Yohane 14 - Chipangano Chabwangu

Yesu enshila yakwilamo kuli Bawishi

¹ “Imitima yenu yisakamikwa. Chetekeleni muli Lesa nakambi chetekeleni muli ne.

² Munanda yaku Bata muli ififulo fyakwikalamo ifinji. Nga tachali mfi nga nalimwebele. Nkoya mukumuwamishisha ififulo.

³ Panuma yakumuwamishisha ififulo, nakubwela nakambi ukuti njise mutwale uko ndi ukwebati uko njikala namwe eko mukekale.

⁴ Mulishibile nshila iiya kuchifulo nkulya uko nebo nkoya.”

⁵ Elo Tomasi asosele kuli Yesu ati, “Bashikulu, fwebo tatwishibilepo uko mukoya. Mba twakwishiba shani inshila?”

⁶ Yesu alimwasukile ati, “Nine inshila, nokwebesha nobumi. Takupo uuya kuli Bata, sembi apitila muli ne.

⁷ Ifyo nomba mwalinjishiba bwino, mwakwishiba na Bata kumo. Nomba ukufuma nduno mwamwishiba nakambi mulimubwene.”

⁸ Elo Filipo asosele ati, “Bashikulu, tulangeni Bashinwe, echo tukofwaya epela.”

⁹ Yesu alimwasukile ati, “Nayikala namwe inshita iitali, kuntu webo Filipo taulanjishibapo? Uyo onse uwabona nebo abona na Bata. Mulandu ndo waebela ati, ‘Tulangeni Bashinwe?’

¹⁰ Kanshi taukochetekelapo Filipo ukuti nebo ndi muli Bata na Bata bali muli nebo? Amashiwi awo nasosa kuli mwe tekuli nebopo akofuma. Bata abayikala muli nebo ebapyunga imilimo yabo muli ne.

¹¹ Nchetekeleni nebo ulo nsosa nati ndi muli Bata nakambi Bata nabo bali muli ne. Nga temfilya, chetekeleni pamulandu wamilimo iyo nchita.

¹² Nachine nkomweba ati, uyo onse uwachetekela muli nebo akwisa kuchita imilimo iyo nebo nkochita. Ina, akwisa kuchita imilimo iikulu nokuchishapo, pantu nkoya kuli Bata.

¹³ Elo nakwisa kuchita fyonse ifyo mwakwisa kulomba mwishina lyanji ukuti Bata bachinshikilwe mu Mwana wabo.

¹⁴ Nga mwalomba akantu akali konse mwishina lyanji, nakuchita.

Yesu alaya Umupashi Wabuta

¹⁵ “Nga mwalintemwa mwakulama amafunde anji.

¹⁶ Elo nakuya kufumba Bata, epo bakoya kumupa kafwa umbi, uwakwikalilila namwe lonse.

¹⁷ Ngu Mupashi uusambisha ifyakwebesha. Ichalo tachayise kumupokelela, pantu tabamubonapo nangu ukumwishiba. Nomba mwe mulimwishibile pantu ekala namwe nakambi ali muli mwe.

¹⁸ “Ulo nakuya nebo, nshakamushe ukubati bana banshiwa. Nakubwela nakambi kuli mwe.

¹⁹ Munshita bwaka iinini, ichalo tachakambonepo, kuntu mwebo mwakwisa kumbona pakuti nebo ndimumi, namwe mwakwisa kwikala nobumi.

²⁰ Ulo nkalya kasuba kakwisa, mwakwisa kwishiba ukuti ndi muli Bata namwebo muli nebo ukubati nimfilya nandibo naba muli mwe.

²¹ “Uyo onse uupokelela amafunde anji nokualama, ewantemwa. Bata bakumutemwa umuntu onse uwantemwa, nandibo nakumutemwa nakambi nokuyifisulula nemwine kuli ye.”

²² Yuda, (tepo Yuda Isikaliyoti), asosele ati, “Bashikulu, mba chingaba shani ichakweba ati mwebo mwakuyifisulula mwebene kuli fwebo, kuntu te kuchalo?”

²³ Yesu alimwasukile ati, “Muntu onse uwakuntemwa nebo ewakulama ukusambisha kwanji. Epo Bata bakwisa kumutemwa. Elo nebo na Bata twakwisa kwikalilila pamo muli ye.

²⁴ Muntu onse uutantemwa talamapo amashiwi anji. Nakambi amashiwi ayo mumfwa te anjipo, kuntu afuma kuli Bata abantuma.

²⁵ “Nebo namweba mfi ulo nchili pamo namwe.

²⁶ Kafwa, ewo Umupashi Wabuta, uwo Bata bakumutumina mwishina lyanji, akwisa kumusambisha ifintu fyonse, elo akwisa kumwibukisha ifintu ifyo namwebele.

²⁷ “Nkomushila umutende. Nkomupela umutende wanji. Nebo nshikomupelapo ukubati nimulya ichalo chipelela. Mwilenga musakamikwe nokutina.

²⁸ Mwalyumfwa ifyo nasosele kuli mwe ati, ‘Nkoya nebo, kuntu nakubwela kuli mwe.’ Kati mwalintemwa, kuti mwasekelela pantu nkoya kuli Bata. Pakuba Bata bakulu ukuchila nebo.

²⁹ Nomba namubusha mfi ifintu afitalachitika, ekwebati ulo fyakuchitika, mukese kuchetekela.

³⁰ Tanshasosepo namwebo inshita iitali, pantu Satana, imfumu ya nchino chalo, ikoyisa. Nomba tayikwetepo ifiso fyakunchila.

³¹ Ichalo chikowamina ukwishiba ukuti nebo nalitemwa Bata, echo nchitila ifintu fyonse ukulingana nomo bansambishisha. “Imeni nomba, tulokuya.