Yohane 16 - Chipangano Chabwangu

¹ “Mfi nasosa kuli mwebo ukuti mwifuma muchichetekelo.

² Bakumufutwila kunse yamananda yakulombelamo Lesa. Mwandi inshita ikoyisa iyakuti abantu bakamwipaya nokulanguluka ukuti emo bakobombela Lesa imilimo iiweme.

³ Abantu bakuchita mfi kuli mwebo pantu tabayishibapo Bata nangu nebo.

⁴ Nomba mfi namweba nebo ukuti ulo yakwisa inshita yabo iyakufichita mfi, mwakwibukisha ifyo mwebele. “Nshamwebelepo mfi fintu pakutatika pakuti nali pamo namwe.

Umulimo wa Mupashi Wabuta

⁵ Nomba nkoya kuli uyo uwantumine, elo tapali nangu umo uwaku mwebo uukomfumba ati, ‘Nikwisa mukoya?’

⁶ Nipamulandu wakuti namweba mwebo amashiwi nga echo imitima yenu yayiwulamo nechikonko.

⁷ Nachine nkomweba ati, kuli mwebo chiweme ukuti mfumepo mpano, pakuba nga nshifuminepo, Umwafwilishi tayise kuli mwebo. Nomba nga naya, nakumutuma kuli mwe.

⁸ Ulo akwisa, akoyisa kushinina ichalo nabantu mukubifya kwabo, ubulungami namukupingula kwaku Lesa.

⁹ Akubashinina pamulandu wabubi, pakuti tabachetekelepo muli nebo.

¹⁰ Akubashinina pamulandu wabulungami, pantu nkoya kuli Bata, elo tamwayise kumbonapo nakambi iyowo.

¹¹ Akubashinina pamulandu wabupingushi, pantu Satana, imfumu yabantu ababi abamuchalo, alipingulwa kale.

¹² “Ndi nafyo ifintu ifinji ifyakusosa kuli mwe, kuntu tekuti mufyumfwikishepo iyowo.

¹³ Nomba ulo wakwisa Umupashi Wabuta, akwisa kufisulula ukwebesha konse ukwaku Lesa. Akwisa kumulangilila ukwebesha konse. Takoyisa kuyisosela ifyamwine enka. Akwisa kusosa pafintu aumfwa, nokumweba pafintu ifyakwisa kuntanshi.

¹⁴ Akwisa kumpela ubuleme, pakuti ifyo akwisa fyakufuma kuli nebo.

¹⁵ Ifintu fyonse ifyo Bata bali nafyo fyanji. Echo nsosele ati akesa bula ifyo nasosa nokumulondolwela.

Ichikonko chakwaluka ukusekelela

¹⁶ “Pakanshita kanini tamwayise kumbonapo, nakambi akapitapo akanshita kanini mwakwisa kumbona.”

¹⁷ Bambi abakusambila bakwe balifumbashenye bati, “Mba nchi chikoyalula ndo? Akotweba ati, ‘Pakanshita kanini tatwakamubonepo nakambi akapitapo akanshita kanini twakwisa kumubona.’ Elo akososa ati, ‘Nipamulandu wakuti nkoya kuli Bata?’”

¹⁸ Basoshenye bati, “Ngechi ichakanshita kanini chikoyalule ndo? Tatukochishibapo icho akososa.”

¹⁹ Yesu alishibile ukuti bafwayile ukumufumba. Elo asosele kuli bo ati, “Nasosele ati, ‘Pakanshita kanini tamwayise kumbonapo, nakambi akapitapo akanshita kanini mwakwisa kumbona.’ Napo nchi echo mukofumbashanyapo?

²⁰ Nachine nkomweba ati, mwakulila imisowa, kuntu ichalo chikoyisa kusekelela. Mwebo mwakwisa kuba nechikonko, kuntu ichikonko chenu chakwaluka ukusekelela.

²¹ Ulo umwanakashi alimupepi nokupapa, alalanguluka pakuti inshita yakwe iyakupola yapalamina. Nomba ulo apapa, takoyibukishapo nakambi ukuchula kwakwe, pakuba alasekelela ukuti umwana afyalwa muchalo.

²² Emfilya chili kuli mwe. Nomba muli nechikonko, kuntu nakwisa kumubona nakambi. Elo imitima yenu yakwisa kwiula nokusekelela. Echo ukusekelela kwenu tapapo nangu umo uukoyisa kukufumyako kuli mwe.

²³ “Muli nkalya kasuba tamwayise kumfumba akantu iyowo. Nachine nkomweba ati, nga mwakufumba akantu kuli Bata mwishina lyanji, bakumupela.

²⁴ Inshita yapitapo tamwafumbilepo kantu mwishina lyanji. Fumbeni, elo mwakupokelela ukuti ukusekelela kwenu kube ukwafikapo.

Yesu achimfya ububi bwachalo

²⁵ “Nomba nkososa namwebo mfi fintu mufyelusho, kuntu inshita ikoyisa iyo tanshayise kusosapo nakambi munshila nji. Nakwisa kumulondolwela ifyaku Bata pamenso-kutuba.

²⁶ Ulo nkalya kasuba kakwisa, mwakwisa kufumba mwishina lyanji, nshikoeba ukuti nakwisa kumulombela kuli Bata

²⁷ pantu Bata benka balimutemwa. Balimutemwa pakuti mwalintemwa nokunchetekela ukuti nafumine kuli Bo.

²⁸ Nafumine kuli Bata, elo nalishile muchalo. Epo nkosha ichalo nokubwelela kuli Bata.”

²⁹ Abakusambila bakwe basosele ati, “Boneni nomba mukososa pamenso-kutuba, kuntu temufyelushopo iyowo!

³⁰ Nomba twayishiba ukuti mwalishiba fyonse, tachikofwayikwapo ukuti umuntu amufumbepo. Echo twasumina ukuti mwafumine kuli Lesa.”

³¹ Yesu alibasukile ati, “Kanshi nomba mukochetekela?

³² Inshita ikoyisa, nanomba ilifikile kale, ulo mwakwisa kupalangana nokuya kumwenu-mwenu. Elo nakushala nenka. Nangu chakuba mfi, tanshakabepo nenka pakuti Bata bali nandibo.

³³ Namweba amashiwi nga ukuti mube nomutende wakuchetekela muli ne. Muno chalo mukaba mukuchula. Nangu chibe mfi, sekeleleni pantu nachimfya ichalo.”