Yohane 4 - Chipangano Chabwangu

Yesu nomwanakashi umwina Samaliya

¹ Nomba Abafalisi balyumfwile ukuti Yesu alikoobola nokubatisha abakusambila abenji ukuchila Yohane.

² (Ukwebesha Yesu umwine tabatishepo nangu umo, kuntu abakusambila bakwe.)

³ Ulo Yesu aumfwile ifyalikusoswa, alifumine ku Yudeya nokubwelela ku Galili.

⁴ Mulwendo ulo akalangenye pakati kachalo cha Samaliya.

⁵ Ulo ali mu Samaliya, afikile kumushi umo uwitwa Sika, apepi nebala ilyo Yakobe apele umwana wakwe Yosefe.

⁶ Kuchifulo uko kwali ichishima chakwa Yakobe. Pakuti Yesu alikatele palwendo, ayikele pambali yachishima. Chali kubati akasuba pakati kamutwi.

⁷ Elo umwanakashi umwina Samaliya ayishile mukutapa amenshi. Yesu asosele kuli ye ati, “Mpelako amenshi aakunwa.” (

⁸ Panshita iyo abakusambila bakwe bayile mumushi mukushita ifyakulya.)

⁹ Umwanakashi ngulya alimwasukile ati, “Webo uli mu Yuda, nandibo ndi Musamaliya. Mba nindo ukonombela amenshi aakunwa?” (Pakuti Abayuda tabomfwanapo nabena Samaliya.)

¹⁰ Yesu alyasukile ati, “Nga wayishibilepo ifyo Lesa apela nokwishiba uyo uukokulomba amenshi aakunwa, nawebo nga wamulomba amenshi aabumi, naye nga akupela.”

¹¹ Umwanakashi asosele ati, “Mwe mfumu, tamukwetepo mbeketi, ichishima nacho chitali, mba nikwisa mwingafumya amenshi aabumi?

¹² Ichikolwe chesu Yakobe ewatupele nchi chishima, umwine nabana bakwe nefitekwa fyakwe emo balikunwa. Napo webo kuti wayilinga ukuba umukulu ukuchila Yakobe?”

¹³ Yesu alimwasukile ati, “Muntu onse uunwa nga menshi akwisa kumfwa ichilaka nakambi,

¹⁴ kuntu onse uunwa amenshi nakumupa tayise kumfwapo chilaka nakambi. Amenshi awo nakumupa akwisa kuba muli ye akamfuku-mfuku nokumupela amenshi aabumi butapwa.”

¹⁵ Umwanakashi asosele ati, “Mwe mfumu, mpeleniko nga menshi! Ekuti niyisa kumfwako ichilaka nakambi, nangula ukubwela mukutapa amenshi nakambi.”

¹⁶ Elo Yesu amwebele ati, “Koya kete umulume obe, nokubwela nakwe.”

¹⁷ Umwanakashi aasukile ati, “Nshakwatapo mulume.” Yesu amwasukile ati, “Wasosa bwino pakweba ati tawakwatapo mulume.

¹⁸ Pakuti webo walyupwapo kubalalume basano. Uyo uli nakwe nomba temulume wobepo. Nachine wasosa ukwebesha.”

¹⁹ Umwanakashi asosele ati, “We mfumu, nayishiba ukuti uli musoseshi.

²⁰ Ifikolwe fyesu fyalikulombela Lesa muli ndu lupili, kuntu mwebo mwe Bayuda musosa ati mu Yelusalemu echifulo chakulombelamo Lesa.”

²¹ Yesu asosele ati, “We mwanakashi, nachine inshita yakwisa apo abantu tabayise kulombelapo Bata muli ndu lupili nangu mu Yelusalemu.

²² Mwebo mulomba uyo muteshibilepo, kuntu fwebo tulomba uyo twishibile pakuti chipulusho chifuma ku Bayuda.

²³ Nomba inshita ikoyisa, nanomba ilifikile kale, ulo abamulomba mukwebesha bakalomba Bata kufiso fyaku Mupashi Wabuta ukubati niumo afwayila. Ukulomba ukwinenene uko Bata bafwaya.

²⁴ Lesa Mupashi, nikufiso fyaku Mupashi Wabuta uko abantu bangamulombela mwenka umo abela.”

²⁵ Umwanakashi asosele ati, “Nalishiba ukuti Uwasubwa waku Lesa akwisa. Ulo Ye akwisa, akutubusha ifintu fyonse.”

²⁶ Yesu alimwasukile ati, “Nine nkososhanya nobe.”

²⁷ Penka pali njilya nshita, abakusambila baku Yesu balibwelele. Elo balishimbilwe ukwinekantu ulo basangile Yesu akososhanya nomwanakashi. Nomba tapalipo nangu umo mubaku bo uwasosele kumwanakashi ati, “Findo ukofwaya?” Nangula ukufumba Yesu ati, “Mulandu ndo mukososhanya nangu mwanakashi?”

²⁸ Elo umwanakashi ngulya ashile umutondo wakwe, abwelele kumushi nokuya kusosa kubantu ati,

²⁹ “Iseni mubone umuntu uwambusha fyonse ifyo nachita. Napo kuti aba Ewasubwa waku Lesa?”

³⁰ Nachine balifumine mumushi nokuya kuli Yesu.

³¹ Muli njilya nshita, abakusambila balikumupapatila Yesu ukuti alye.

³² Nomba alibasukile ati, “Ndikwete ichakulya icho mwebo muteshibilepo.”

³³ Elo abakusambila bakwe batatikile ukufumbashanya mukati kabo ati, “Napo kuti kwabapo umuntu uumuletele ichakulya?”

³⁴ Yesu asosele kuli bo ati, “Ichakulya chanji kumfwila uyo uwantumine nokushilisha umulimo wakwe uwo ampele ukubomba.

³⁵ Tempalya mwebo mweba ati, ‘Kwashala imyeshi ine, elo kwakuba ukulobolola.’ Nomba nkomweba ati lolekesheni mumabala, imbuto shilipile kale nenshita yakusepa ilifikile.

³⁶ Umuntu uukolobolola ulalipilwa mumulimo wakwe nakambi akalobolola ifitwalo fyabumi butapwa. Epo umuntu uubyala nangulya uulobolola bakwisa kusekelela pamo.

³⁷ Nku kusosa kwakwebesha ukwakuti, ‘Umuntu umo alabyala, umunakwe naye alalobolola.’

³⁸ Nebo namutuma ukuti mukalobolole umo mutalimine. Abantu bambi ebalimine, mwebo mwasangamo bwaka ifitwalo fyamilimo yabo.”

³⁹ Abena Samaliya abenji abafumine mumushi ngulya, balichetekele muli Yesu pamulandu wamashiwi asosele umwanakashi ati, “Alinjebele ifintu fyonse ifyo nachita mubumi bwanji.”

⁴⁰ Ulo bafikile kuli Yesu, balimupapatile ukuti bekale nakwe mumushi uyo. Elo Yesu ayikele nabo inshiku shibili.

⁴¹ Elo abantu abenji balimuchetekele pamulandu wamashiwi abasambishe.

⁴² Epo basosele kumwanakashi ati, “Twachetekela nomba, tepamulandu wakuli mfilya ifyo watubusha, kuntu pantu twayumfwila fwebene. Elo twayishiba ukuti nachine ngu Mupulushi wachalo.”

Yesu aposha mwana-chilolo umwalalume

⁴³ Panuma yakwikala inshiku shibili nkulya, Yesu alifumineko nokuya kuchalo cha Galili.

⁴⁴ Yesu umwine asosele ati, “Umusoseshi tapelwapo muchinshi muchalo chakumyabo.”

⁴⁵ Ulo afikile mu Galili abantu bamuchalo nchilya balimupokelele bwino, pakuti ulo bayile ku Yelusalemu kukulya Chakulya Chakuchilila, balibwene ifintu fyonse ifyo achitile mu Yelusalemu panshita yanku kulya.

⁴⁶ Epo Yesu alibwelelemo kumushi wa Kana waku Galili, uko asangwile amenshi ukuba waini. Elo kwali chilolo wabuteko uwali nomwana wakwe umwalalume uwalikulwala mu Kapenaumu.

⁴⁷ Ulo aumfwile ati Yesu alishile ukufuma ku Yudeya ukuya ku Galili, alileko kuli Ye nokumufumba ukuti aye akaposhe umwana wakwe uwali apepi nokufwa.

⁴⁸ Yesu asosele kuli ye ati, “Nga tamubwenepo ifyafiso ifikulu nefyakushimbwisha, tekuti muchetekelepo, yii.”

⁴⁹ Chilolo alimwasukile ati, “Mwe mfumu, katulokuya ulo umwana wanji atalafwa.”

⁵⁰ Yesu asosele kuli ye ati, “Koya bwaka umwana obe alipolele.” Elo muntu ngulya alichetekele amashiwi aku Yesu nokuya kaya.

⁵¹ Ulo achili munshila, akumenye abapyungi bakwe abamwebele ati, “Umulumbwana obe alipolele.”

⁵² Elo Ye abafumbile ati, “Ninshita ndo umwana atatikile ukubako bwino?” Nabo balimwasukile ati, “Nimayilo mukalila-mumbwe elo apolele.”

⁵³ Elo bawishi balibwishe ukuti nji enshita iyo Yesu abebele ati, “Umwana obe alipolele.” Ulo afikile bwaka, Ye nabamunanda yakwe bonse, balichetekele.

⁵⁴ Nchi echafiso ichikulu ichalenga bubili icho Yesu achitile ulo afumine ku Yudeya nokuya ku Galili.