Yohane 3 - Chipangano Chabwangu

Yesu na Nikodemasi

¹ Kwali intungulushi ya Bayuda iyali kwitwa Nikodemasi, yali iyamwibumba lya Bafalisi.

² Ayile kuli Yesu ubushiku nokumweba ati, “We musambishi, twalishiba ukuti uli musambishi uwatumwa na Lesa. Takupo nangu umo uwingachita nji milimo iyafiso ifikulu iyo ukochita, sembi Lesa ali pamo nakwe.”

³ Yesu alimwasukile ati, “Nachine nkokweba ati, nga muntu tafyelwepo libili tekuti enjilepo mu Bufumu bwaku Lesa.”

⁴ Nikodemasi alimufumbile ati, “Mba muntu umukulu kuti afyalwa shani libili? Nachine tekuti enjilepo mwifumo lyakubanyina nokufyalwa nakambi!”

⁵ Yesu alimwasukile ati, “Nachine nkokweba ati, nga muntu tafyelwepo kumenshi naku Mupashi Wabuta tekuti enjilepo mu Bufumu bwaku Lesa.

⁶ Uufyalwa kumuntu muntu, kuntu uufyalwa ku Mupashi Wabuta wamupashi.

⁷ Wishimbwa pakuti nakweba ati ulingile ukufyalwa libili.

⁸ Chili munshila imo yenka kuli bo abakofyalwa ku Mupashi Wabuta.” Umwela ulapupa nokuya uko ufwaya. Mwebo mulomfwa ichiunda chauko bwaka, kuntu tamwishibapo uko ufuma noko uya.

⁹ Nikodemasi alimufumbile ati, “Nga nchi kuti chaba shani?”

¹⁰ Yesu alimwasukile ati, “Webo uli musambishi mukulu muba Isilaeli, epo nchi kanshi tauchishibilepo?

¹¹ Nachine nkokweba ati, fwebo tusosa icho twayishiba nokweba abantu icho twabona. Nomba takupo nangu umo muli mwe uukofwaya ukupokelela amashiwi esu.

¹² Mwebo tamukochetekelapo ulo nkomweba fintu fyamuchalo, nga mwakuchetekela shani ulo ningamubusha ifintu fyakumulu?

¹³ Elo takupo umuntu uwanina kumulu, kuntu Umwana wa Muntu, uyo uwafumineko.”

¹⁴ Chili ukubati nimfilya Mosesi asumbwile insoka yamukuba pachiti muchiswebebe. Munshila imo yenka Umwana wa Muntu akowamina ukusumbulwa

¹⁵ ukuti onse uwamuchetekela abe nobumi butapwa.

¹⁶ Pakuti Lesa atemenwe abantu bonse muchalo. Echo apele Umwana wakwe uwafyalwa enka, ukuti onse uwamuchetekela efwa iyowo, kuntu abe nobumi butapwa.

¹⁷ Pakuti Lesa tatuminepo Umwana wakwe muchalo ukuti apingule abantu, kuntu ukuti abapulushe.

¹⁸ Uyo onse uwakuchetekela mu Mwana takopingulwapo, kuntu uyo onse uutachetekela ye apingulwa kale, pantu tachetekelapo mu Mwana umo enka waku Lesa.

¹⁹ Ubupingushi ifyo bwaba nimfi, ukusanika kulishile muchalo, kuntu abantu batemwa imfinshi ukuchila ukusanika, pantu imilimo yabo iibi.

²⁰ Muntu onse uuchita ububi ewapata ukusanika, pantu tafwayapo imilimo yakwe iibi ukuti iboneke kubantu.

²¹ Nomba muntu onse uuchita ifintu ifyakwebesha, ewisa kukusanika ukulanga ukuti imilimo yakwe yakumfwila Lesa.

Yesu na Yohane

²² Panuma yaku mfi, Yesu nabakusambila bakwe bayile kuchalo cha Yudeya uko ayikele nabo nokubatisha.

²³ Yohane naye alikubatisha ku Enoni, apepi naku Salimu, pantu nkulya kwali amenshi ayenji. Abantu balikuya kuli ye, elo alikubabatisha. (

²⁴ Nji yali ninshita ulo Yohane tabalamuposa muchifungo.)

²⁵ Bamo abakusambila baku Yohane batatikile ukutalikishanya no Muyuda umo pafyamulandu wakafuto kakusangululwa.

²⁶ Elo bayile kuli Yohane nokumweba ati, “We musambishi, napo ukomwibukisha ngulya muntu uwali nawebo kumutule-suba wa Yodani, ngulya uwo mwasoselepo? Naye nomba akobatisha, nakambi abantu abenji bakoya kuli ye.”

²⁷ Yohane alyasukile ati, “Takupo umuntu uwingakwatapo akantu, sembi Lesa amupela.

²⁸ Mwebo muli bakamboni banji, mulishibile ifyo nasosele ati, ‘Nebo tanshilipo Uwasubwa waku Lesa, kuntu natuminwe ukuba pantanshi yakwe.’

²⁹ Uyo uukoupa emwine wabwinga, kuntu chibusa wabwinga emakanina bwaka nokukutika, nokusekela pakumfwa ishiwi lyawabwinga. Kanshi nku ekusekela kwanji ukwakufikapo.

³⁰ Ye alingile ukuba umukulu, elo nebo mbe uwachepako.”

Yesu afuma kumulu

³¹ Uyo uwafuma kumulu emukulu ukuchila bonse. Uyo uwafuma muno chalo, epela wamuno chalo nakambi asosa nefyamuno chalo. Nomba uyo uwafuma kumulu ewaba uwapamulu pali fyonse.

³² Asosa ifyo abwene nokumfwa, kuntu takupo umuntu nangu umo upokelela amashiwi akwe.

³³ Nomba muntu onse uupokelela amashiwi akwe, ashininkisha ukwebati Lesa wakwebesha.

³⁴ Uyo uwatumwa na Lesa eusosa amashiwi aku Lesa, pakuba Lesa alimupela Umupashi Wabuta ukufikapo.

³⁵ Bawishi balimutemwesha Umwana wabo. Echo balibika ifintu fyonse mufiso fyakwe.

³⁶ Uyo onse uuchetekela mu Mwana aliba nobumi ubutapwa, kuntu onse uutachetekelapo Umwana tayise kuba nobumi, kuntu ubukali bwaku Lesa bwakwikalililapo pali ye.