Yohane 6 - Chipangano Chabwangu

Yesu alisha abantu amakana asano

¹ Panuma, Yesu ayile kwishilya lyaku bemba wa Galili, (nangula bemba wa Tibeliyasi.)

² Ibumba ilikulu ilyabantu lyalimukonkele pantu babwene ifyafiso ifikulu ifyo achitile mukuposha abalwele.

³ Elo Yesu aninine ulupili nokuya kwikala nabakusambila bakwe.

⁴ Inshita iyo ukulya kwa Bayuda ukwa Chakulya Chakuchilila kwali apepi.

⁵ Yesu pakulolesha, abwene ibumba ilikulu ilyabantu likoyisa, afumbile Filipo ati, “Nikwisa twingashita ifyakulya ifyakulisha mba bantu bonse?”

⁶ (Asosele mfi ukwesha Filipo, kuntu alishibile umwine ifyo alinokuchita.)

⁷ Filipo alyasukile ati, “Nangu kati twashita imifuba ikoshitikwa indalama imyanda ibili tekuti ikumaninepo kubantu abafula mfi ukuti umuntu umo-umo alyeko kanini bwaka.”

⁸ Umbi uwabakusambila bakwe uwitwa Andileya, wabo Simoni Petulo, asosele kuli Yesu ati,

⁹ “Kuno tulipo nomulumbwana uukwete imifuba isano iyaku tiligu nenswi shibili. Nomba tekuti tukumanepo kubantu bonse mba.”

¹⁰ Yesu alibebele ati, “Ikalikeni abantu bonse panshi.” (Pachifulo nchilya pali isani ilinji.) Elo abalongene bali ukubati amakana asano abalalume.

¹¹ Elo Yesu abulile imifuba, alombele kuli Lesa, nokwakanya abantu mbalya abayikele mpalya. Achitile mumo mwenka nenswi. Elo abantu bonse balilile nokwikuta.

¹² Ulo bonse bayikutile, Yesu asosele kubakusambila bakwe ati, “Longanyeni utwabufumfwa utwashalapo, twionaulapo nangu tumo.”

¹³ Batolele tonse nokwiusha imiseke ikumi na ibili kutufumfwa utwasheleko kumifuba isano iyaku tiligu iyo abantu balile.

¹⁴ Pakubona ichafiso ifikulu icho Yesu achitile, abantu basosele ati, “Nachine ngu emusoseshi uwali nokwisa muno chalo.”

¹⁵ Elo Yesu alishibile ukuti abantu bakofwaya ukumukakatisha ukuti abe imfumu. Echo Ye alifuminepo nokuya kulupili lumbi apaenka.

Yesu aenda pamenshi

¹⁶ Ulo ichungulo chafikile, abakusambila bakwe bayile kuli bemba.

¹⁷ Elo bayinjile mubwato nokubwelela kwishilya lyaku bemba ukulola ku Kapenaumu. Ulo bwayilile, Yesu aali talati afike ukuti endele pamo nabo.

¹⁸ Pali njilya nshita kwayimine ichipupu ichikulu ichalikwimya amatamba.

¹⁹ Abakusambila bakwe baobele imilundu isano nangula isano naumo ulo babwene Yesu akoyenda pamenshi, akoyisa apepi nobwato. Epo balitinine ukwinekantu.

²⁰ Nomba Yesu asosele kuli bo ati, “Nine, mwitina!”

²¹ Elo bamwinjishe mubwato. Bwangu-bwangu ubwato bwafikile kwishilya uko balikuya.

Abantu bafwaya Yesu

²² Akasuba kakonkelepo ibumba lyabantu abali kwishilya limbi ilyaku bemba bayibukishe ati pashele bwaka ubwato bumo. Balishibile ati Yesu tayilepo mubwato pamo nabakusambila bakwe iyowo. Lelo abakusambila bakwe bayile benka.

²³ Amato ambi aafumine ku Tibeliyasi, ayishile pachabu apepi napachifulo apo ibumba ilikulu lyalilile imifuba, ulo Bashikulu balombele kuli Lesa.

²⁴ Ulo ibumba lyabantu lyabwene ukuti Yesu talipo, nangu bakusambila bakwe, bayinjile muli ngalya mato nokuya ku Kapenaumu mukumufwaya.

Yesu chilyo chabumi

²⁵ Ulo abantu basangile Yesu kwishilya limbi ilyaku bemba, bafumbile Yesu ati, “We musambishi, nilwisa mwayishile nkuno?”

²⁶ Yesu alibasukile ati, “Nachine nkomweba ati, mukomfwaya pamulandu wakuti mwalilile imifuba nokwikuta, tepamulandupo wakweba ati mwalyumfwile bwino ifyafiso ifikulu.

²⁷ Mulokubombelapo ifilyo ifyonayika, kuntu bombeleni ifyakubelelela mubumi butashilapo. Mfi efilyo Umwana wa Muntu akwisa kumupela, pantu ewo Lesa Bata basuminisha.”

²⁸ Epo balimufumbile ati, “Mba findo tungachita ukuti tubombe umulimo waku Lesa?”

²⁹ Yesu alibasukile ati. “Lesa afwaya ukuti muchetekele muli ngulya uwo atuma.”

³⁰ Elo balimwasukile ati, “Mba chafiso ifikulu ndo wakuchita ichakuti tubone nokukuchetekela? Mulimo ndo wakuchita?

³¹ Ifikolwe fyesu fyalile mana muchiswebebe ukulingana nefyo Amalembo Apatulika asosa ati, ‘Abapele ichakulya ukufuma kumulu ukuti balye!’”

³² Yesu abasukile ati, “Nachine nkomweba ati, te Mosesi amupele umufuba ukufuma kumulu, kuntu ni Bata ebamupele mwebo umufuba winenene ukufuma kumulu.

³³ Pakuti umufuba waku Lesa, ningulya uwayika kumulu ukwisa kupela ubumi bwakwe kuchalo.”

³⁴ Nabo balimufumbile ati, “We mfumu, tupeleniko ngu mufuba inshiku shonse.”

³⁵ Yesu alibebele ati, “Nine mufuba uupela ubumi. Muntu onse uwisa kuli ne tayise kumfwapo insala iyowo, nangulya onse uwakunchetekela tayise kumfwapo ichilaka nakambi.

³⁶ Ukubati nimfilya namwebele kale, nangu chakuti mulimbwene, tamunchetekelapo.

³⁷ Bonse abo Bata bampela balesa kuli nebo. Onse uwisa kuli ne tanshimutamfyapo iyowo.

³⁸ Pantu tanshayisapo ukufuma kumulu mukuchita ukufwaya kwanji iyowo, kuntu ukwaku Ye uwantumine.

³⁹ Nomba icho afwaya uyo wantumine chakwebati nilufyapo nangu umo pali bo abo ampela, kuntu ukuti njise mbabushe pakasuba kakumupwilo.

⁴⁰ Pakuti icho Bata bafwaya chakuti uyo onse uwabona Mwana nokumuchetekela abe nobumi butashila. Elo nebo nakumubusha pakasuba kakumupwilo.”

⁴¹ Ulo baumfwile mfi abakulu ba Bayuda batatikile ukuyilishanya pamulandu wamashiwi awo Yesu asosele ati, “Nine mufuba wafuma kumulu.”

⁴² Epo basosele ati, “Napo ngu te mwana Yosefe? Bawishi nabanyina twalibeshiba. Nga nishani nomba akoebela ati, ‘Nafuma kumulu?’”

⁴³ Yesu alibasukile ati, “Lekenipo ukuyilishanya.

⁴⁴ Takupo uungesa kuli nebo nangu umo, sembi Bata abantuma bamuleta kuli ne. Epo nandibo nakwisa kumubusha pakasuba kakumupwilo.

⁴⁵ Abasoseshi balembele ati, ‘Abantu bonse bakwisa kusambilishiwa na Lesa.’ Uyo onse uukoumfwa ifyaku Bata nokusambilila kuli Ye ewisa kuli nebo.

⁴⁶ Takupo nangu umuntu umo uwabona Bata iyowo, kuntu nebo newafuma kuli Lesa, ene namubona.

⁴⁷ Nachine nkomweba ati, umuntu uwanchetekela ali nobumi butashila.

⁴⁸ Nine mufuba uupela ubumi.

⁴⁹ Ifikolwe fyenu fyalile mana muchiswebebe, kuntu fyalifwile.

⁵⁰ Nomba umufuba uwafuma kumulu wakuti nga muntu aulya takafwilililepo.

⁵¹ Nine mufuba wabumi uwafuma kumulu. Kati muntu uuli onse aalya ngu mufuba, akwikalilila. Nakambi umufuba uyo nakumupela mubili wanji ukuti abantu bonse bamuchalo babe nobumi.”

⁵² Penkapo abakulu ba Bayuda batatikile ukutalikishanya bati, “Ngoyu muntu kuti atupela shani umubili wakwe ukuti tulye?”

⁵³ Elo Yesu asosele kuli bo ati, “Nachine nkomweba ati, kati mwebo tamukolyapo umubili wa Mwana wa Muntu nokunwa umulopa wakwe, tamwakabepo nobumi.

⁵⁴ Umuntu onse uwakulya umubili wanji nokunwa umulopa wanji akuba nobumi butashila, elo nakwisa kumubusha pakasuba kakumupwilo.

⁵⁵ Pakuti umubili wanji echakulya chinenene, nomulopa wanji echakunwa chinenene.

⁵⁶ Muntu onse uwakulya umubili wanji nokunwa umulopa wanji ewikala muli nebo nandibo muli ye.

⁵⁷ Pakuti Bata abayikalilila ababumi ebantuma nebo, epo pamulandu waku Bo nandibo nalikalilila uwabumi. Munshila imo yenka, muntu onse uwakulya nebo akwisa kuba nobumi pamulandu wakunebo.

⁵⁸ Ngu emufuba uwafuma kumulu, taulipo ukubati mufuba uwo ifikolwe fyenu fyalile, elo fyalifwile. Uyo onse uwakulya ngu mufuba akuba nobumi butashila.”

⁵⁹ Yesu asosele mfi ulo alikusambisha munanda yakulombelamo Lesa mu Kapenaumu.

Amashiwi aapela ubumi butashila

⁶⁰ Abenji abamubakusambila bakwe ulo baumfwile nga mashiwi, basosele ati, “Nku kusambisha kwakosa ukwinekantu. Mba ninani uwingakumfwa?”

⁶¹ Ukwambula ukumweba, Yesu alishibile ukuti abakusambila bakwe balikuyilishanya pamashiwi aya. Elo asosele kuli bo ati, “Napo nga mashiwi akolenga ukuti munenuke?

⁶² Nga chingaba shani ukubona Umwana wa Muntu akobwelela kumulu uko afumine?

⁶³ Umupashi Wabuta eupela ubumi butashila. Umuntu tekuti abe nobumi ubu umwine enka. Amashiwi aya ayo nkomweba eyaleta Umupashi waku Lesa uupela ubumi.

⁶⁴ Nomba bambi abakumwebo tabakochetekelapo.” (Yesu alibeshibile ukutula pakutatika abo abatachetekele nangulya uwakumwembula.)

⁶⁵ Nakambi asosele ati, “Ngu emulandu wine namwebele ati takupo nangu umo uungesa kuli nebo, sembi Bata bamupela ifiso ifyakwisa kuli nebo.”

⁶⁶ Panuma yaku mfi, abenji abakusambila bakwe balimushile, balekele ukumukonka.

⁶⁷ Elo Yesu afumbile abakusambila ikumi na babili ati, “Napo namwe mukofwaya ukunsha?”

⁶⁸ Simoni Petulo alimwasukile ati, “Bashikulu, mba nikuli nani twingaya? Nimwe mukwete amashiwi aapela ubumi butashila.

⁶⁹ Nomba twachetekela nokwishiba ati nimwe Uwapatulika wafuma kuli Lesa.”

⁷⁰ Yesu abasukile ati, “Napo tenepo namusalile mwe bakusambila ikumi na babili? Nomba umo uwakumwebo nimbifi!”

⁷¹ Alikusosa ifyaku Yuda, umwana Simoni Isikaliyoti. Pakuti Yuda, nangu kati ali umo uwabakusambila ikumi na babili, ewakwisa kumwembula.