Yohane 13 - Chipangano Chabwangu

Yesu asamfya amakasa aabakusambila bakwe

¹ Nomba kwashele akasuba kamo kutalafika ukulya kwa Chakulya Chakuchilila. Yesu alishibile ukuti inshita yafika iyakufuma muli nchino chalo nokuya kuli Bawishi. Atemenwe abantu bakwe lonse abali muno chalo. Alibatemenwe ukufikila nakumupwilo.

² Yesu nabakusambila bakwe bali pakulya umulalilo, Satana ye kale ayinjile mumutima wakwa Yuda Isikaliyoti, mwana waku Simoni, ukuti embule Yesu kubalwani bakwe.

³ Yesu alishibile ati Bawishi balimupele ifiso pafintu fyonse. Alishibile ukuti Ye afumine kuli Lesa nakambi akubwelela kuli Ye.

⁴ Echo ayimakene pamulalilo, afulila ilaya lyali kunse nokukaka insalu iyakupukutilako mumusana wakwe.

⁵ Elo ayitile amenshi mwibeseni nokutendeka ukusamfya amakasa abakusambila bakwe nokubasumuna kunsalu iyo apombele mumusana wakwe.

⁶ Ulo ayishile kuli Simoni Petulo, naye asosele kuli Yesu ati, “Bashikulu, napo nimwe munga samfya amakasa anji?”

⁷ Yesu alimwasukile ati, “Webo tauchishibilepo icho nkochita, kuntu wakwisa kuchishiba panuma.”

⁸ Petulo alikaninine ndi ati, “Nangu chibe shani nebo tamwasamfyepo amakasa anji!” Yesu alimwasukile ati, “Nga nebo tanshakusamfyepo amakasa obe, tawabepo uwakusambila wanji.”

⁹ Pakumfwa mfi, Petulo alyasukile ati, “Obe! Kati efyo Bashikulu, mwinsamfyapo amakasa bwaka, kuntu namaboko anji nomutwi kumo!”

¹⁰ Yesu asosele ati, “Muntu onse uwasamba kale aba uwawamikwa. Mba nindo angasambila nakambi, kuntu kusamba bwaka kumakasa akwe. Mwebo bonse muliwamikilwe, kuntu temwepo bonse iyowo.” (

¹¹ Yesu alishibile kale uyo uwakwisa kumwembula. Echo asosele ati, “Mwebo bonse mwawamikwa, kuntu temwepo bonse iyowo.”)

¹² Panuma ulo Yesu asamfishe amakasa abo, afwele ilaya lyakwe ilyakunse nokubwelela kuchifulo chakwe kwitebulu. Elo asosele ati, “Napo mwachishiba icho nachita kuli mwe?

¹³ Mwebo mukonjita ati, ‘Musambishi’ nakambi ati, ‘Bashikulu.’ Nachine mukolungika pakuti efyo naba.

¹⁴ Nomba mwabona nebo Shikulunwe no Musambishi wenu, nasamba amakasa enu. Namwe kumo sambanenipo amakasa yenu.

¹⁵ Nebo nachita ichakubwenapo kuli mwe. Echo namwe mulingile mulokuchita ukubati ifyo nebo namuchitila.

¹⁶ Nachine nkomweba ati, takupo umusha uwachila wishikulu wakwe, nangu intumi ukuchila uyo uwamutumine.

¹⁷ Nomba mwayishiba mfi, mukashuka nga mwakufichita.

¹⁸ “Nshikososapo ifyakumwebo bonse, nalibeshiba abo nebo nasala. Nomba Amalembo Apatulika alingile alanga ukwebesha aakoti, ‘Umuntu uyo uukolya pamo nandibo ewambukila.’

¹⁹ Nkomweba kabela achitalachitika, elo mwakuchetekela ati, ‘Nebo nine uyo Uwayikalilila.’

²⁰ Nachine nkomweba ati, umuntu onse uwapokelela onse uwo natuma, ekwebati apokelela nebo, nakambi uupokelela nebo, apokelela nowantumine.”

Yesu asosa ifyakwembulwa kwakwe

²¹ Panuma ulo Yesu asosele mfi, alisunshikile ukwinekantu mumutima wakwe nokusosa ati, “Nachine nkomweba ati, umo umunenu akonyembula.”

²² Abakusambila bakwe balilolenshenye. Elo balishimbilwe ukwinekantu nokuti, “Mba ninani uwo akososapo?”

²³ Umo uwabakusambila bakwe uwo Yesu atemenwe, ayikele apepi na Yesu.

²⁴ Simoni Petulo alimuchebwishe nokweba ati, “Mufumbeni, mba ninani uwo akososapo?”

²⁵ Uwakusambila ngulya alipalamine kuli Yesu nokumufumba ati, “Mba ninani, Bashikulu?”

²⁶ Yesu alimwasukile ati, “Uyo nkopela akasunwa kamufuba ako natobesha mumuto eye.” Elo abulile akasunwa kamufuba nokutobesha mumuto, nokupela kuli Yuda, mwana wakwa Simoni Isikaliyoti.

²⁷ Bwangu-bwangu ulo Yuda abulile umufuba, Satana kayinjila muli ye. Yesu asosele kuli ye ati, “Endesha ukuchita ifyo uli nokuchita!”

²⁸ Tapali nangu umo pabakusambila bakwe abayikele petebulu abayishibilepo umulandu Yesu asosele mfi kuli Yuda.

²⁹ Pakuti Yuda ewalikusunga itumba lyandalama, bambi abakusambila bakwe balangulukile ati nangula Yesu amweba ukuya kushita ifyali kufwayikwa pakulya nangula ukupelako fimo kubachula.

³⁰ Ulo Yuda apokele akasunwa kamufuba ako, bwangu-bwangu alifumine panse. Yali ninshita yabushiku.

Ifunde ilyabwangu

³¹ Panuma ulo Yuda ayile, Yesu asosele ati, “Nomba Mwana wa Muntu wachinshikwa, nomba Lesa naye achinshikilwa muli Ye.

³² Kati Lesa achinshikilwa mu Mwana, ekwebati Lesa naye achinshika Umwana wakwe. Elo akochita bwangu-bwangu.

³³ Mwe bana banji, tanshayikalepo nenu inshita iitali. Mwakwisa kumfwayilila, kuntu nkomweba nomba ifyo na ebele intanjishi sha Bayuda ati, ‘Mwebo tekuti muyeko uko nebo nkoya.’

³⁴ Nomba nkomupela ifunde ilyabwangu ilyakuti mulokutemwana umo nomunakwe. Ukubati nimfilya nebo namutemwa, efyo mulingile ukutemwana.

³⁵ Nga mukotemwana, abantu bakwisa kumwishiba ukuti muli bakusambila banji.”

Yesu asosa ifyo Petulo akumukana

³⁶ Simoni Petulo afumbile Yesu ati, “Bashikulu, nikwisa uko mukoya?” Yesu alimwasukile ati, “Tekuti munkonkepo nomba uko nebo nkoya, panuma elo mwakwisa kunkonka.”

³⁷ Elo Petulo alimufumbile ati, “Bashikulu, mba nindo ntangamukonkelapo nomba? Nebo ndiyiteyenye ukufwila mwebo!”

³⁸ Yesu alyasukile ati, “Kanshi webo uliyiteyenye ukufwila nebo? Nachine nkokweba ati, tambala atalalila bwenka mbuno bushiku, ukoyisa kunkana imiku itatu.