Yohane 5 - Chipangano Chabwangu

Yesu aposha umuntu kuchishiba cha Betesaida

¹ Panuma yamfi, Yesu ayile ku Yelusalemu ukwali ubushiku ubukulu bwa Bayuda.

² Kumbali ya Mulyango Wambelele mu Yelusalemu kwali ichishiba ichalikwitwa Muchihebele ati Betesaida. Uko kwali nensaka shisano.

³ Munsaka imo emwali kulala abalwele abenji, abalinga impofu, abalemana nabafungauka amaboko namolu. [Mba bonse bali kulindilila ukufundaulwa kwamenshi muchishiba.

⁴ Pakuba munshita shimbi umungelo waku Lesa alikuya muchishiba mukufundaula amenshi. Umulwele onse uwabalilapo ukuchilukila muchishiba ulo amenshi afundayikile, ewalikupola kubulwele bonse ubo ali nabo.]

⁵ Nomba munsaka imo mwali umuntu umo uwalwele imyaka amakumi atatu nemyaka isano na itatu.

⁶ Ulo Yesu amubwene alilele, alishibile ukuti ngu muntu alilwala inshita iitali. Epo alimufumbile ati, “Napo ukofwaya ukupola?”

⁷ Umulwele ngulya alimwasukile ati, “We mfumu, tanshakwatapo nangu umo nkuno uwingambika muchishiba ulo amenshi afundayikile. Ulo njesha ukwinjilamo muntu umbi alanchilawila, elo ayinjilamo.”

⁸ Echo Yesu asosele kuli ye ati, “Ima, bula amachila obe ulokuya.”

⁹ Bwangu-bwangu umuntu ngulya alipolele, abulile amachila akwe nokuya. Apo pali pakasuba ke Sabata.

¹⁰ Elo abakulu ba Bayuda baebele umuntu uwapolele ati, “Lelo kasuba ke Sabata. Tachasuminishiwa mu Mafunde esu ukuti upinte amachila obe.”

¹¹ Ye alibasukile ati, “Umuntu uwamposha ewanjeba ati, ‘Bula amachila obe ulokuya.’”

¹² Balimufumbile ati, “Ngoyo muntu ninani uwayisa kukweba ati, ‘Bula amachila obe ulokuya?’”

¹³ Nomba umuntu uwapolele tamwishibilepo pantu pali ibumba lyabantu ilikulu, na Yesu alyongolokelepo.

¹⁴ Panuma, Yesu amusangile munanda yaku Lesa. Elo asosele kuli ye ati, “Umfwa nomba ulipolele, wibifyapo nakambi ukwebati ichintu ichikulu ichabipisha chikakuchitikila webo.”

¹⁵ Elo muntu ngulya ayile nokweba abakulu ba Bayuda ukuti ni Yesu ewamuposeshe.

¹⁶ Nomba batatikile ukuchusha Yesu pakuti aposeshe umuntu pakasuba ke Sabata.

¹⁷ Yesu alibasukile ati, “Bata babomba imilimo inshita shonse, epo nandibo ningile ukuchitila mumo mwenka.”

¹⁸ Nga mashiwi eyalengele abakulu ba Bayuda ukuti bafwayishe ukwipaya Yesu. Temulandupo wakutoba ifunde lyakasuba ke Sabata lyenka iyowo, kuntu nipakulabila ati Lesa ebawishi. Muli nga mashiwi Yesu ayilingile kuba uwalingana na Lesa.

Insambu sha Mwana waku Lesa

¹⁹ Yesu alibasukile abakulu ba Bayuda ati, “Nachine nkomweba ati, Umwana tachitapo kantu nangu kamo apaenka. Ye achita fyonse ifyo abona Bawishi bachita. Pakuti yonse imilimo achita Wishi, no Mwana naye alachita yenka njilya.

²⁰ Pakuti Bawishi balitemwa Umwana, elo balamulanga ifintu ifyo Bo bachita. Elo akwisa kumulanga ifintu ifikulu ukuchila pali mfi, epo mwebo bonse mwakwisa kushimbwa ukwinekantu.

²¹ Ukubati nimulya umo Bawishi babushisha abafwa nokubapela ubumi, munshila imo yenka Umwana naye akopela ubumi kubantu abo akofwaya.

²² Bawishi tabapingulapo umuntu nangu umo, kuntu bapela Umwana insambu shonse ishakupingula

²³ pakuti abantu bonse bachinshike Umwana kubati nimfilya bachinshika Bawishi. Umuntu onse uutachinshikapo Mwana takochinshikapo na Bawishi abamutumine.

²⁴ “Nachine nkomweba ati, onse uukoumfwa amashiwi anji nokuchetekela muli Ye uwantumine, ali nobumi ubutashila. Ngu tayise kupingulwa pantu apulamo kale mumfwa nokuya kwinjila mubumi.

²⁵ Nachine nkomweba ati, inshita ikoyisa, nanomba ilifikile kale, ulo abafwa bakwisa kumfwa ishiwi lya Mwana waku Lesa, nambalya bonse abakolyumfwa bakubukila kubumi.

²⁶ Kubati nimwenka mulya Bawishi babela entulo yabumi, mumo mwenka alimuchitile Umwana wakwe ukuba intulo yabumi.

²⁷ Elo alipela Umwana insambu shabupingushi, pantu ye Mwana wa Muntu.

²⁸ Mwilenga mushimbwe pali nchi, inshita ikoyisa ulo abafwa bonse bakwisa kumfwa ishiwi lyakwe.

²⁹ Elo bakwisa kufuma mumanda shabo, kuntu bo abalikuchita bwino bakwisa kubuka nokuba nobumi ubutashila, nambalya abalikuchita ububi bakwisa kubuka nokupingulwa.

Bukamboni pali Yesu

³⁰ “Apanenka tekuti nchitepo akantu nangu kamo munsambu shanji. Nebo mpingwila bwaka mwenka umo Lesa anjebela. Elo ubupingushi bwanji bwaba ubwalungama pakuti nshichitapo ifyo nemwine mfwaya, kuntu ifyo uyo uwantuma afwaya.

³¹ “Kati nebo nkoyisosela ifyanji nenka, ekuti bukamboni bwanji bwabufi.

³² Nomba ekwali umbi uwaba imboni yanji, nakambi nalishiba ukuti bukamboni bwakwe bwachine.

³³ Mwebo mwatumine intumi kuli Yohane Mubatishi, ye apele bukamboni bwakwebesha.

³⁴ Tekwebati nomba nebo nkofwayapo bukamboni bwabantu iyowo, kuntu nkososa nchi ukuti mwebo mwise mupuluke.

³⁵ Yohane ali kubati inyali iyakusanika nokubutisha. Echo mwebo mwalisekelele panshita iinini ukwikala mukusanika kwakwe.

³⁶ Nomba ndikwete bukamboni ubukulu ukuchila ubo Yohane Mubatishi amupele. Boneni nebo nkobomba imilimo iyo Bata bampele. Nji milimo eyilanga ukwebati Bata ebantumine.

³⁷ Elo Bata abantuma bakopela bukamboni pali nebo. Mwebo tamwaumfwapo Ishiwi lyakwe iyowo, nangu ukubona ichinso chakwe.

³⁸ Mwebo tamukosungapo amashiwi aku Bata mumitima yenu, pakuti tamukochetekelapo muli ye uwo atuma.

³⁹ Mulafwayilisha ifya Mumalembo Apatulika pantu mulanguluka ukwebati emo mwingasangamo ubumi butashila. Nga Malembo eapela bukamboni pali nebo.

⁴⁰ Elo tamufwayapo ukwisa kuli nebo ukuti mube nobumi butashilapo.

⁴¹ “Nebo nshikofwayapo ukutondayisha ukufuma kubantu.

⁴² Nomba nalishiba ukuti mwebo tamwatemwapo Lesa.

⁴³ Nebo nayisa munsambu shaku Bata, kuntu tamwampokelelapo iyowo. Ulo umuntu umbi akwisa munsambu shakwe umwine, mwakwisa kumupokelela.

⁴⁴ Mwebo mulapokelela ukutondayisha ukufuma kubanenu, kuntu tamupokelelapo ukutondayisha ukufuma kuli Lesa. Nga kuti mwanchetekela shani?

⁴⁵ Mwilanguluka ukuti nebo nakwisa kumupela umulandu kuli Bata. Nomba Mosesi uwo mwabikamo ubuchetekelo, ewakumupela umulandu.

⁴⁶ Kati mwebo mwachetekela Mosesi mukwebesha, nga mwalinchetekela pakuti ifyo Mosesi alembele fyaku nebo.

⁴⁷ Nomba pakuti tamwachetekelapo ifyo alembele Mosesi, mba kuti mwachetekela shani mufyo nkososa?”