Yohane 2 - Chipangano Chabwangu

Ubwinga mumushi wa Kana

¹ Ulo papitile inshiku shibili kwali ubwinga mumushi wa Kana, mu Galili. Banyina baku Yesu nabo eko bali.

² Yesu nabakusambila bakwe balitilwe kubwinga mbu.

³ Ulo waini ashilile, banyina Yesu bamwebele ati, “Tabakwetepo waini.”

⁴ Elo Yesu ayasukile banyina ati, “Nga nchite shani? Inshita yanji tayilafika!”

⁵ Nangu chali mfilya, banyina Yesu basosele kubapyungi ati, “Chonse icho akomweba muchite.”

⁶ Abayuda baliba nakafuto kakusamba ukuti babe abasangululwa. Echo kwali imitondo iikulu yamabwe isano na umo iyamenshi, ubukulu bwayiko muli umo nangula kuti mwayinjila amatepe asano, nangula ukuchilapo.

⁷ Yesu asosele kubapyungi ati, “Iwusheni nji mitondo namenshi.” Nachine yaliwile sululu.

⁸ Elo abebele ati, “Nomba tapuleni amenshi mutwale kumukulu wamutebeto.” Balimutwalile amenshi

⁹ ngalya, nomba aalukile waini. Elo asondele. Nomba tayishibilepo nokwafumine ngu waini. (Lelo abapyungi abatapile amenshi ebayishibilepo.) Elo ayitile nshibwinga

¹⁰ nokuti kuli Ye, “Abantu bonse batatika ukupela waini uuweme pakwamba, panuma elo bapela waini uutawamishe. Nomba webo ulisungile waini uuweme ukufikila nanomba!”

¹¹ Yesu achitile nchi ichafiso ifikulu ichakwamba mu Kana, muchalo cha Galili. Uko aafisulwile ubuleme bwakwe, nabakusambila bakwe balimuchetekele.

¹² Panuma yaku mfi, Yesu nabanyina, bawakwe nabakusambila bakwe bayile ku Kapenaumu nokwikalako nkulya inshiku shinini bwaka.

Yesu aya kunanda yaku Lesa

¹³ Inshita yakulya Chakulya Chakuchilila yalifikile, epo Yesu ayile ku Yelusalemu.

¹⁴ Mulya munanda yaku Lesa, asangilemo abantu bakoshitisha ing’ombe, imbelele, nenkunda. Bambi nabo balikushintushanya indalama, balikele pamatebulu abo.

¹⁵ Elo Yesu apyatile umwando nokubafumisha panse pamo neng’ombe nembelele shabo. Alipenawile amatebulu yaku bo abalikushintushanya indalama.

¹⁶ Elo asosele kuli bo abalikushitisha inkunda ati, “Fifumisheni panse! Lekeni ukwalula Inanda yaku Bata ichifulo chamakwebo!”

¹⁷ Abakusambila bakwe balibukishe ifyo Amalembo Apatulika asosa ati, “Ukuyipela kwanji kunanda yenu, mwe Lesa, kwaaka muli ne kubati mulilo.”

¹⁸ Nomba intungulushi sha Bayuda shalifumbile ati, “Fiso ndo ifikulu wingachita ukutulanga ukuti uli nensambu shakuchita mfi?”

¹⁹ Yesu abasukile ati, “Tobauleni nji nanda yaku Lesa, epo nebo nakwimaka munshiku shitatu bwaka.”

²⁰ Abayuda bamufumbile ati, “Nji nanda yayimekwe mumyaka amakumi ane na isano naumo. Napo webo uungayimaka nakambi munshiku shitatu bwaka?”

²¹ Nomba inanda yaku Lesa iyo Yesu alikusosapo mubili wakwe.

²² Ulo abukile kumfwa, abakusambila bakwe balibukishe ati mfi efyo alikusosa. Epo balichetekele ifya Mumalembo nefyasosele Yesu fyonse.

Yesu alishiba mano abuntu

²³ Inshita Yesu ali mu Yelusalemu, munshiku sha Chakulya Chakuchilila abantu abenji balichetekele muli Ye pakubona ifyafiso ifikulu ifyo Ye achitile.

²⁴ Nangu chali mfilya, Yesu tabachetekelepo iyowo pantu alishibile ifyamumitima yabo.

²⁵ Elo tachafwayilwe umuntu uuli onse ukumubushako ifyakwikala kwabantu, pantu umwine alishibile ifyali mumitima yabo.