Yohane 19 - Chipangano Chabwangu

¹ Penkapo Pilato asosele kubantu ukumufumya Yesu nokumukupula.

² Abashilikali nabo balukile ing’ana yaminga nokumufwika kumutwi, nakambi bamufwika nomwinjila uwafituluka.

³ Balishile kuli Yesu nokuti, “Mutendepo Kankomba, we Mfumu ya Bayuda!” Elo balimupamine namapi.

⁴ Pilato alifumine panse nokuti ku Bayuda, “Boneni namuleta panse pali mwebo, mwishibe ukuti nshisangilemo mulandu muli ngu muntu nangu panini.”

⁵ Elo Yesu alifumine panse alifwite ing’ana yaminga nelaya ilyafituluka. Pilato asosele kuli bo ati, “Ningu umuntu ngulya!”

⁶ Ulo intungulushi shabachipupila nabashilikali bamubwene Yesu, balibilikishe bati, “Musamikeni! Musamikeni!” Elo Pilato asosele ati, “Mupinteni mwebene mumusamike pantu nebo tanshisangilemo umulandu muli Ye.”

⁷ Abayuda balyasukile bati, “Tuli nalyo ifunde lyesu ilikoti akowamina ukufwa, pakuti akoeba ukuti ni Mwana Lesa.”

⁸ Ulo Pilato aumfwa nga mashiwi, alitinine ukwinekantu.

⁹ Echo alinjile nakambi munanda yabupingushi nokusosa kuli Yesu ati, “Nikwisa wafuma?” Nomba Yesu tamwasukilepo iyowo.

¹⁰ Elo Pilato asosele kuli Yesu ati, “Nindo utakoyasukilapo? Taukoyishibapo ukuti ndi nensambu ishakukukakula neshakukusamika.”

¹¹ Yesu alyasukile ati, “Ukwambula Lesa ukukupela nshi nsambu nga taukwetepo fiso ifyakumpingula. Echo umuntu uwandetele kuli webo eukwete umulandu uukulu.”

¹² Pakumfwa mfi, Pilato afwayile ukumukakula, kuntu Bayuda balyawile bati, “Nga ukomukakula ngu muntu, ekwebati taulipo chibusa wakwa kateka mukulu waku Loma. Onse umuntu ukoyipela ubufumu, emulwani wakwa kateka mukulu waku Loma.”

¹³ Pilato pakumfwa nga mashiwi, alimuletele panse Yesu, ayikele pachipuna chabupingushi, kuchifulo ichikoyitwa, “Ulubansa Lwamabwe.” (Muchihebele bati, “Gabata.”)

¹⁴ Kali kasuba kakuteyanya inshiku nkulu ya Chakulya Chakuchilila, nakambi akasuba kali pakati kamutwi. Pilato asosele ku Bayuda ati, “Boneni ngu Imfumu yenu!”

¹⁵ Bonse balyawile bati, “Afwe, afwe! Musamikeni pamutashi!” Pilato abeba ati, “Kanshi kuti nasamika Imfumu yenu?” Intungulushi shabachipupila shalyasukile ati, “Tatukwetepo imfumu imbi, kuntu kateka mukulu waku Loma epela.”

¹⁶ Elo Pilato abapele Yesu ukuti bakamusamike abene. Abashilikali bayikete Yesu nokumutanjisha.

Basamika Yesu pamutashi

¹⁷ Elo ayipintila nomutashi wakwe, nokuya kuchifulo ichitwa, “Fupa Lyamutwi.” (Muchihebele bati, “Gologota.”)

¹⁸ Nkulya eko bamusamikile pamo nabambi abalalume babili, umo kumulyo umunakwe naye kuchipiko, Yesu ena pakati.

¹⁹ Pilato alilembelepo ichishibilo nokuchibika pamutashi waku Yesu. Palembelwe ati, “Yesu waku Nasaleti, Imfumu ya Bayuda.”

²⁰ Abayuda abenji balipendelepo pali nchi chishibilo pantu apo Yesu asamikilwe pali apepi napamushi. Chalilembelwe mumishobo itatu, Muchihebele, Muchilatini na Muchigiliki.

²¹ Epo intungulushi shabachipupila shasoseshe Pilato ati, “Mwilembapo ati, ‘Imfumu ya Bayuda,’ kuntu lembenipo ati, ‘Ngu muntu alikuyeba ati, Nine Mfumu ya Bayuda!’”

²² Pilato abasukile ati, “Icho nembele ndilembele.”

²³ Ulo abashilikali bashilile ukusamika Yesu pamutashi, babulile ifyakufwala fyakwe, balifipatwile pane, ukuti mushilikali abulepo ichiputulwa chimo. Elo babulile nomwinjila wakwe uutakwetepo mufukililo wali uwapikulwa ukufuma pamulu nokufika panshi.

²⁴ Elo abashilikali balisoshenye umo nomunakwe bati, “Mwilepulapo, kuntu tuchite bumwine-mano ukwebati twishibe uwakupoka ninani.” Nchi chalichitikile ukuti Amalembo afikilishiwe akoti, “Balyabene ifyakufwala fyanji, nokuchita bumwine-mano pamwinjila wanji.” Efyo bachitile abashilikali.

²⁵ Nomba apepi nomutashi waku Yesu, payimakene banyina nenkashi inabo, ebo Maliya muka Kulopasi na Maliya Magadala.

²⁶ Ulo Yesu abwene banyina nowakusambila uwo atemenwe balimakene, asosele kuli banyina ati, “We mwanakashi, bona umwana obe ngu!”

²⁷ Elo asosele kuwakusambila ati, “Bona banoko mba!” Ukufuma njilya nshita uwakusambila ngu atwite banyina Yesu kumushi wakwe.

Imfwa yaku Yesu

²⁸ Panuma ya mfi, Yesu alishibile ukuti fintu fyonse fyapwa, asosele ati, “Ndi nechilaka.” (Asosele mfi ukuti Amalembo afikilishiwe.)

²⁹ Pali nenongo iyayiwilemo waini uwasasa. Emo babikile umwepu, batunga kwitete, bamutambika kumulomo ukuti anwe.

³⁰ Ulo Yesu anwene waini asosele ati, “Kwashila.” Elo ayinamikile umutwi wakwe nokufwa.

Balasa Yesu umukondo mulubafu

³¹ Elo Abayuda balombele Pilato ukuti abasuminishe ukuya kukonaula amolu abantu abasamikilwe nokusamuna ifitumbi fyabo. Icho balombele mfi pantu kali kasuba akakupekanye Sabata. Pakuba tachalingilepo ukuti ifitumbi fikale pamutashi pe Sabata, pakuti nkalya kasuba kali akakulu.

³² Echo balishile abashilikali, bakonwene amolu aku ngulya uwakwamba, naumbi uwasamikilwe pamo nakwe.

³³ Nomba ulo bayishile kuli Yesu, basangile ukuti alifwile kale. Echo tabakonwenepo amolu akwe.

³⁴ Nomba umushilikali umo amulashile muchitumba kumukondo. Penkapo umulopa waliswile namenshi.

³⁵ Umuntu uwabwene ifintu mfi ewapele bukamboni. Elo bumboni bwakwe bwakwebesha. Alishibile ukuti ukusosa kwakwe kwachine ukuti namwebo muchetekele.

³⁶ Mfi fyalichitikilwe ukuti Amalembo afikilishiwe aakuti, “Talyayise kutobekapo ifupa lyakwe nangu limo iyowo.”

³⁷ Nakambi Amalembo ambi asosa ati, “Bakoyisa kumulolesha uwo balashile.”

Ukushikwa kwaku Yesu

³⁸ Panuma yamfi, Yosefe waku Alimateya afumbile Pilato ukwebati amusuminishe ukubula ichitumbi chaku Yesu. (Yosefe ngu ali wakusambila waku Yesu, nomba mubumfishi pantu alikutina abakulu ba Bayuda.) Elo Pilato alimusuminishe. Ayile nokupinta ichitumbi chaku Yesu.

³⁹ Elo Nikodemasi, ngulya uwayishile pakubala kuli Yesu ubushiku, aletele amafuta aapusene-pusene, aanunkila nangula umwanda umo mukulema kwaako.

⁴⁰ Elo babulile ichitumbi chaku Yesu nokuchisuba amafuta. Bachipombele munsalu ishambafuta ukubati akafuto ka Bayuda pakushika umuntu uwafwa.

⁴¹ Kuchifulo uko Yesu asamikilwe, kwali ibala. Namwibala mulya mwali imanda iyabwangu umo tabashikilemo umuntu nakale.

⁴² Pamulandu wakuti imanda nji yali apepi, nakambi kali kasuba kakuyiteyanya ake Sabata, babulile ichitumbi chaku Yesu nokuchishika mumanda.