Yohane 7 - Chipangano Chabwangu

Yesu nabawakwe

¹ Panuma yaku mfi, Yesu apitene muchalo cha Galili. Tafwayilepo ukwenda muchalo cha Yudeya, pakuti abakulu ba Bayuda balikufwaya ukumwipaya.

² Elo ukulya kwa Bayuda kwa Misasa kwalipalamine.

³ Epo bawabo baku Yesu bamwebele ati, “Ulingile ukuya ku Yudeya ukuti abakusambila bobe bakabone imilimo iyo ukochita.

⁴ Takwabapo umuntu ufisa imilimo iyo akobomba kati akofwaya ukwishibikwa ukwinekantu. Apo wachita mfi fintu, leka ichalo chonse chikwishibe!” (

⁵ Nangu nibawakwe tabamuchetekelepo.)

⁶ Elo Yesu ayasukile ati, “Inshita yanji tayilafika. Nomba kuli mwebo yonse inshita iilingile.

⁷ Elo abantu bapano chalo tekuti bamupatepo. Nomba nebo balinsulile pantu ndabeba ati imilimo yabo iibi.

⁸ Mwebo kamuyeni kuli nku kulya. Nomba nebo tanshikoyisako pakuti inshita yanji tayingafika.”

⁹ Ulo ashilile ukusosa mfi, ayile kwikala mu Galili.

Yesu pakulya ukwa Misasa

¹⁰ Panuma, ulo bawakwe bayile mukulya kwa Misasa, Yesu naye alile. Nangu chali mfilya, tayilepo apatubile, kuntu mubumfinshi.

¹¹ Munshita yanku kulya, abakulu ba Bayuda balikumufwayilisha. Balikufumbashanya ati, “Nikwisa ali?”

¹² Mwali ukutepelekeshanya ukukulu mukati kebumba lyabantu. Bambi balikusosa ati, “Ngu muntu muweme.” Nomba bambi basosele ati, “Iyowo, akopumfyanya abantu.”

¹³ Nomba takwalipo nangu umo uwasosele apabuta pakuti bonse balikutina abakulu ba Bayuda.

¹⁴ Ulo ukulya nku kwali pakati, Yesu ayile kunanda yaku Lesa nokutatika ukusambisha abantu.

¹⁵ Elo abakulu ba Bayuda balishimbilwe ukwinekantu. Basosele ati, “Ngoyu muntu uutasambililapo ayishiba shani mfi fyonse?”

¹⁶ Yesu alibasukile ati, “Ifyo nsambisha tefyanjipo kuntu fyafuma kuli Lesa uwantumine.

¹⁷ Umuntu onse uukofwayisha ukuchita ifyo Lesa afwaya, ewakwisa kwishiba ifyo nkosambisha nga fyafuma kuli Lesa nangula nkoyisosela nemwine.

¹⁸ Umuntu uyisoselela bwaka ifyakwe, ekwebati ayifwayila bwaka umuchinshi umwine. Nomba uufwaya umuchinshi wawamutuma, ena ewachishinka, nakambi taba nobufipo mumutima wakwe.

¹⁹ Mosesi alimupele Amafunde, kuntu tapapo nangu umo uwakumwebo uualama. Mba mulandu ndo mukofwayila ukunjipaya?”

²⁰ Elo ibumba lyabantu lyamwasukile ati, “Muli umupashi uubi muli we! Mba nibani bakofwaya ukukwipaya?”

²¹ Elo Yesu alibasukile ati, “Nachine nachitile umulimo umo uwafiso ifikulu, elo mwebo bonse mwalishimbilwe.

²² Mosesi amwebele ati mulokushilimuna abana benu, (te Mosesi iyowo, kuntu ifikolwe fyenu fyatatikile mfi). Epo mulashilimuna umwana umwalalume pakasuba ke Sabata.

²³ Mulashilimuna pakasuba ke Sabata ukuti Amafunde akwa Mosesi etobekwapo, mba mulandu ndo mwankalipile ulo naposeshe umuntu pakasuba ke Sabata?

²⁴ Lekeni ukupingula abantu mumibwenekele yabo, kuntu mulokupingula mumibelo iyakwebesha.”

Yesu e Wasubwa na Lesa

²⁵ Abantu bamo abamu Yelusalemu batatikile ukusosa ati, “Napo ngu tewo bakofwaya ukwipaya?

²⁶ Boneni! Teye akososela apatubile, nakambi takupo nangu umo uukomusosela ububi! Napo kuti kwaba ukwebesha ukuti abakulu balishibile ukuti ena e Wasubwa waku Lesa?

²⁷ Nomba fwebo tulishi uko ngu muntu afuma. Nomba ulo Uwasubwa waku Lesa akwisa, takupo umuntu uwakwishiba uko akufuma.”

²⁸ Ulo Yesu alikusambisha munanda yaku Lesa mu Yelusalemu, alibilikishe ati, “Nachine mwalinjishiba nokwishiba uko nafuma? Nomba tanshayisa mukufwayapo kwanji. Nomba uyo uwantumine wakwebesha. Mwebo tamwamwishibapo iyowo.

²⁹ Nebo nalimwishiba pakuti nafumine kuli Ye nakambi ewantuma.”

³⁰ Elo abantu bafwayile ukumwikata, kuntu tapalipo nangu umo uwamwikete pakuti inshita yakwe yali tayilafika.

³¹ Nangu chali mfi, abantu abenji balichetekele. Elo basosele ati, “Kati Uwasubwa ayisa, napo akwisa kuchita imilimo iyafiso ifikulu ukuchila ngu muntu?”

Bamalonda batumwa mukwikata Yesu

³² Ulo Abafalisi baumfwile ifyo abantu balikutepeleshanya namfi ifyaku Yesu, intungulushi shabachipupila na Bafalisi batumine bamalonda ukuti baye bamwikate Yesu.

³³ Nomba Yesu asosele ati, “Nakuba nenu pakanshita kanini bwaka, elo nakubwelela kuli Ye uwantumine.

³⁴ Kunshita iyo mwakwisa kumfwayilisha, kuntu tamwakambonepo, noko nkaya tamwakafikeko.”

³⁵ Epo abakulu ba Bayuda batatikile ukufumbashanya ati, “Nikwisa uko engaya uko fwebo tatungamusanga? Napo kuti aya kumushi waba Giliki ukwikala abantu besu nokuya kubasambisha?

³⁶ Ali kusosa ati tukamufwaya, kuntu tatwakamusangepo. Nakambi akoti uko akoya tekuti tufikeko. Chindo icho akososa?”

Imilonga yamenshi aapa ubumi

³⁷ Pakasuba kakupelako, akasuba kakulu ukuchila shonse, Yesu alimakene nokubilikisha ati, “Muntu onse uuli nechilaka, ese kuli nebo nokunwa.

³⁸ Kubati nimulya Amalembo Apatulika asosele ati, ‘Uyo onse uwakuchetekela muli nebo, inika yamenshi aabumi yakukunka ukufuma muli ye.’”

³⁹ Yesu pakusosa mfi, alikulanguluka ifya Mupashi Wabuta uyo abo abachetekela muli Ye bakwisa kupokelela. Pali njilya nshita Umupashi Wabuta wali taulepelwapo, pakuti Yesu ali talayingila mubuleme bwakwe.

Ukulekana mukati kabantu

⁴⁰ Bambi abantu ulo baumfwile amashiwi nga, basosele ati, “Ngu muntu chine-chine musoseshi.”

⁴¹ Bambi basosele ati, “Ngu muntu eye Uwasubwa waku Lesa.” Nomba bambi nabo balikusosa ati, “Napo Uwasubwa ngu kuti afuma ku Galili?

⁴² Amalembo Apatulika asosa ati, ‘Uwasubwa akuba uwakulupwa lwakwa mfumu Davide,’ nakambi, ‘Akufyalilwa ku Betelehemu, mumushi umo imfumu Davide alikwikala.’”

⁴³ Pamulandu ngu balilekene pamashiwi akwe ngalya.

⁴⁴ Bambi bafwayile ukuti bamwikate, kuntu takwalipo nangu umo uwamwikete.

Ukutachetekela kwabakulu ba Bayuda

⁴⁵ Bamalonda babwelelemo kuntungulushi shabachipupila na Bafalisi. Ulo bafikile nkulya, balibafumbile ati, “Mba nindo mutamuletele?”

⁴⁶ Bamalonda bayasukile ati, “Takupo muntu nangu umo uusosa kubati ningu muntu!”

⁴⁷ Elo Bafalisi basosele ati, “Kanshi namwe alimupunamikile?

⁴⁸ Napo kulipo bamo bantungulushi nangu Abafalisi abachetekele kale ngulya muntu?

⁴⁹ Bantu abo tabeshibilepo Amafunde akwa Mosesi, Lesa abalapisha!”

⁵⁰ Umo uwamu Bafalisi uwitwa Nikodemasi, ulya uwayile mukubona Yesu ubushiku, ali wamwibumba lya Bafalisi mba, aebele abanakwe ati,

⁵¹ “Napo ifunde lyesu lilatusuminisha ukupela umuntu umulandu ukwambula ukumulubulwisha?”

⁵² Nabo balimwasukile ati, “Kanshi nawebo uli mwina Galili? Upende bwino Malembo Apatulika. Wakusanga ukwebati takupo umusoseshi nangu umo uwafuma ku Galili.” [

⁵³ Epo balipalangene, bonse bayile kumishi yabo.