Yohane 9 - Chipangano Chabwangu

Yesu aposha umuntu uwafyelwe impofu

¹ Ulo Yesu alikwenda, abwene umuntu umwalalume uwafyelwe impofu.

² Abakusambila bakwe balimufumbile ati, “We musambishi, mba ninani uwabifishe ukuti ngu muntu afyalwe impofu? Napo mwine nangula bafyashi bakwe?”

³ Yesu alibasukile ati, “Ngu muntu tabifishepo nangula abafyashi bakwe, kuntu afyelwe impofu ukuti imilimo yaku Lesa emo ibonekele.

⁴ Apo kachili kasuba tulingile ukubomba imilimo iyaku ngulya uwantumine pantu ubushiku bukoyisa umo tutangabombamo.

⁵ Ulo nchili muno chalo, ndi kusanika kwachalo.”

⁶ Panuma yakusosa mfi, Yesu ashipile amate panshi. Elo afubile iloba namate nokulisuba pamenso aku ngulya muntu uwafyelwe impofu.

⁷ Amwebele ati, “Koya kasambe kumenso muchishiba cha Siloamu.” (Ndi shina lyaalula ati, “Uwatumwa.”) Echo ngu muntu alile nokusamba kumenso nokubwela akobona.

⁸ Abena mupalamano bakwe nabantu bambi abalikumubona uwakupula-pula, balifumbile ati, “Napo ngu muntu tengulya uwayikalile ukupula-pula?”

⁹ Bambi balisumine ati, “Ina, eye.” Nomba bambi nabo balikene bati, “Iyowo teyepo, apalene bwaka naye.” Elo umwine asosele ati, “Nine.”

¹⁰ Elo balimufumbile ati, “Mba chilengele ukuti ulokubona chindo?”

¹¹ Alibasukile ati, “Umuntu uwitwa Yesu, afubile iloba nokulisuba pamenso anji. Anjebele ati, ‘Koya kasambe kumenso muchishiba cha Siloamu.’ Epo nalile. Bwangu-bwangu ulo nasambile, natatikile ukubona.”

¹² Elo bamufumbile ati, “Nikwisa ali?” Naye ayasukile ati, “Nshishibilepo uko ali.”

Abafalisi bafwayilisha umulandu

¹³ Elo bayile nangulya muntu uwali mpofu ku Bafalisi.

¹⁴ Akasuba ako Yesu afubilemo iloba nokuposha ngu muntu kali ke Sabata.

¹⁵ Abafalisi nakambi balimufumbile ati, “Nga achitile shani ukuti ubone?” Ye alibebele ati, “Afubile iloba nokunsuba pamenso anji. Echo nomba nkobona.”

¹⁶ Bambi abamu Bafalisi basosele ati, “Umuntu ngu uukochita mfi tafumapo kuli Lesa iyowo, pantu tasungapo Amafunde akasuba ke Sabata.” Nomba bambi nabo basosele ati, “Mba umuntu imbifi kuti achita shani imilimo iyafiso ifikulu nga nji?” Elo mwali ukulekana mukati kabo.

¹⁷ Abafalisi balimufumbile ngulya muntu nakambi ati, “Nga nomba webo ukotipo shani pali ngu muntu?” Naye alyasukile ati, “Musoseshi.”

¹⁸ Abayuda tabasuminepo ukwebati ngu muntu ewali mpofu, kuntu nomba akobona. Echo bayitile abafyashi bakwe

¹⁹ nokubafumba ati, “Napo ngu mwana ewo mukoti afyelwe impofu? Kanshi nomba akobona shani?”

²⁰ Abafyashi bakwe balyasukile ati, “Ina, tulishibile ukuti ngu mwana wesu, nakambi afyelwe impofu.

²¹ Nomba tatwishibilepo ifyo atatikile ukubona. Mufumbeni umwine, mukulu, akoyiyasukila umwine!”

²² Abafyashi bakwe basosele mfi nipamulandu wakutina abakulu. Mba basuminishenye kale ati onse uwakwisa kusumina ukwebati Yesu Ewasubwa waku Lesa, bakwisa kumutamfya munanda yakulombelamo Lesa.

²³ Echo abafyashi bakwe basosele ati, “Mukulu umwine, mufumbeni!”

²⁴ Inshita iyachibili bayitile ngulya muntu uwafyelwe impofu nokuti kuli ye, “Laya kuli Lesa ukuti webo ukososa ukwebesha! Fwebo tulishibile ukuti ngu muntu uukuposeshe nimbifi.”

²⁵ Elo ayasukile ati, “Nebo nshishibilepo ati nimbifi nangula iyowo. Chimo icho njishibilepo chakwebati nali impofu, nomba nkobona.”

²⁶ Bo balimufumbile ati, “Akuchitile shani? Nga achitile shani ukuti ubone?”

²⁷ Elo abasukile ati, “Ndimwebele kale, kuntu tamukofwayapo ukumfwa. Mulandu ndo mukofwaya ukumfwa nakambi? Napo namwe mukofwaya ukuba abakusambila bakwe?”

²⁸ Bo balimwebawile nokuti, “Webo uli wakusambila waku ngulya muntu, kuntu fwebo tuli bakusambila bakwa Mosesi.

²⁹ Twalishiba ukuti Lesa asosele kuli Mosesi, kuntu ngu muntu, fwebo tatwishibilepo noko afuma.”

³⁰ Umwalalume ngulya asosele ati, “Nchi chakushimbwisha ichakuti mwebo tamwayishibapo noko afuma, kuntu nebo alimposeshe!

³¹ Twalishiba ukuti Lesa tomfwapo mbifi, kuntu omfwa abantu abamuchinshika nokuchita ifyo afwaya.

³² Ukufumina pakutatika kwachalo, tatwabonapo umuntu nangu umo uwaumfwapo uko umuntu aposeshe umuntu uwafyelwe impofu.

³³ Ngu muntu kati taafuminepo kuli Lesa, tekuti achitepo akantu nangu kamo.”

³⁴ Balimwasukile ati, “Webo wafyalilwe nokulelwa mububi, epo kanshi ukofwaya ukutusambisha?” Elo balimutamfishe kunse yananda yakulombelamo Lesa.

Ifyakupofula kwamumutima

³⁵ Ulo Yesu aumfwile ukuti bamutamfisha kunse nokumusanga ngulya umuntu, amufumbile ati, “Napo ukochetekela mu Mwana wa Muntu?”

³⁶ Ye alimwasukile ati, “Njebeniko, ninani Umwana wa Muntu ukuti muchetekele?”

³⁷ Yesu amwasukile ati, “Ulimubwene, ewo mukososhanya nakwe nomba.”

³⁸ Elo asosele ati, “Nkochetekela, mwe Bashikulu.” Elo afukeme pamakasa aku Yesu nokumutotela.

³⁹ Elo Yesu asosele ati, “Nayisa muno chalo mukupingula ukuti impofu shilokubona nakambi nambalya abakobona baaluke impofu.”

⁴⁰ Bambi Abafalisi abali pamo nakwe balyumfwile ifyo Yesu asosele. Elo bamufumbile ati, “Napo nafwe tuli mpofu?”

⁴¹ Yesu alibasukile ati, “Nga mwaba impofu, nga tekuti mukwatepo umulandu, kuntu apo musosa ukuti, ‘Tulabona,’ mwalikwata umulandu.”