gə mba kar to may lə-si.

⁶ Sisəy ꞌndəjije kəm sijee gə kəm Mbayɓe ɗaa, dan neməko̰je gə bula ja ꞌtaje Tar lə Luba gə rɔləl lə Njil Njerɔsangə.

⁷ Be ɓa ꞌtəlje gə nekɔji mar-ɛ lə njetakagəje tɔ̰y gə Masedowan gə Akayi.

⁸ Mba Tar lə Mbayɓe ɓar kagə ɓə lə-si, ce Masedowan gə Akayi ja kara baa ang ngaa dəwje ꞌgərə takagə Luba lə-si gə lo tɔ̰y, ar al dɔ lo sula.

⁹ ꞌPa tar ɔji dɔ sijee na, pa kuwa mba gə uwaje-si le gar-ɛ godo, ngaɓa to gə ban ja ɓa ꞌmbəlje ne kəji lə-si ar-je Luba, ngaɓa ꞌmbadəje magəje ɗaa ꞌtəl ɗaje ne kula lə Luba gə tɔgərɔ gə nje kisi kəm baa,

¹⁰ ngaɓa gə mba kar-si ꞌngəbəje ne ngon-e gə n-ndol-e horo nje gə d-uy gə gə a kḭ dara, Jeju gə a kɔr-si ta wungu gə a ɗe gə.