Yohane 12 - Chipangano Chabwangu

Yesu bamusuba amafuta ku Betaniya

¹ Kwasheleko bwaka inshiku shisano nabumo kutalayisa ukulya Chakulya Chakuchilila, Yesu ayishile kumushi wa Betaniya, umushi umo umwalikwikalamo Lasalo uyo Yesu abushishe kubafwa.

² Eko bamuwamishe ukulya kwamulalilo, Malita ewalikubapyungila. Elo Lasalo ayikele pakulya pamo na Yesu.

³ Elo Maliya abulile umusashi wamafuta aabwema bwawama ayapangilwe na naladi nokuyetulwila pamakasa aku Yesu. Elo ayasumwine nemishishi yakwe. Inanda yonse yayiwilemo nobwema bwamafuta aanunkila bwino ngalya.

⁴ Umo uwabakusambila baku Yesu, Yuda Isikaliyoti, (uwali nokumwembula,) asosele ati,

⁵ “Mba nindo batashitishepo bwaka nga mafuta amakobili imyanda itatu nokuapela kubachula?”

⁶ Asosele mfi tepamulandupo wakulangulukila abachula iyowo, nipakuti ali mung’o. Ewalikupinta itumba lyandalama nokuyibulilamo.

⁷ Nomba Yesu asosele ati, “Mulekeni ngu umwanakashi! Nga mafuta awamishisha pakasuba kakushikwa kwanji.

⁸ Abachula mwalikuli nabo lonse, kuntu tamwalokulipo nandibo lonse iyowo.”

Inshila yakufwaya ukwipayilamo Lasalo

⁹ Abantu abenji balyumfwile ati Yesu ali ku Betani. Elo bayile nkulya. Tepamulandupo uwaku Yesu enka iyowo, kuntu ukuti bakabone Lasalo uyo Yesu abushishe kubafwa.

¹⁰ Intungulushi shabachipupila shapangile inshila shakwipayilamo Lasalo

¹¹ pamulandu wakuti abantu abenji ulo balikubona Lasalo, batatikile ukukana ukusambisha kwabo, batatika ukuchetekela muli Yesu.

Bachinshika Yesu pakwinjila mu Yelusalemu

¹² Ulo bwachele ibumba ilikulu ilyabantu abayishile mukulya Chakulya Chakuchilila, lyaumfwile ukuti Yesu akoyisa ku Yelusalemu.

¹³ Batemene imisambo yatunchindu ukuya mukumuchinsha. Baliya nokubilikisha bati, “Tondayisheni Lesa Mukulu! Lesa ashukishe ngu uukoyisa mwishina lyaku Bashikulu! Lesa ashukishe Imfumu yabena Isilaeli!”

¹⁴ Nomba Yesu asangile umwana waku punda nokuninapo, ukubati nimfilya chalembwa Mumalembo Apatulika ati,

¹⁵ “Witinapo wemushi wa Sioni. Bona Imfumu yobe ikoyisa, ilininine pamwana waku punda!”

¹⁶ Abakusambila bakwe tabaumfwilepo ukupilibula kwa mashiwi nga pali njilya nshita kufikila ulo Yesu abukile mubuleme. Elo bayibukishe ukuti nchi echo amashiwi alembelwe Mumalembo Apatulika alikulabila ishapali Ye.

¹⁷ Pantu abantu abenji abali na Yesu ulo ayitile Lasalo ukufuma mumanda nokumubusha kumfwa, ebashimikile ifyachitikilwe.

¹⁸ Ngu emulandu ibumba lyabantu lyayilile mukumukumanya, pantu baumfwile icho Ye achitile ichafiso ifikulu.

¹⁹ Elo Abafalisi basoshenye ati, “Mwabona, tukofilwa epela! Lolesheni ifyo ichalo chonse chikomukonka!”

Bambi Abagiliki bakofwaya Yesu

²⁰ Bambi Abagiliki bali pamo nabayile ku Yelusalemu mukulomba Lesa panshita yakulya nkulya.

²¹ Bayile kuli Filipo, (Filipo ali waku Betesaida muchalo cha Galili,) bati, “We mfumu, tukofwaya ukubona Yesu.”

²² Elo Filipo aebele Andileya amashiwi nga, epo mba babili bayile eba Yesu.

²³ Naye Yesu alibasukile ati, “Inshita nomba yafika iyakuti Mwana wa Muntu apelwe ubuleme.

²⁴ Nachine nkomweba ati, nga uluseke lwaku tiligu taluponene mumushili nokufwa, lulaba lumo bwaka. Nga lwafwa, elo lumena nokutwala inseke ishinji.

²⁵ Onse uukotemwa ubumi bwakwe akubulufya, na onse uukopata ubumi bwakwe muli nchino chalo akuba nobumi butashila.

²⁶ Umuntu onse uukofwaya ukumpyungila ankonke, noko konse uko ndi naye akubako. Nomuntu ukompyungila, Bata bakwisa kumuchinshika.

Yesu asosa ifyamfwa yakwe

²⁷ “Nomba umutima wanji ukosunshika ukwinekantu. Elo chindo nakusosa? Nga nasosa ati, ‘Bata, mwilenga muleke nji inshita yamachushi ukufika pali nebo?’ Nomba echo nayishile ukuti mpule muli nji nshita yamachushi.

²⁸ Bata chinshikeni ishina lyenu!” Neshiwi lyafumine kumulu lyasosele ati, “Nebo ndilichinshikile kale, nakambi nakulichinshika.”

²⁹ Ibumba lyabantu lyayimakene mpalya lyaumfwile ishiwi, bambi pali bo basosele ati, “Chibulumo!” Bambi bati, “Mungelo asosa kuli Ye.”

³⁰ Nomba Yesu asosele kuli bo ati, “Temulandupo wanji ndi shiwi lyasoselwa, kuntu nipamulandu wenu.

³¹ Nomba enshita yakupingulwa kwabantu banchino chalo, Satana kateka wanchino chalo, akutamfishiwa.

³² Ulo mwakunjimya pamutashi, nakwisa tintila abantu bonse kuli nebo.” (

³³ Mukusosa mfi, Yesu asontelele kumfwa iyo aali nokuchulilamo.)

³⁴ Elo ibumba lyabantu lyalyasukile ati, “Mumafunde akwa Mosesi mwalilembwa ati, ‘Uwasubwa waku Lesa akwisa kwikalilila.’ Mba nishani nomba ukusosa ati, ‘Umwana wa Muntu akowamina ukusumbulwa pamutashi? Ninani uyo Mwana wa Muntu?’”

³⁵ Yesu abasukile ati, “Ukusanika kuli pali mwebo mukanshita kanini. Endeni mukusanika ulo muchili nako ukuti imfishi iimufimbapo, pakuti uukoyenda mumfinshi teshibapo uko akoya.

³⁶ Chetekeleni mukusanika ulo muchili nako ukuti mwise mube abantu bakusanika.” Ulo Yesu asosele mfi alifuminepo nokuyifisa.

Ukutachetekela kwabantu bambi

³⁷ Nangu Yesu achitile mfi fishibilo ifyafiso ifikulu pamenso abo, tabachetekelepo muli Ye.

³⁸ Nchi chali mfi ukuti ifyo umusoseshi Esaya alembele fiboneke ifyachine ifyakuti, “Bashikulu, mba nibani abachetekele amashiwi twasosele? Mba nikuli bani Bashikulu bafisulwilile ifiso fyabo?”

³⁹ Nomba napali nchi tabachetekelepo. Echo Esaya asosele nakambi ati,

⁴⁰ “Lesa abapofwisha amenso abo, nokwisala amano abo, ukuti amenso ebona, namano abo beumfwa, ukuti beyalukila kuli nebo, ukweba ati nandibo mbaposhe.”

⁴¹ Esaya asosele mfi pakuti abwene ubuleme bwaku Yesu, elo ewo alikusosapo.

⁴² Nangu chali mfilya, abenji abamubakulu ba Bayuda balichetekele muli Yesu. Nomba pamulandu wakutina Abafalisi, tabalikusosapo palwalala ukwebati belenga babatamfye munanda yakulombelamo Lesa.

⁴³ Batemenwe ukuchinshikwa nabantu ukuchila ukuchinshikwa na Lesa.

Ukupingulwa namashiwi yaku Yesu

⁴⁴ Yesu asosele mwishiwi ilikulu ati, “Uyo onse uukonchetekela takochetekela muli nebo nenka iyowo, kuntu akochetekela namuli ngulya uwantumine.

⁴⁵ Elo umuntu onse uwabona nebo abona nangulya uwantumine.

⁴⁶ Nayisa muchalo ukuba ukusanika, ukuti onse uukochetekela muli nebo eyikalilila mumfinshi.

⁴⁷ Kati umuntu aumfwa amashiwi anji nokutayanakila, tanshayise kumulengululapo. Nalisa, te mukupingulapo ichalo iyowo, kuntu nimukuchipulusha.

⁴⁸ Muntu onse uukonkana nokutapokelela amashiwi anji, eko ali uwakwisa kumupingula. Amashiwi ayo nsosele eyakwisa kumupingula pakasuba kakumupwilo.

⁴⁹ Nchi chakwebesha pantu nshiyisosela ifyaku nebo nenka, kuntu Bata abantumine ebansambishe ifyo nsosa.

⁵⁰ Elo nalishiba ukuti, ifunde lyakwe lileta ubumi butapwa. Ifyo nsosa efyenka ifyo Bata banjeba ukusosa.”