Yohane 18 - Chipangano Chabwangu

Bayikata Yesu

¹ Ulo ashilile ukulomba nku, Yesu alifuminepo pamo nabakusambila bakwe, nokuya kubushilya yanika ya Kidiloni. Kwaliko nebala, uko Yesu ayile pamo nabakusambila bakwe.

² Yuda, uwamwembwile Yesu, naye alishibile nchilya chifulo pakuti Yesu alikuyako libili-libili nabakusambila bakwe.

³ Elo Yuda ayile kwibala, nebumba lyankondo lyaba Loma nabashilikali abatuminwe kuntungulushi shabachipupila na Bafalisi bayishile kwibala, balipintile inyali imyenje nefyakulwilako.

⁴ Pantu Yesu alishibile kabela ifikoyisa kumuchitikila, alibakumenye, abafumba ati, “Ninani mukofwaya?”

⁵ Nabo balimwasukile bati, “Ni Yesu waku Nasaleti.” Yesu abebele ati, “Nine.” Yuda uwamwembwile Yesu, naye alimakene pamo nabo.

⁶ Ulo Yesu abebele ati, “Nine,” balibwelele chimfutanuma, nokuwa panshi.

⁷ Nakambi Yesu alibafumbile inshita yachibili ati, “Ninani mukofwaya?” Nabo bayasukile ati, “Ni Yesu waku Nasaleti.”

⁸ Yesu alibasukile ati, “Ndimubushishe kale ukuti nine. Nga mukomfwaya, balekeni mba ndinabo balokuya.” (

⁹ Nchi chachitikile ukuti Amalembo afikilishiwe ayo asosele ukuti, “Nshaposelepo nangu umo uwaku bo mwampele.”)

¹⁰ Simoni Petulo uwali nomwele, aliusolomwene nokukwempula ukutwi kwamulyo ukwamupyungi wakwa chipupila mukulu. Ishina lyamupyungi ngulya ali ni Malichusi.

¹¹ Elo Yesu akalipile Petulo ati, “Bwelesha umwele muchitubyu. Napo ndeke ukunwenako kulukombo lwamachushi ulo Bata bampela?”

Batwala Yesu kuli Anasi

¹² Elo abashilikali baba Loma, umukulu wankondo nabamalonda abatuminwe nabakulu balimwikete Yesu nokumukaka.

¹³ Pakwamba bamutwite kuli Anasi, wishi-fyala wakwa Kayafasi, uwali chipupila mukulu muli ngulya mwaka.

¹⁴ Kayafasi ngu ewaebele abanakwe ukuti chali ichawama ukuti umuntu umo afwile abenji.

Petulo akana Yesu

¹⁵ Simoni Petulo pamo nowakusambila umbi, bakonkele Yesu uko bamutwite. Uyo umbi uwakusambila alishibikilwe kuli chipupila mukulu. Echo ayinjilile pamo na Yesu mulupango lwananda yakwa chipupila mukulu.

¹⁶ Nomba Petulo alimakene pamulyango panse. Elo uwakusambila umbi uwayishibikilwe kuli chipupila mukulu, alifumine panse nokupapatila umwanansungu uwalikulinda pamulyango ukuti amwinjishe Petulo mukati. Elo amusuminishe.

¹⁷ Umwanansungu ngulya, uwali pamulyango asosele na Petulo ati, “Napo webo taulipo umo uwa bakusambila baku ngu muntu?” Petulo asosele ati, “Tenepo.”

¹⁸ Ababomfi nabashilikali bakoseshe umulilo wamafyanga nokonta pakuba kwali impepo. Petulo naye ali nabo pamo.

Chipupila mukulu afumba Yesu

¹⁹ Ulo bali kunanda uko, chipupila mukulu alifumbile Yesu pamulandu wabakusambila bakwe, napamulandu wafyakusambisha kwakwe.

²⁰ Yesu alimwasukile ati, “Nalikusosa apabuta kubantu. Nalikusambisha lonse mumananda akulombelamo Lesa namunanda yaku Lesa uko balongana Abayuda bonse. Nshalikusosapo akantu mubumfinshi iyowo.

²¹ Mba findo ukomfumbila? Fumba abantu abaumfwile ifyo nalikusambisha. Ebeshibile ifyo nasosele.”

²² Ulo ashilile akusosa mfi, umo uwabashilikali uwayimakenepo, apamine Yesu ulupi pamenso nokuti, “Kanshi efyo ukoyasuka chipupila mukulu?”

²³ Yesu alyasukile ati, “Nga nasosapo ububi, shininkisha ububi bwanji. Nomba nga nasosa bwino, nindo ukompamina?”

²⁴ Elo Anasi atumine Yesu uwakakilwe kuli Kayafasi, chipupila mukulu.

Petulo akana Yesu nakambi

²⁵ Ulo Simoni Petulo ayimakene akoonta umulilo, bambi balimufumbile ati, “Napo tewepo umo uwabakusambila bakwe?” Nomba alikene nokuti, “Tenepo iyowo.”

²⁶ Umo uwababomfi bakwa chipupila mukulu, eye uwamukowa waku ngulya uwo Petulo akwempwile ukutwi, amufumbile ati, “Napo nshakubwenepo webo mwibala pamo na Yesu?”

²⁷ Nakambi Petulo alikene. Bwangu-bwangu tambala alililile.

Batwala Yesu kuli Pilato

²⁸ Ulo bwachele batwite Yesu ukufuma kunanda kuli Kayafasi nokumutwala kuli Pilato, kateka wabena Loma. Elo abakulu nabo balikutina ukwinjilamo munanda yabupingushi pantu balikutina ukuyikowesha icho balimupepi nokulya Chakulya Chakuchilila.

²⁹ Epo Pilato afumine panse nokubafumba ati, “Mba mulandu ndo mukopela ngu muntu?”

³⁰ Nabo balimwasukile ati, “Nga tachitilepo umulandu uubi, nga tatumuletelepo kuli mwe.”

³¹ Elo Pilato asosele kuli bo ati, “Mupinteni mwe bene muye mumupingule ukukonka amafunde enu.” Abayuda baasukile ati, “Tatwapelwapo ifiso fyakupingula umulandu wakwipaya umuntu mumafunde esu.” (

³² Nchi chachitikile ukuti amashiwi aku Yesu afikilishiwe awo asosele nokulanga imfwa iyo aali nokufwilamo.)

³³ Pilato alinjile nakambi munanda yamilandu nokwita Yesu. Elo amufumbile ati, “Napo webo niwe Imfumu ya Bayuda?”

³⁴ Yesu amwasukile ati, “Napo niwe we mwine ukofumba mfi nangula bambi bakokubusha?”

³⁵ Pilato alyasukile ati, “Napo nebo ndi Muyuda munobe? Abantu bamushobo obe nentungulushi shabachipupila eshakuletele kuli nebo. Chindo wachita?”

³⁶ Yesu alyasukile ati, “Ubufumu bwanji tabuli bwamuli nchino chalo. Abuba bwapanonshi, abalumbwana banji nga balimine mukulwa pakuti nintwalwa kubakulu ba Bayuda. Nomba ubufumu bwanji tabuli bwapanonshi iyowo.”

³⁷ Elo Pilato amufumbile ati, “Kanshi webo uli mfumu?” Yesu alyasukile ati, “Ulilungikile pakusosa ati ndi mfumu. Nipali ngu mulandu nayishile pano chalo nakambi echo nafyalilwe ukuti njise nondolole ifyakwebesha. Elo umuntu onse uwayishiba ifyakwebesha, alomfwa ifyanji.”

³⁸ Pilato afumbile Yesu ati, “Nga ukwebesha uko ukososa chindo?” Ulo ashilile ukusosa amashiwi nga, afumine panse nokweba abakulu ba Bayuda ati, “Muli ngu muntu nshisangilemo mulandu iyowo.

Yesu apingwilwa ukufwa

³⁹ Mwalikwata kafuto kakuti mukakwile umufungwa umo panshita yakulya Chakulya Chakuchilila. Kanshi mukofwaya ukuti mukakwile ngu imfumu ya Bayuda?”

⁴⁰ Elo abantu babilikishe ati, “Tukakwileni Balabasi, kuntu tengu iyowo!” (Balabasi ngu ali chipondo.)