Yuda 1 - Chipangano Chabwangu

¹ Nine Yuda umupyungi waku Yesu Klistu, nakambi nine wabo wakwa Yemusi. Nalemba kalata nji kuli mwebo mwe bayitwa nakambi abatemweka na Lesa Bata, mwebo Yesu Klistu asunga.

² Nkolomba ukwebati Lesa amukwatile ichisa, umutende nokutemwa apakulu.

Abasambishi babufi

³ Mwe batemwekwa, nafwayisha ukumulembela kalata ukuti mulondolwele ifyakupuluka kwesu bonse. Nomba nabona ukuti ichalikufwayikwa bwangu-bwangu kumulembela nokumukoseleshako, ukuti mutwalilile ukulwila ichichetekelo icho Lesa apelele bwaka kubantu bakwe abapatulika.

⁴ Pantu abantu bambi abatomfwilapo Lesa balinjile mubumfinshi mukati kenu. Mba bakofwaya ukonaula ubwanshi bwaku Lesa wesu ubo twakwata mukuchita ifintu ifyabipisha. Bakokana Yesu Klistu, Imfumu na Kalonga wesu enka. Nakukale Amalembo aku Lesa alisosele ukuti bakupaminwapo.

⁵ Nomba mwilabukilapo ifyachitikile kubantu mbulya Bashikulu bapokolwele ukufuma ku Ijipiti. Bambi abamuli bo tabakwetepo ichichetekelo, elo panuma Lesa alibepeye.

⁶ Ibukisheni abangelo abatali kupyunga imilimo nokusha ififulo fyabo. Lesa alibakakile nobunyololo butapwa. Nomba akobasunga muchilindi umufitile fititi ukufikila napakasuba nkalya akubapingula.

⁷ Ibukisheni nakambi abamumisumba ya Sodomu na Gomola nemishi yabena mupalamano. Abantu bamumishi njilya, balikuchita ifibipile nefitangasoswa. Lesa alibachitile ukuba ichakubwenako ulo abaposele mumulilo uutashima.

⁸ Elo abantu banomba balachita fyenka mfilya. Mukukonka ifibonwa fyabo, balonaula imibili yabo, balakana insambu shaku Bashikulu nokulokutuka abaleme baku Lesa.

⁹ Nangu mungelo mukulu Mikaeli ulo bali kutalikana na Satana pamulandu wachitumbi chakwa Mosesi, tasoselepo ishiwi nangu limo ilyamusalula. Ye asosele bwaka ishiwi ilyakuti, “Leka Mfumu eyo akukalipile!”

¹⁰ Nomba mba bantu bapontela bwaka ifintu ifyo batayishibapo nomo filolele. Ifyo bayishiba fintu beshibile mumusango wanama ishitakwata mano, nakambi mfi fintu efikobonaula.

¹¹ Mba bantu bamalosa! Bakoenda munshila yakwa Kaini. Elo bayiposa mukuluba pamulandu wandalama shakufusha, nga mfilya fyachitile Balaamu. Bali nokonaulwa pamulandu wakwalukila Lesa fyenka kubati nimfilya achitile Kola.

¹² Mba bantu bali kubati fisemba fyafiko pakulya kwenu ukwachumfwano. Bakolya namwebo ukwambula insoni pakuti bakolama ifyabubi bwabo. Bali kubati makumbi aapintwa, elo tayaletapo nemfula. Nakambi bali kubati fiti ifitatwalapo ifitwalo panshita yafiko. Mba bantu balifwa kale.

¹³ Elo bapalana kubati matamba apali bemba aafumya ipofu, efyo nabo balanga ububi bwabo. Bali kubati nintandala ishikoselauka bwaka, elo Lesa alibasungila ichifulo ichifitile fititi ichamuyayaya.

¹⁴ Embalya Enoki, ichikolwe chalenga basanu na babili ukufuma pali Adamu, asosele ukuti, “Nachine Imfumu yakwisa nabangelo bayiko ababuta abali amakana-makana.

¹⁵ Akwisa kupingula nokubachinka panshi bonse abatomfwila Lesa pamulandu wabubi bonse ubo bachitile. Akwisa kubachinka panshi napamashiwi onse amisula awo imbifi shalikusalula Lesa.”

¹⁶ Abantu mba lonse balayilishanya nokubepesha bambi. Bakonka bwaka mufyabipa ifyo bakofwaya benka. Balasosa ifyakuyisalula benka. Elo balapoka ububoni mubuchenjeshi.

Ukuchenjesha nokusambisha

¹⁷ Nomba mwebo, mwe batemwekwa, ibukisheni amashiwi awo abatumwa baku Bashikulu wesu Yesu Klistu bamwebele kale

¹⁸ ati, “Kunshita yakumupwilo kwakuba abantu abali kusalula Lesa nabantu bakwe, balikukonkela bwaka mulunkumbwa lwabo ulubi.”

¹⁹ Abantu abali mfi ebalenga pali mwebo ukulekanya. Elo bakonkela bwaka mufyabuntunse. Tabakwetepo Umupashi Wabuta.

²⁰ Nomba mwebo mwe bananji, mutwalilileni ukuyimaka mwenka muchichetekelo chenu ichabuta. Lombeni mufiso ifyaku Mupashi Wabuta.

²¹ Ikaleni mukutemwa kwaku Lesa ulo mukolindila ubumi butapwa ubo Bashikulu wesu Yesu Klistu akaya kupela muchisa chakwe.

²² Mulokukwatila ichisa bo abachili mukukayika muchichetekelo chabo.

²³ Bambi mulokubapulushako pakubasompola mumulilo. Bambi nabo mulokubakwatila ichisa elo nomwensopo. Mulokutalamukako nakufyakufwala fyabo ifyakatayikwako ifibi ifyalunkumbwa lwabo.

Ukulomba ukwakutondayisha Lesa

²⁴ Ubuleme bube kuli Ye uwaba nefiso fyakumusunga ukuti mwiwa. Ye uwaba nefiso ifyakumulenga abalungama nakambi abasekelela pachinso chakwe ichabuleme.

²⁵ Lesa uwaba umo bwaka, uutulubwila muli Yesu Klistu Imfumu yesu, eye akwate ubuleme, umuchinshi, ifiso nensambu, ukufuma bwaka kukale nomuyayaya. Ameni.